زاڭدىلىق پەن ءتارتىپ قاعيداتىن قامتاماسىز ەتۋ شەڭبەرىندە سىبايلاس جەمقورلىققا قارسى قىزمەت جەمقورلىقتىڭ، ونىڭ ىشىندە جوعارى لاۋازىمدى ادامدار اراسىندا جولىن كەسۋ بويىنشا جۇيەلى جۇمىس جۇرگىزۋدە. ماسەلەن، قوستاناي قالاسىنىڭ №2 سوتىنىڭ ۇكىمىمەن اۋىل شارۋاشىلىعى مينيسترلىگى اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ توراعاسى د. ابدىكارىموۆ ورتا قاۋىپسىزدىكتى تۇزەۋ مەكەمەسىندە مەرزىمىن وتەي وتىرىپ، 3 جىل 6 ايعا باس بوستاندىعىنان ايىرۋعا سوتتالدى.  ول جەكە كومپانيالاردىڭ باسشىسى س. وسپانوۆتان شەگىرتكەگە قارسى پەستيتسيدتەردى جەتكىزۋ جونىندەگى قىزمەتتەردى مەملەكەتتىك ساتىپ الۋ شارتىن جاساعانى ءۇشىن 4,4 ملن تەڭگە سوماسىندا پارا العانى ءۇشىن كىنالى دەپ تانىلدى. سوت س. وسپانوۆقا 3 جىلعا باس بوستاندىعىنان ايىرۋدى تاعايىندادى. سونىمەن قاتار، سوتتالعاندارعا مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋعا ءومىر بويى تىيىم سالىنادى. ۇكىم زاڭدى كۇشىنە ەنگەن جوق.

انىقتاما ءۇشىن: كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.