الماتى قالاسىندا كريمينالدىق پوليتسيا قىزمەتكەرلەرى ارنايى جاساقپەن بىرلەسىپ، پاتەر ۇرلىعىنا كۇدىكتى ازاماتتى ۇستادى. قالا پوليتسياسى تاراتقان اقپاراتقا سايكەس، كۇدىكتى كۇندىزگى ۋاقىتتا، ءۇي يەلەرى سىرتتا بولعان ساتتە، باسپانالارعا ەركىن ەنىپ، ۇرلىق جاساعان. الماتى قالالىق پوليتسيا دەپارتامەنتى كريمينالدىق پوليتسيا باسقارماسىنىڭ باستىعى تالانت يساەۆتىڭ ايتۋىنشا، قازىرگى تاڭدا ونىڭ كەم دەگەندە بەس ۇرلىق فاكتىسىنە قاتىسى بار ەكەنى انىقتالىپ وتىر. بۇل قىلمىستار قالانىڭ ءارتۇرلى اۋداندارىندا تىركەلگەن. جابىرلەنۋشىلەرگە كەلتىرىلگەن جالپى ماتەريالدىق شىعىن كولەمى 800 مىڭ تەڭگەدەن اسادى.
- كۇدىكتى ۇستالعان كەزدە وقيعا ورنىنان ايعاقتى زاتتار تاركىلەندى. قازىرگى ۋاقىتتا ونىڭ باسقا دا وسىعان ۇقساس قىلمىستارعا قاتىسى بار-جوعى تەكسەرىلۋدە. تەرگەۋ شارالارى جالعاسىپ جاتىر، - دەپ مالىمدەدى تالانت يساەۆ.
پوليتسيا تۇرعىنداردى قاراپايىم قاۋىپسىزدىك شارالارىن ساقتاۋعا شاقىرادى: ۇيدەن شىعاردا ەسىك پەن تەرەزەنىڭ جابىق ەكەنىنە كوز جەتكىزىپ، سەنىمدى قۇلىپتار ورناتۋ جانە بەينەباقىلاۋ جۇيەلەرىن قولدانۋ قاجەت. مۇنداي الدىن الۋ شارالارى ازاماتتاردىڭ مۇلكىن ساقتاۋعا سەپ بولادى.
