قازاقستان رەسپۋبليكاسى قارۋلى كۇشتەرىنىڭ، باسقا دا اسكەرلەرى مەن اسكەري قۇرالىمدارىنىڭ مەديتسينالىق قىزمەتتەرى وكىلدەرىنىڭ قاتىسۋىمەن وتكەن ۆەدومستۆوارالىق كەڭەس بارىسىندا جان-جاقتى ايتىلدى.

تاكتيكالىق مەديتسينا — توتەنشە جاعدايلاردا تىكەلەي جۇزەگە اسىرىلاتىن، جاراقات العان اسكەري قىزمەتشىلەردىڭ ءومىرىن قۇتقارۋعا جانە اسقىنۋلاردىڭ الدىن الۋعا باعىتتالعان ءىس-شارالار كەشەنى. تاكتيكالىق مەديتسينانىڭ باستى قاعيداسى — «التىن ساعات» ءپرينتسيپىن ۇستانۋ، ياعني جەدەل كومەك جارالانعاننان كەيىنگى العاشقى 60 مينۋت ىشىندە كورسەتىلۋى ءتيىس، بۇل ادام ءومىرىن امان الىپ قالۋ مۇمكىندىگىن ايتارلىقتاي ارتتىرادى، — دەيدى ۇلتتىق ۇلاننىڭ مەديتسينا مامانى ەرەك اقلاسوۆ.

وسى ماقساتتا، داعدارىس جاعدايلارىندا العاشقى مەديتسينالىق كومەك كورسەتۋدىڭ قازىرگى زامانعى ستاندارتىنىڭ تاكتيكالىق مەديتسينا حاتتاماسىن ازىرلەۋ جانە بەكىتۋ جوسپارلانۋدا. سوعان سايكەس، اسكەري قىزمەتشىلەر دە ءتيىستى باعىتتا وقىتىلاتىن بولادى. بۇل شەشىم تابيعي جانە تەحنوگەندىك سيپاتتاعى توتەنشە جاعدايلار كەزىندە، اپاتتار مەن جاپپاي تارتىپسىزدىكتەر سالدارىن جويۋ كەزىندە ەل ىشىندە دە، ەلدەن تىس جەردە دە ادام شىعىنىن بولدىرماۋعا نەمەسە ءولىم دەڭگەيىن تومەندەتۋگە مۇمكىندىك بەرەدى.

ەلوردالىق 5573 اسكەري ءبولىمىنىڭ شتاتىندا قۇقىقتىق ءتارتىپ اسكەرىنىڭ اسكەري مەديتسينا ماماندارى كۋرسانتتارمەن پراكتيكالىق ساباقتار وتكىزۋدە. تاكتيكالىق مەديتسينا كۋرستارى شۇعىل جاعدايلاردا مەديتسينالىق كومەك كورسەتۋ كەزىندەگى داعدىلاردى قالىپتاستىرۋعا باعىتتالعان.

وسىنىڭ ارقاسىندا اسكەري قىزمەتشىلەر جاۋىنگەرلىك جاعدايلاردا ءتيىمدى ارەكەت ەتىپ قانا قويماي، كۋرستا العان داعدىلارىن ازاماتتىق ومىردە دە قولدانا الادى. سونىمەن قاتار، جاۋىنگەرلىك دايىندىق دەڭگەيىن كوتەرۋگە كومەكتەسەدى.

دوڭگەلەك ۇستەل بارىسىندا اسكەرگە تەلەمەديتسينانى ەنگىزۋ ماسەلە قوزعالدى. بۇل اسكەري قىزمەتشىلەرگە اسكەري-مەديتسينالىق بولىمشە ماماندارىنىڭ بىرىڭعاي دەرەكقورى ارقىلى قاشىقتىقتان دارىگەرلىك كەڭەس الۋعا مۇمكىندىك بەرەدى.

جوبا شۇعىل جاعدايلاردا اۋديو- جانە بەينەبايلانىستى پايدالانا وتىرىپ، دارىگەرلەرمەن جەدەل بايلانىسۋعا جاعداي جاسايدى.

قورىتا ايتقاندا، تاكتيكالىق مەديتسينانى دامىتۋ جانە تەلەمەديتسينالىق تەحنولوگيالاردى ەنگىزۋ — قازاقستاندا اسكەري مەديتسينانىڭ قازىرگى زامانعى جانە ءتيىمدى جۇيەسىن قۇرۋعا ماڭىزدى قادام بولماق.

اشىق دەرەككوزدەردەن