ەلوردا قۇتقارۋشىلارى ءورتتىڭ الدىن الۋ جانە ءورت قاۋىپسىزدىگى دەڭگەيىن ارتتىرۋ ماقساتىندا قوعامدىق تاماقتانۋ نىساندارىندا پروفيلاكتيكالىق رەيدتىك ءىس-شارالار وتكىزىپ جاتىر.

قوعامدىق تاماقتانۋ ورىندارى – دۇڭگىرشەكتەر، پاۆيلوندار، فاستفۋد، دونەر ساتاتىن ورىندار بويىنشا رەيد جۇرگىزۋ ءۇشىن جۇمىس توبى استانا قالاسى توتەنشە جاعدايلار دەپارتامەنتى تاراپىنان جەرگىلىكتى اتقارۋشى ورگاندارمەن بىرلەسىپ قۇرىلعان.

جۇرگىزىلگەن 320 رەيدتىك ءىس-شارانىڭ ناتيجەسىندە وسى ساناتتاعى 426 نىسان انىقتالدى.

تەكسەرۋ بارىسىندا كاسىپكەرلەرگە ءورت قاۋىپسىزدىگى تالاپتارىن ساقتاۋ جونىندە ءتۇسىندىرۋ جۇرگىزىلدى. اتاپ ايتقاندا، مىنالار ءتۇسىندىرىلدى:

• ەلەكتر جابدىقتارى مەن گاز قوندىرعىلارىن قاۋىپسىز پايدالانۋ ەرەجەلەرى;

• ەلەكتر جەلىلەرىنە ارتىق جۇكتەمە تۇسىرۋگە جول بەرمەۋ;

• باستاپقى ءورت ءسوندىرۋ قۇرالدارىنىڭ بولۋى جانە جارامدى كۇيدە ساقتالۋى;

• ەۆاكۋاتسيالىق شىعۋ جولدارىنا ەركىن ءارى كەدەرگىسىز قولجەتىمدىلىكتى قامتاماسىز ەتۋ.

سونىمەن قاتار ءاربىر كاسىپكەرگە ءورت قاۋىپسىزدىگىنىڭ نەگىزگى تالاپتارى مەن ءورت تۋىنداعان جاعدايدا ارەكەت ەتۋ الگوريتمى كورسەتىلگەن اقپاراتتىق حاتتار (جادىنامالار) تابىستالدى.

رەيد بارىسىندا ارنايى رۇقسات قۇجاتتارى مەن كەلىسىمشارتتارى جوق 78 پاۆيلون انىقتالدى.

اتالعان كاسىپكەرلەرگە دە ءتۇسىندىرۋ جۇرگىزىلىپ، ناتيجەسىندە زاڭسىز ورناتىلعان پاۆيلوندار بۇزىلدى، التاۋى عيماراتتاردىڭ الدىڭعى قاسبەتىنەن ارتقى بولىگىنە كوشىرىلدى.

بۇل باعىتتاعى جۇمىس جالعاسىپ جاتىر جانە تۇراقتى باقىلاۋدا.

ءورتتىڭ الدىن الۋ جانە ولاردىڭ سانىن ازايتۋ ماقساتىندا ەلوردالىق تجد مىنا جۇمىستاردى اتقارۋدا:

• جەرگىلىكتى اتقارۋشى جانە مۇددەلى مەملەكەتتىك ورگاندار وكىلدەرىنىڭ قاتىسۋىمەن بىرلەسكەن رەيدتەر تۇراقتى تۇردە ۇيىمداستىرىلادى;

• ءورت قاۋپى جوعارى نىسانداردا مەكەنجايلىق پروفيلاكتيكالىق جۇمىس كۇشەيتىلدى;

• بيزنەس سۋبەكتىلەرىنە ءورت قاۋىپسىزدىگى تالاپتارىن ساقتاۋ بويىنشا جەكە جاۋاپكەرشىلىك تۋرالى اقپاراتتىق-ءتۇسىندىرۋ جۇرگىزىلەدى;

• كورنەكى جانە اقپاراتتىق ماتەريالدار (جادىنامالار، حاتتار، ۇسىنىمدار) تاراتىلادى;

• بۇقارالىق اقپارات قۇرالدارى مەن الەۋمەتتىك جەلىلەر ارقىلى ءورت قاۋىپسىزدىگى تالاپتارى جانە ورتكە اكەلەتىن تيپتىك بۇزۋشىلىقتار تۋرالى اقپارات جاريالانادى;

• ورتتەردىڭ سەبەپتەرىنە تالداۋ جاسالىپ، ناتيجەلەرى قوعامدىق تاماقتانۋ نىساندارىنىڭ يەلەرى مەن قىزمەتكەرلەرىنە جەتكىزىلەدى.