قورقىت اتا اتىنداعى قىزىلوردا ۋنيۆەرسيتەتىندە ادام ساۋداسىنىڭ الدىن الۋ جانە ەڭبەك قاناۋى قۇرباندارىن انىقتاۋ ماسەلەلەرىنە ارنالعان «ادام ساۋداسىنا جول جوق» تاقىرىبىندا پروفيلاكتيكالىق كەزدەسۋ ءوتتى.
ءىس-شاراعا قىزىلوردا وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ، وبلىستىق پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ، مەملەكەتتىك ەڭبەك ينسپەكتسياسى كوميتەتىنىڭ قىزىلوردا وبلىسى بويىنشا دەپارتامەنتىنىڭ، قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ، سونداي-اق ادام ساۋداسى قۇرباندارىنا ارناۋلى الەۋمەتتىك قىزمەت كورسەتەتىن ۇكىمەتتىك ەمەس ۇيىمنىڭ وكىلدەرى قاتىستى.
كەزدەسۋ بارىسىندا ستۋدەنتتەر مەن وقىتۋشىلارعا ادام ساۋداسىنىڭ الدىن الۋ، ادامداردى زاڭسىز اكەتۋ، اكەلۋ جانە ساتۋعا قارسى كۇرەس شارالارى، بالا ەڭبەگىن زاڭسىز پايدالانۋدىڭ جولىن كەسۋ باعىتىنداعى جۇمىستار تۋرالى اقپارات بەرىلدى. سونىمەن قاتار ادام ساۋداسىنىڭ نەگىزگى بەلگىلەرى، كۇماندى جۇمىس ۇسىنىستارىنان ساقتانۋ تاسىلدەرى جانە قۇقىق قورعاۋ ورگاندارىنا جۇگىنۋ ءتارتىبى ءتۇسىندىرىلدى.
سونداي-اق وبلىستىق پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرى جاستار اراسىندا ناشاقورلىقتىڭ الدىن الۋ ماقساتىندا ەسىرتكى زاتتارىنىڭ ادام اعزاسىنا تيگىزەتىن زيانى، ونىڭ الەۋمەتتىك سالدارى، ەسىرتكىنىڭ تارالۋ جولدارى، زاڭنامادا كوزدەلگەن جاۋاپكەرشىلىك پەن قاتاڭداتىلعان جازا تۇرلەرى تۋرالى باياندادى.
بۇدان بولەك، ينتەرنەت-الاياقتىقتىڭ كەڭ تارالعان تاسىلدەرى مەن ولاردان ساقتانۋ جولدارى جونىندە ءتۇسىندىرۋ جۇمىستارى جۇرگىزىلدى.
مۇنداي كەزدەسۋلەر جاستاردىڭ قۇقىقتىق ساۋاتتىلىعىن ارتتىرىپ، قوعامداعى وزەكتى قاۋىپتەردىڭ الدىن الۋعا باعىتتالعان ماڭىزدى شارالاردىڭ ءبىرى بولىپ تابىلادى.
