2024 جىلدىڭ باسىنان بەرى جۇرگىزىلگەن تەكسەرۋ ناتيجەسى كورسەتكەندەي، 58 مەكتەپ ءبىلىم بەرۋ قىزمەتىن ليتسەنزياسىز جۇرگىزگەن. بۇگىنگى تاڭدا ولاردىڭ 17-ءسى ءبىلىم بەرۋ قىزمەتىن قويىلاتىن تالاپتارعا سايكەستەندىردى. ليتسەنزياسىز قىزمەت جۇرگىزگەن مەكتەپتەرگە قاتىستى قر اقبتك 463-بابى بويىنشا ايىپپۇل سالۋ تۋرالى سوت قاۋلىلارى شىقتى. بۇل ءبىلىم بەرۋ ۇيىمدارى نەگىزىنەن استانا جانە الماتى قالالارىندا، اتىراۋ، الماتى، باتىس قازاقستان، تۇركىستان، ماڭعىستاۋ جانە جامبىل وبلىستارىندا ورنالاسقان.  «قر «ءبىلىم تۋرالى» زاڭىنا سايكەس بارلىق مەكتەپتەر ءبىلىم بەرۋ قىزمەتىن باستاماس بۇرىن رۇقسات الۋى ءتيىس. ليتسەنزيانىڭ بولماۋى مەكتەپتەردىڭ تالاپتارعا سايكەستىگى بويىنشا تەكسەرۋدەن وتپەگەنىن نەمەسە رۇقسات الۋ ءۇشىن قۇجاتتاردى تاپسىرماعانىن بىلدىرەدى. ءبىلىم بەرۋ ۇيىمدارى ءبىلىم بەرۋ قىزمەتىمەن اينالىسۋعا ليتسەنزيا العان ساتتەن باستاپ قانا قۇقىلى. ەگەر مەكتەپ مەملەكەتتىك تىركەۋدەن وتكەن ساتتەن باستاپ التى اي ىشىندە ليتسەنزيا الماسا، وندا ول سوت تارتىبىمەن جابىلۋعا ءتيىس»، - دەپ اتاپ ءوتتى كوميتەت توراعاسى ەرنۇر داۋەنوۆ.

ليتسەنزيا الۋعا قويىلاتىن نەگىزگى تالاپتار ءتيىستى ماتەريالدىق-تەحنيكالىق بازانىڭ، بىلىكتى پەداگوگيكالىق قۇرامنىڭ بولۋىن، سانيتارلىق-ەپيدەميولوگيالىق جانە ورتكە قارسى نورمالاردىڭ ساقتالۋىن، سونداي-اق ءبىلىم الۋشىلارعا مەديتسينالىق قىزمەت كورسەتۋدى ۇيىمداستىرۋدى قامتيدى. وسى تالاپتارعا سايكەس كەلمەۋ اكىمشىلىك جازا قولدانۋ مەن قايتالاما بۇزۋشىلىقتار بولعان جاعدايدا ءبىلىم بەرۋ مەكەمەسىنىڭ قىزمەتىن توقتاتۋ ءۇشىن نەگىز بولىپ تابىلادى.  ەستەرىڭىزگە سالا كەتەيىك، مەكتەپتەر باعىنىستىلىعى بويىنشا جەرگىلىكتى اتقارۋشى ورگانداردىڭ قاراماعىنا جاتادى. ءوز كەزەگىندە اۋماقتىق دەپارتامەنتتەر وڭىرلىك اكىمدىكتەر مەن ءبىلىم باسقارمالارىنىڭ باسشىلارىنا بۇزۋشىلىقتاردى جويۋ جونىندە شارالار قابىلداۋ تۋرالى رەسمي حات جولدادى.