Almatyǧa jūmys sapary barysynda QR Premer-ministrınıŋ orynbasary – mädeniet jäne aqparat ministrı Aida Balaeva qala äkımı Darhan Satybaldymen bırge otandyq kino önerınıŋ tarihyna arnalǧan taqyryptyq saiabaq qūru jobasymen tanysty.
Sapar barysynda «Qazaqfilm» kinostudiiasynyŋ qazırgı jai-küiı men öndırıstık äleuetıne nazar audaryp, aldaǧy damu josparlary atap ötıldı.
Kinostudiia aumaǧyn damytu mäselesıne erekşe nazar audaryldy. Almaty äkımdıgı 5,5 gektar aumaqta otandyq kino önerınıŋ tarihy men kino salasynyŋ körnektı qairatkerlerıne arnalǧan zamanaui taqyryptyq saiabaq qūrudy josparlap otyr.
Saiabaq aumaqtyŋ mädeni jäne turistık tartymdylyǧyn arttyratyn aşyq qoǧamdyq keŋıstık retınde boi kötermek. Keluşıler otandyq kino önerınıŋ tarihymen, kinostudiianyŋ qyzmetımen jäne muzei ekspozisiialarymen tanysa alady.
Keleşekte būl saiabaq otandyq kinematografister men mädeniet jäne öner qairatkerlerınıŋ qatysuymen mädeni-aǧartuşylyq ıs-şaralar ötkızıletın qosymşa alaŋǧa ainaluy mümkın.
«Ökınışke qarai, bız ūlttyq kinostudiiamyzdan aiyrylyp qala jazdadyq. Ony qoldan bankrottyqqa jetkızuge tyrysyp, ıs jüzınde qatardaǧy prodiuserlık kompaniiamen teŋestırıp qoiǧan edı. “Qazaqfilmdı” saqtap qalu üşın zaŋnamalyq deŋgeide qoldau şaralary qabyldandy. Sonyŋ ışınde kinostudiiany memleket tarapynan tıkelei qarjylandyru da közdelgen. Bügınde aumaqty abattandyruǧa erekşe köŋıl bölınıp otyr, al kelesı jyly pavilondardy jöndeuge kırısu josparlanǧan. Saiabaq aumaǧynyŋ qazırgı jaǧdaiy qandai ekenın özderıŋız de körıp otyrsyzdar. Kinostudiia aumaǧyn keŋ kölemde abattandyru jäne kögaldandyru jūmystaryn jürgızu jönınde şeşım qabyldaǧan Almaty äkımıne şynaiy alǧysymdy bıldıremın. Nätijesınde “Qazaqfilm” aumaǧy otandyq kino önerınıŋ tarihyna arnalǧan taqyryptyq pavilondary bar, otbasylyq demalysqa qolaily zamanaui keŋıstıkke ainaluǧa tiıs», – dedı Aida Balaeva.
Sonymen qatar Qazaqstan Respublikasynyŋ Mädeniet jäne aqparat ministrlıgı «Qazaqfilmmen» bırlesıp, kinostudiia aumaǧynyŋ qalǧan bölıgın keşendı jaŋartu mäselesın pysyqtauda. Būl jūmystar ǧimarattar men injenerlık jelılerdı kürdelı jöndeudı, sondai-aq aumaqty abattandyrudy qamtidy.
Būdan bölek, kinostudiia jeke prodiuserlık kompaniialarmen yntymaqtastyqty jalǧastyryp, öndırıstık bölımşelerdıŋ tiımdılıgın arttyru baǧytynda jūmys jürgızıp keledı. Jaŋǧyrtu aiasynda rekvizitter men jabdyqtardy sifrlandyru jobasy jüzege asyryluda. Soŋǧy 15 jylda alǧaş ret demeuşılık qarajat esebınen ışınara ärleu-jöndeu jūmystary jürgızıldı.
