الماتىنىڭ مەدەۋ اۋدانىندا دوستىق داڭعىلىنان نازارباەۆ داڭعىلىنا دەيىنگى جامبىل كوشەسىندە، سونداي-اق تولە بي كوشەسىندە كوگالداندىرۋ جانە زاماناۋي اۆتوماتتى سۋارۋ جۇيەسىن ورناتۋ جۇمىستارى اياقتالدى. جوبالاردىڭ جۇزەگە اسىرىلۋى تۋرالى اۋدان اكىمدىگى وكىلدەرى وڭىرلىك كوممۋنيكاتسيالار قىزمەتى ۇيىمداستىرعان ءباسپاسوز تۋرىندا ايتتى.
اتالعان اۋماقتاردا سورعى ستانتسيالارى ورناتىلىپ، 14 شاقىرىمنان استام اۆتوماتتى سۋارۋ جەلىسى تارتىلدى. جاڭا جۇيە جاسىل جەلەكتەردى ۋاقىتىلى ءارى بىركەلكى سۋارۋعا مۇمكىندىك بەرىپ، ولاردى كۇتىپ ۇستاۋ تيىمدىلىگىن ارتتىرادى جانە سۋ رەسۋرسىن ۇتىمدى پايدالانۋدى قامتاماسىز ەتەدى.
«"حالىق قاتىساتىن بيۋدجەت" باعدارلاماسى اياسىندا اۆتوماتتى سۋارۋ جۇيەلەرىن ورناتۋ جانە كوگالداندىرۋ جوبالارى اياقتالدى. جاڭا سۋارۋ جەلىلەرىنىڭ جالپى ۇزىندىعى 14 شاقىرىمنان استى. بيىل باعدارلاما اياسىندا جۇزەگە اسىرىلىپ جاتقان 30 جوبانىڭ 10-ى كوگالداندىرۋ مەن اۆتوماتتى سۋارۋ جۇيەلەرىن ورناتۋعا باعىتتالعان. بۇل جوبالاردىڭ بارلىعى تۇرعىنداردىڭ باستاماسىمەن جۇزەگە اسىرىلىپ، نىسانداردى ىرىكتەۋ مەن جوبالىق ۇسىنىستاردى ازىرلەۋ ۇدەرىسىنە تۇرعىنداردىڭ ءوزى بەلسەندى قاتىستى»، – دەدى مەدەۋ اۋدانى اكىمىنىڭ ورىنباسارى ازات كاكەتاەۆ.
ونىڭ ايتۋىنشا، اۆتوماتتى سۋارۋ جۇيەسىن ەنگىزۋ اعاش، بۇتا مەن كوگالداردىڭ جاي-كۇيىن جاقسارتىپ، قوعامدىق كەڭىستىكتەردى كۇتىپ ۇستاۋ ساپاسىن جاڭا دەڭگەيگە كوتەرۋگە مۇمكىندىك بەرەدى.
