اقتوبە وبلىسى مارتوك اۋدانى اققايىڭ اۋىلىنداعى جاڭا مەديتسينالىق پۋنكت مەملەكەت باسشىسىنىڭ تاپسىرماسىمەن بەكىتىلگەن «اۋىلدىق دەنساۋلىق ساقتاۋدى جاڭعىرتۋ» پيلوتتىق ۇلتتىق جوباسى اياسىندا بوي كوتەردى. جوبانىڭ قۇنى – 237 ملن.تەڭگە.

«مەملەكەت باسشىسىنىڭ قاسىم-جومارت كەمەلۇلى توقاەۆ ەلىمىزدە «اۋىلدىق جەرلەردە دەنساۋلىق ساقتاۋدى جاڭعىرتۋ» باعدارلاماسى جۇزەگە اسىرىلۋدا. ونىڭ اياسىندا مارتوك اۋىلىندا ەكى بىردەي نىساننىڭ قۇرىلىسى ءجۇرىپ جاتىر. سونىڭ ءبىرى بۇگىن اشىلدى. سىزدەرگە قۇتتى بولسىن. جاڭا نىساننىڭ اشىلۋى بىرىنشىدەن، مەديتسينالىق كومەكتى قولجەتىمدى ەتەدى، ەكىنشىدەن، جاڭا جۇمىس ورنى»، - دەپ اتاپ ءوتتى نىساننىڭ سالتاناتتى اشىلۋىندا ءسوز سويلەگەن وبلىس اكىمىنىڭ ورىنباسارى جولداس باتىرحان.

جاڭا عيماراتتىڭ اشىلۋىنا دەنساۋلىق ساقتاۋ باسقارماسىنىڭ باسشىسى ن.تىمپيەۆ، مارتوك اۋدانىنىڭ اكىمى م.ىسقاقوۆ تا قاتىستى.

پۋنكتە ازىرگە ءبىر مەدبيكە جۇمىس ىستەيدى. الداعى ۋاقىتتا تاعى 3 اۋىل تۇرعىنى تۇراقتى جۇمىسپەن قامتىلماق.

مۇندا تاۋلىگىنە 20 ادامدى قابىلداۋعا مۇمكىندىك بار. كۇندىزگى ستاتسيونار جانە فيزيوتەراپيا كابينەتتەرى تۇرعىنداردىڭ دەنساۋلىعىن جاقسارتۋعا باعىتتالعان، سونداي-اق، ولار سكرينينگتەن ءوتىپ، ەكپە الا الادى.

بۇگىندە اققايىڭ اۋىلىندا 410 ادام تۇرادى، باسىم بولىگى - اعا بۋىن وكىلدەرى. 33 جىلدا زاماناۋي ءارى جاڭا عيماراتقا قول جەتكىزگەن ولار قۋانىپ وتىر. اۋىل تۇرعىندارى مەديتسينالىق كومەكتى اۋىلدىق كلۋب عيماراتىنداعى ارنايى بولمەدە الىپ كەلگەن.

«ەم كەرەك بولسا، 35 شاقىرىم جەردە ورنالاسقان اۋىلدىق كلۋبقا بارىپ جۇردىك. ەندى مىنە، ءۇيىمىزدىڭ قاسىنان اشىلىپ جاتىر. قاجەت دەگەن ءدارى-دارمەگىمىزدى وڭاي ءارى ۋاقىتىلى الاتىن بولدىق. وتە قۋانىشتىمىز. عيماراتتى سالۋعا اتسالىسقان بارشا ازاماتقا العىسىمدى بىلدىرەمىن»، - دەپ اۋىل اقساقالى سارسەنباي ەرماعامبەتوۆ باتاسىن بەردى.

ءباسپاسوز قىزمەتى