تۇتىنۋشىلار قۇقىعىن قورعاۋ كوميتەتىنىڭ تاپسىرىسى بويىنشا ازىق-تۇلىك ونىمدەرىنىڭ قاۋىپسىزدىگىن قامتاماسىز ەتۋ جانە تۇتىنۋشىلار قۇقىعىن قورعاۋ ماقساتىندا ساراپشىلار كەڭ تارالعان ءسۇت ونىمدەرىنىڭ ءبىرى – ايراندى زەرتتەدى. «ماڭعىستاۋ وبلىستىق تۇتىنۋشىلار قۇقىعىن قورعاۋ قوعامى» قوعامدىق بىرلەستىگىمەن جۇرگىزگەن زەرتتەۋ ناتيجەلەرى وتە الاڭداتارلىق. الماتى وبلىسىنىڭ قوناەۆ قالاسىنداعى دۇكەندەردىڭ بىرىنەن ساتىپ الىنعان ايران ۇلگىسى الماتى قالاسىنداعى ۇلتتىق ساراپتاما ورتالىعى فيليالىنىڭ اككرەديتتەلگەن زەرتحاناسىندا زەرتتەلدى. تالداۋ ناتيجەسىندە ءونىمنىڭ كەدەن وداعىنىڭ تەحنيكالىق رەگلامەنتتەرىنىڭ تالاپتارىنا ساي كەلمەيتىنى انىقتالدى. اتاپ ايتقاندا، كاپريل قىشقىلىنىڭ مولشەرى جوعارى، ال كاپرين قىشقىلىنىڭ مولشەرى تومەن بولدى.
كاپريل قىشقىلىنىڭ مولشەرىنىڭ جوعارى بولۋى ءوندىرىس تەحنولوگياسىنىڭ بۇزىلۋى نەمەسە ءونىمنىڭ دۇرىس ساقتالماۋى سالدارىنان بولۋى مۇمكىن. بۇل ايراننىڭ دامدىك قاسيەتتەرىنىڭ ناشارلاۋىنا، سونداي-اق تۇتىنۋشىلاردىڭ دەنساۋلىعىنا تەرىس اسەر ەتۋىنە، اس قورىتۋ جۇيەسىنىڭ بۇزىلۋىنا اكەلۋى مۇمكىن.
ال كاپرين قىشقىلىنىڭ مولشەرىنىڭ تومەن بولۋى ءونىمنىڭ مايلىلىعى بۇزىلۋىنىڭ بەلگىسى بولىپ تابىلادى، بۇل ونىڭ ساپاسى مەن تاعامدىق قۇندىلىعىنا تەرىس اسەر ەتۋى مۇمكىن. سونىمەن قاتار ءسۇت ءونىمىنىڭ جاساندى تۇردە جاسالۋى نەمەسە سۇيىلتىلۋىنىڭ بەلگىسى بولىپ تابىلادى، سونداي-اق ونىڭ تابيعيلىعى مەن ستاندارتتار سايكەستىگىنە كۇمان تۋدىرادى.
ساپالى ايراندى قالاي تاڭداۋعا بولادى؟
ساراپشىلار ايران تاڭداعاندا مىناداي جايتتارعا نازار اۋدارۋدى ۇسىنادى:
قۇرامى: تابيعي ايراندا تەك پاستەرلەنگەن ءسۇت جانە اشىتقى بولۋى ءتيىس.
ساقتاۋ مەرزىمى: جارامدىلىق مەرزىمى اياقتالىپ بارا جاتقان ونىمدەردى ساتىپ الماڭىز.
ساقتاۋ شارتتارى: ايران توڭازىتقىشتا ساقتالۋى ءتيىس.
ورامانىڭ سىرتقى ءتۇرى: وراما ءبۇتىن، زاقىمدالماعان بولۋى ءتيىس.
ءوندىرۋشى: سەنىمدى وندىرۋشىلەردى تاڭداڭىز.
فوتو اشىق دەرەككوزدەردەن الىندى
