الماتىدا قىلمىستىق استارى بار ونلاين تانىسۋدىڭ تاعى ءبىر وقيعاسى اشىلدى. المالى اۋداندىق پوليتسيا باسقارماسىنىڭ مالىمەتىنشە، قالا تۇرعىنىنا قاتىستى توناۋ قىلمىسىن جاساعانى ءۇشىن ەكى ەر ادام مەن ءبىر قىز بالادان تۇراتىن ءۇش كۇدىكتى ۇستالدى. ەر ازامات تانىسۋ سايتى ارقىلى ءبىر قىزبەن تانىسىپ، ونىڭ ۇيىنە بارعان. اڭگىمە بارىسىندا قىزدىڭ تانىستارى كەلىپ، جابىرلەنۋشىنى قورقىتىپ، ونىڭ جەكە زاتتارىن تارتىپ الىپ، وقيعا ورنىنان جاسىرىنعان. - كۇدىكتىلەر ءىزىن سۋىتپاي ۇستالدى. ولار ۋاقىتشا ۇستاۋ يزولياتورىنا قامالدى. توناۋ دەرەگى بويىنشا قىلمىستىق ءىس قوزعالدى. مۇنداي قىلمىستىق تىزبەك بۇعان دەيىن دە قالانىڭ باسقا اۋداندارىندا تىركەلگەن. ازاماتتاردى ينتەرنەت ارقىلى تانىسۋ كەزىندە، اسىرەسە العاشقى كەزدەسۋلەردە، اسا مۇقيات بولۋعا شاقىرامىز، – دەدى المالى اۋداندىق پوليتسيا باسقارماسىنىڭ باستىعى ماقسات پشان. الماتى قالالىق پوليتسيا دەپارتامەنتى ازاماتتاردى قىراعى بولۋعا شاقىرادى: بەيتانىس ادامدارعا سەنبەۋ، كۇماندى مەكەنجايلارعا بارماۋ جانە جاڭا تانىستارمەن كەزدەسۋگە شىققاندا جاقىندارىنا مىندەتتى تۇردە حابارلاۋ قاجەت.
