1-9 ماۋسىم كۇندەرى ەلوردادا العاش رەت بوچچادان Astana 2026 World Boccia Cup حالىقارالىق ءتۋرنيرى ءوتىپ جاتىر. جارىس رەسمي رەيتينگتىك باسەكەلەر قاتارىنا كىرەتىن الەم كۋبوگى كەزەڭدەرىنىڭ ءبىرى.

تۋرنيرگە الەمنىڭ 24 ەلىنەن، سونىڭ ىشىندە برازيليا، كانادا، قىتاي، ۇلىبريتانيا، وڭتۇستىك كورەيا، فرانتسيا جانە پورتۋگاليادان كەلگەن 90-عا جۋىق سپورتشى قاتىسىپ جاتىر.

ءتۋرنيردىڭ اشىلۋ سالتاناتىنا بوچچا فەدەراتسياسىنىڭ پرەزيدەنتى ماۋلەن اشىمباەۆ، حالىقارالىق بوچچا فەدەراتسياسىنىڭ پرەزيدەنتى دجوناتان مورگان جانە تۋريزم جانە سپورت ءمينيسترى ەربول مىرزابوسىنوۆ قاتىستى.

مۇنداي دەڭگەيدەگى جارىستىڭ قازاقستاندا ءوتۋى ەلدىڭ سپورتتىق ءىس-شارالاردى ۇيىمداستىرۋ الەۋەتىنىڭ جوعارى ەكەنىن كورسەتىپ، ينكليۋزيۆتى سپورتتى كەڭىنەن ناسيحاتتاۋعا قوسىمشا مۇمكىندىك بەرەدى.

الەم كۋبوگى كەزەڭىندە قازاقستان قۇراماسى ساپىندا 10 سپورتشى ونەر كورسەتىپ جاتىر. ولاردىڭ ۇشەۋى – قوزعالىس مۇمكىندىگى ەڭ شەكتەۋلى BC3 ساناتىنداعى سپورتشىلار. ولار دوپتى ارنايى ناۋا ارقىلى باعىتتاپ، جارىس بارىسىندا كومەكشىلەرىنىڭ قولداۋىمەن قاتىسادى. سايىستار جەكە، جۇپتىق جانە كوماندالىق فورماتتا وتەدى.

وتاندىق پاراسپورتشىلاردى دايارلاۋ جانە وقۋ-جاتتىعۋ جيىندارىن وتكىزۋ ماقساتىندا پورتۋگاليادان باپكەر روبەرتو ماتەۋش شاقىرىلدى. ول سپورتشىلارمەن جۇمىس ىستەپ، الداعى حالىقارالىق جارىستار قارساڭىندا كوماندانىڭ تەحنيكالىق جانە تاكتيكالىق دايىندىعىنا ەرەكشە كوڭىل بولەدى.

تۋرنير تۋريزم جانە سپورت مينيسترلىگى مەن سەرىكتەس ۇيىمداردىڭ قولداۋىمەن ءوتىپ جاتىر.

سونداي-اق وسى كۇنى سەنات توراعاسى مەن حالىقارالىق بوچچا فەدەراتسياسىنىڭ پرەزيدەنتى دجوناتان مورگان اراسىندا ەكىجاقتى كەزدەسۋ ءوتتى. كەزدەسۋ بارىسىندا تاراپتار پاراليمپيادالىق سپورتتىڭ قازىرگى جاي-كۇيى مەن دامۋ الەۋەتى، قازاقستاندا بوچچانى دامىتۋ جانە تانىمال ەتۋ ماسەلەلەرىن، حالىقارالىق ىنتىماقتاستىقتى نىعايتۋدى، سونداي-اق سپورتشىلار مەن باپكەرلەردى ءىرى حالىقارالىق جارىستارعا دايىنداۋ باعىتتارىن تالقىلادى.

دجوناتان مورگان قازاقستاننىڭ اشىق ءارى ىنتىماقتاستىققا باعىتتالعان ۇستانىمىن جوعارى باعالاپ، حالىقارالىق فەدەراتسيا ينكليۋزيانى دامىتۋعا باعىتتالعان بىرلەسكەن باستامالاردى قولداۋعا دايىن ەكەنىن اتاپ ءوتتى.