تاسىمالداۋ قارقىنى مەن ينفراقۇرىلىمدىق جوبالار تۋرالى كولىك ءمينيسترى مارات قاراباەۆ، سونداي-اق «قازاقستان تەمىر جولى» ۇك» اق باسقارما توراعاسى نۇرلان ساۋرانباەۆ بايانداما جاسادى. مينيسترلىكتىڭ مالىمەتىنشە، اعىمداعى جىلدىڭ 10 ايىنىڭ قورىتىندىسى بويىنشا جۇك تاسىمالىنىڭ كولەمى 3,5%-عا ارتىپ، 263 ملن 400 مىڭ توننانى قۇرادى. ىشكى تاسىمالدار 10,8%-عا ءوسىپ وتىر – 156,2 ملن توننا. ال ترانزيتتىك جۇك تاسىمالىنىڭ كولەمى وتكەن جىلدىڭ دەڭگەيىندە، ياعني 22 ملن 400 مىڭ توننا. كولىك-لوگيستيكا سالاسىن دامىتۋ بويىنشا پرەزيدەنت تاپسىرماسىن ىسكە اسىرۋ اياسىندا ەلدە اۋقىمدى ينفراقۇرىلىمدىق جوبالار جۇزەگە اسىرىلۋدا. بىلتىردان بەرى 2,8 مىڭ شاقىرىمنان استام تەمىرجول جوندەلدى. جىلجىمالى قۇرامدى جاڭارتۋ جۇمىستارى جالعاسۋدا. «قازاقستان تەمىر جولى» باسقارما توراعاسى نۇرلان ساۋرانباەۆتىڭ مالىمەتىنشە، بيىل 185 لوكوموتيۆ پەن 143 جولاۋشىلار ۆاگونى ساتىپ الىنعان. 2028 جىلى جولاۋشىلار ۆاگوندارىنىڭ پاركى 3 مىڭنان استام بىرلىككە جەتىپ، ەلدىڭ قاجەتتىلىگىن تولىق قامتاماسىز ەتەدى.
پرەمەر-مينيستر سالانى جاڭعىرتۋ بويىنشا كۇش-جىگەردى ارتتىرۋ قاجەتتىگىن ەرەكشە اتاپ ءوتتى. اسىرەسە، تەمىرجول ۆوكزالدارى مەن ستانتسيالاردىڭ ينفراقۇرىلىمىنا ەرەكشە نازار اۋدارۋ كەرەك – قازىرگى ۋاقىتتا ولاردىڭ شامامەن 90%-ى جوندەۋدى قاجەت ەتەدى.
«مەملەكەت باسشىسى قازاقستاندى تولىققاندى كولىك-لوگيستيكالىق حابقا اينالدىرۋ باعىتىندا ناقتى مىندەتتەر قويدى. بۇل رەتتە تەمىرجول سالاسىنىڭ دامۋ الەۋەتى جوعارى ەكەنىن اتاپ وتكىم كەلەدى. سونداي-اق ول ىشكى جانە ترانزيتتىك جۇك تاسىمالىن ارتتىرۋدا شەشۋشى ءرول اتقارىپ وتىر. العا قويىلعان ماقساتتارعا جەتۋ ءۇشىن ءبىز قولدانىستاعى تەمىر جولدار مەن لوگيستيكالىق ورتالىقتاردى جاڭعىرتىپ، جاڭالارىن سالىپ جاتىرمىز. سونداي-اق ۆاگون پاركىن جاڭارتۋ جۇمىستارى دا تۇراقتى جۇرۋدە. بۇل ەلىمىزدىڭ كولىك جۇيەسىنىڭ تيىمدىلىگىن جانە ونىڭ وتكىزۋ قابىلەتىن بارىنشا ۇلعايتۋعا مۇمكىندىك بەرەدى. قابىلدانعان شارالاردىڭ ناتيجەسىندە 2029 جىلعا قاراي ترانزيتتىك تاسىمال كولەمى 28 ملن توننادان 45 ملن تونناعا دەيىن، ال ترانزيت جيىرما فۋتتىق بالاماداعى 2 ملن كونتەينەرگە دەيىن وسەدى»، — دەپ اتاپ ءوتتى ولجاس بەكتەنوۆ.
حالىقارالىق كولىك دالىزدەرىندەگى قازاقستاندىق باعىتتاردىڭ باسەكەگە قابىلەتتىلىگىن ارتتىرۋدىڭ ماڭىزدىلىعى اتاپ ءوتىلدى. پرەمەر-مينيستر شەكاراداعى مەملەكەتتىك قىزمەتتەردى ساپالى ءارى جەدەل كورسەتۋ ءۇشىن بارلىق راسىمدەردى اياقتاۋدى تاپسىردى – قازىرگى ۋاقىتتا سالىق جۇيەسى مەن تەمىرجولدىڭ اقپاراتتىق جۇيەلەرى ينتەگراتسيالاندى.
كولىك مينيسترلىگى مەن «قازاقستان تەمىر جولى» كومپانياسى نەگىزگى ينفراقۇرىلىمدىق جوبالاردى ىسكە اسىرۋدىڭ ناقتى تەتىكتەرىن ازىرلەپ، قارجىلاندىرۋ كوزدەرىن انىقتاۋ تاپسىرىلدى. سونىمەن قاتار ۆاگونداردى جاڭارتۋدا قيىندىقتارعا كەزىگىپ وتىرعان جەكە تاسىمالداۋشىلاردى قولداۋ شارالارىن ازىرلەۋ قاجەت.
بۇدان بولەك، ۇكىمەت باسشىسى تەمىرجول جۇكتەرىن اۋىستىرىپ تيەۋ كولەمىن ۇلعايتۋ جانە تەڭىز تاسىمالىنىڭ الەۋەتىن ارتتىرۋ ءۇشىن اقتاۋ پورتىنىڭ ينفراقۇرىلىمىن جاقسارتۋ جۇمىستارىن جەدەلدەتۋدى تاپسىردى. كولىك مينيسترلىگى مەن «قازاقستان تەمىر جولى» كومپانياسىنا 2025 جىلى كونتەينەرلىك حاب سالىپ، اقتاۋ پورتىنىڭ ءتۇبىن تەرەڭدەتۋ جۇمىستارىن اياقتاۋ تاپسىرىلدى.
