الماتىعا جۇمىس ساپارى بارىسىندا قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا قالا اكىمى دارحان ساتىبالدىمەن بىرگە وتاندىق كينو ونەرىنىڭ تاريحىنا ارنالعان تاقىرىپتىق ساياباق قۇرۋ جوباسىمەن تانىستى.

ساپار بارىسىندا «قازاقفيلم» كينوستۋدياسىنىڭ قازىرگى جاي-كۇيى مەن وندىرىستىك الەۋەتىنە نازار اۋدارىپ، الداعى دامۋ جوسپارلارى اتاپ ءوتىلدى.

كينوستۋديا اۋماعىن دامىتۋ ماسەلەسىنە ەرەكشە نازار اۋدارىلدى. الماتى اكىمدىگى 5,5 گەكتار اۋماقتا وتاندىق كينو ونەرىنىڭ تاريحى مەن كينو سالاسىنىڭ كورنەكتى قايراتكەرلەرىنە ارنالعان زاماناۋي تاقىرىپتىق ساياباق قۇرۋدى جوسپارلاپ وتىر.

ساياباق اۋماقتىڭ مادەني جانە تۋريستىك تارتىمدىلىعىن ارتتىراتىن اشىق قوعامدىق كەڭىستىك رەتىندە بوي كوتەرمەك. كەلۋشىلەر وتاندىق كينو ونەرىنىڭ تاريحىمەن، كينوستۋديانىڭ قىزمەتىمەن جانە مۋزەي ەكسپوزيتسيالارىمەن تانىسا الادى.

كەلەشەكتە بۇل ساياباق وتاندىق كينەماتوگرافيستەر مەن مادەنيەت جانە ونەر قايراتكەرلەرىنىڭ قاتىسۋىمەن مادەني-اعارتۋشىلىق ءىس-شارالار وتكىزىلەتىن قوسىمشا الاڭعا اينالۋى مۇمكىن.

«وكىنىشكە قاراي، ءبىز ۇلتتىق كينوستۋديامىزدان ايىرىلىپ قالا جازدادىق. ونى قولدان بانكروتتىققا جەتكىزۋگە تىرىسىپ، ءىس جۇزىندە قاتارداعى پروديۋسەرلىك كومپانيامەن تەڭەستىرىپ قويعان ەدى. “قازاقفيلمدى” ساقتاپ قالۋ ءۇشىن زاڭنامالىق دەڭگەيدە قولداۋ شارالارى قابىلداندى. سونىڭ ىشىندە كينوستۋديانى مەملەكەت تاراپىنان تىكەلەي قارجىلاندىرۋ دا كوزدەلگەن. بۇگىندە اۋماقتى اباتتاندىرۋعا ەرەكشە كوڭىل ءبولىنىپ وتىر، ال كەلەسى جىلى پاۆيلونداردى جوندەۋگە كىرىسۋ جوسپارلانعان. ساياباق اۋماعىنىڭ قازىرگى جاعدايى قانداي ەكەنىن وزدەرىڭىز دە كورىپ وتىرسىزدار. كينوستۋديا اۋماعىن كەڭ كولەمدە اباتتاندىرۋ جانە كوگالداندىرۋ جۇمىستارىن جۇرگىزۋ جونىندە شەشىم قابىلداعان الماتى اكىمىنە شىنايى العىسىمدى بىلدىرەمىن. ناتيجەسىندە “قازاقفيلم” اۋماعى وتاندىق كينو ونەرىنىڭ تاريحىنا ارنالعان تاقىرىپتىق پاۆيلوندارى بار، وتباسىلىق دەمالىسقا قولايلى زاماناۋي كەڭىستىككە اينالۋعا ءتيىس»، – دەدى ايدا بالاەۆا.

سونىمەن قاتار قازاقستان رەسپۋبليكاسىنىڭ مادەنيەت جانە اقپارات مينيسترلىگى «قازاقفيلممەن» بىرلەسىپ، كينوستۋديا اۋماعىنىڭ قالعان بولىگىن كەشەندى جاڭارتۋ ماسەلەسىن پىسىقتاۋدا. بۇل جۇمىستار عيماراتتار مەن ينجەنەرلىك جەلىلەردى كۇردەلى جوندەۋدى، سونداي-اق اۋماقتى اباتتاندىرۋدى قامتيدى.

بۇدان بولەك، كينوستۋديا جەكە پروديۋسەرلىك كومپانيالارمەن ىنتىماقتاستىقتى جالعاستىرىپ، وندىرىستىك بولىمشەلەردىڭ تيىمدىلىگىن ارتتىرۋ باعىتىندا جۇمىس جۇرگىزىپ كەلەدى. جاڭعىرتۋ اياسىندا رەكۆيزيتتەر مەن جابدىقتاردى تسيفرلاندىرۋ جوباسى جۇزەگە اسىرىلۋدا. سوڭعى 15 جىلدا العاش رەت دەمەۋشىلىك قاراجات ەسەبىنەن ءىشىنارا ارلەۋ-جوندەۋ جۇمىستارى جۇرگىزىلدى.