الماتىدا قالا بازارلارى مەن ساۋدا ورىندارىندا جۇمىس ىستەيتىن جاستاردى بىرىكتىرگەن Youth Nomads ۇلتتىق سپورت فەستيۆالىنىڭ فينالدىق كەزەڭى وتۋدە. جالپى جۇلدە قورى 3 ملن تەڭگە بولاتىن جوبا جاستار اراسىندا ۇلتتىق سپورت تۇرلەرى مەن سالاۋاتتى ءومىر سالتىن ناسيحاتتاۋعا باعىتتالعان ماڭىزدى باستامالاردىڭ بىرىنە اينالدى.

فينالدىق كەزەڭ «كەنجەحان» بازارى اۋماعىندا باستالدى. مۇندا ىرىكتەۋ كەزەڭدەرىنەن وتكەن ۇزدىك قاتىسۋشىلار باس جۇلدە ءۇشىن سىنعا تۇسەدى. جالپى جوباعا 1000-نان استام جاس قاتىستى. قورىتىندى كەزەڭگە دەيىن اۋقىمدى دايىندىق جۇمىستارى جۇرگىزىلدى: اقپاراتتىق كەزدەسۋلەر الماتىداعى 20-دان استام بازاردى قامتىدى، ال ىرىكتەۋ تۋرنيرلەرى «الاش»، «ميزام» جانە «جىبەك جولى» الاڭدارىندا ءوتىپ، ءار كەزەڭدە جۇزدەگەن قاتىسۋشىنى جينادى.

الماتى قالاسى اكىمىنىڭ ورىنباسارى ابزال نۇكەنوۆ ءىس-شارا بارىسىندا:

«جوبا اياسىندا كوپتەگەن جاس العاش رەت وسىنداي ورتاعا كەلدى. بۇعان دەيىن قاتىسپاعاندار قوسىلىپ، تانىسىپ، باعىن سىناپ كوردى. وسىنداي ساتتەردەن كەيىن وزىڭە سەنىم پايدا بولادى، “مەن دە جاساي الامىن” دەگەن وي قالىپتاسادى»، — دەپ اتاپ ءوتتى.

فينالدا قاتىسۋشىلار التى ءداستۇرلى سپورت ءتۇرى بويىنشا باق سىناۋدا: اسىق اتۋ، لاڭگى تەبۋ، قوي كوتەرۋ، قازاقشا كۇرەس، قول كۇرەس جانە ارقان تارتۋ. جارىستارمەن قاتار قوناقتارعا قولونەر بۇيىمدارىنىڭ كورمەسى، شىعارماشىلىق باعدارلامالار ۇسىنىلىپ، قالالىق مانساپ ورتالىعى مەن «SkilAll» ءبىلىم بەرۋ كۋرستارى دا قاتىسۋدا.

قاتىسۋشىلاردىڭ ايتۋىنشا، جوبا تەك سپورت جارىسى عانا ەمەس، ءوز مۇمكىندىگىن كورسەتۋگە جول اشقان الاڭعا اينالدى:

«ءبىز بازاردا جۇمىس ىستەيمىز، بىراق ارقايسىمىزدىڭ كۇشىمىز دە، الەۋەتىمىز دە بار. Youth Nomads سونى كورسەتۋگە مۇمكىندىك بەردى»، — دەيدى فيناليستەردىڭ ءبىرى.

باسقا قاتىسۋشىلار جوبا ۇلتتىق داستۇرلەرگە دەگەن قىزىعۋشىلىقتى ارتتىراتىنىن اتاپ وتۋدە:

«بۇل جاي عانا سپورت ەمەس — بۇل ءبىزدىڭ مادەنيەتىمىز».

ۇيىمداستىرۋشىلار جوبانىڭ ۇزاق مەرزىمدى ماڭىزى بار ەكەنىن ايتادى:

«Youth Nomads تەك جارىس ەمەس. بۇل داستۇرگە قۇرمەت، جاستاردى دامىتۋ جانە ءوزىن-ءوزى جۇزەگە اسىرۋعا جاڭا مۇمكىندىك. مۇنداي فورماتتاردىڭ جاستار اراسىندا سۇرانىسقا يە ەكەنىن كورىپ وتىرمىز»، — دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.

فەستيۆال ۇلتتىق قۇندىلىقتاردى دارىپتەۋگە، جاستاردىڭ بەلسەندىلىگىن ارتتىرۋعا جانە ولاردىڭ قالانىڭ قوعامدىق ومىرىنە بەلسەندى قاتىسۋ مادەنيەتىن قالىپتاستىرۋعا باعىتتالعان.