وسىعان وراي استانادا قر مادەنيەت جانە اقپارات مينيسترلىگى، "قازاقفيلم" كينوستۋدياسى جانە ۇلتتىق كينونى قولداۋ ورتالىعى وكىلدەرىنىڭ قاتىسۋىمەن وتاندىق كينويندۋستريانى دامىتۋ تاقىرىبىندا بريفينگ ءوتتى.

جىل سوڭىنا دەيىن التى كينو جوبا، ونىڭ ىشىندە انيماتسيالىق جانە دەرەكتى فيلمدەر جارىققا شىعارىلادى. نەگىزگى باسىمدىق — جاس رەجيسسەرلەردى، اۆتورلىق كينو مەن انيماتسيانى قولداۋعا بەرىلەدى.

مادەنيەت جانە اقپارات مينيسترلىگىنىڭ كينەماتوگرافيا باسقارماسىنىڭ باسشىسى عاني مۇراتوۆتىڭ ايتۋىنشا، انيماتسيا — مادەني دامۋدىڭ ماڭىزدى بولىگى. وسى سالانى قايتا جانداندىرۋ ماقساتىندا «قازاقانيماتسيا» ءبولىمىن استانا قالاسىنا كوشىرۋ تۋرالى شەشىم قابىلدانعان.

«بارىمىزگە ءمالىم، يننوۆاتسيالىق تەحنولوگيالاردى ەنگىزۋ مەن كرەاتيۆتى جوبالاردى قارجىلاندىرۋ ۇدەرىستەرى ەلوردادا قارقىندى ءجۇرىپ جاتىر. استانادا جىل سايىن تمد ەلدەرىنىڭ گيك-مادەنيەت فەستيۆالى – Comic Con وتەدى، كرەاتيۆتى يندۋستريالار قورىن قۇرۋ جوسپارلانۋدا. سونداي-اق، ەلوردادا «حابار»، «قازاقستان» تەلەارنالارى مەن بالالار مەن جاسوسپىرىمدەرگە ارنالعان جالعىز مەملەكەتتىك ارنا – «بالاپان» ورنالاسقان. «قازاقانيماتسيا» وسى ينفراقۇرىلىم مەن رەسۋرستاردى ءتيىمدى پايدالانىپ، انيماتسيا سالاسىن دامىتۋعا ءتيىس»، - دەدى عاني مۇراتوۆ.

كەيىنگى التى جىل ىشىندە مينيسترلىك پەن ۇلتتىق كينونى قولداۋ ورتالىعىنىڭ قولداۋىمەن 117 كينو جوبا جۇزەگە اسىرىلعان. سالانى جۇيەلى دامىتۋ ماقساتىندا 2024 جىلى كينو جوبالاردى ىرىكتەۋ تارتىبىنە وزگەرىستەر ەنگىزىلدى. ەندى اۆتورلارعا باسىم تاقىرىپتار ۇسىنىلىپ، ستسەناري جازۋعا ەكى اي مەرزىم بەرىلەدى. ءپاتريوتيزمدى، ادامگەرشىلىك پەن رۋحانياتتى ناسيحاتتايتىن تاريحي فيلمدەرگە ەرەكشە نازار اۋدارىلۋدا. ساراپتامالىق كەڭەستىڭ قاراۋىنان كەيىن جوبالار پيتچينگ — اشىق قورعاۋ كەزەڭىنە وتەدى.

«بيىلعى ىرىكتەۋدىڭ ءبىرىنشى كەزەڭىنە 444 ءوتىنىم كەلىپ ءتۇستى. ولاردىڭ 357-ءسى ساراپتامالىق كەڭەسكە جولداندى. كەڭەس جوبالار تاقىرىبىنىڭ وزەكتىلىگىنە، ستسەناري تۇجىرىمداماسىنا، دراماتۋرگيالىق قۇرىلىمىنا جانە كەيىپكەرلەر بەينەسىنىڭ اشىلۋىنا ەرەكشە نازار اۋداردى. ناتيجەسىندە 128 جوبا ەكىنشى كەزەڭگە ءوتتى. بۇگىن وسى بريفينگ اياسىندا رەسمي تۇردە حابارلايمىن: ماۋسىم ايىندا وتەتىن پيتچينگكە 99 كينو جوبا جولداما الدى»، — دەدى «ۇلتتىق كينونى قولداۋ مەملەكەتتىك ورتالىعى» كەاق باسقارما توراعاسى قۇرمانبەك جۇماعالي.

سونىمەن قاتار، «قازاقفيلم» كينوستۋدياسىندا اۋقىمدى جاڭعىرتۋ جۇمىستارى جۇرگىزىلۋدە. تۇسكەن تابىستىڭ ارتۋى مەن شىعىنداردى وڭتايلاندىرۋ ناتيجەسىندە كينوستۋديا 2024 جىلى سوڭعى جەتى جىلدا العاش رەت ءوزىن-ءوزى قارجىلاندىرۋ دەڭگەيىنە جەتتى. سونداي-اق سوڭعى 15 جىل ىشىندە العاش رەت ستۋديادا كۇردەلى جوندەۋ جۇمىستارى باستالدى.

2024 جىلى «قازاقفيلم» قامقورلىعىمەن «ەۋرازيا» حالىقارالىق كينوفەستيۆالى قايتا جانداندى. مەملەكەت قارجىسى ەسەبىنەن ءتورت ءفيلمنىڭ ءتۇسىرىلىمى اياقتالدى، تاعى ەكى جوبا كوممەرتسيالىق نەگىزدە جۇزەگە استى.

«بولاشاقتا كوممەرتسيالىق باعىتتاعى فيلمدەرگە باسىمدىق بەرىلەدى. پروكاتتان تۇسەتىن كىرىستىڭ 5-10 پايىزى كينوستۋديانىڭ عيماراتتارىن كۇردەلى جوندەۋگە جانە ينجەنەرلىك جەلىلەردى جاڭارتۋعا باعىتتالادى. بۇل — سوڭعى 30 جىلدا العاش رەت ينفراقۇرىلىمعا تۇراقتى ينۆەستيتسيا تارتۋ تەتىگىنىڭ ىسكە قوسىلۋى. كينوستۋديا مادەني مۇرانى ساقتاۋ، مازمۇندى فيلمدەر جاساۋ جانە جاس تالانتتاردى قولداۋ ميسسياسىنا ءاردايىم ادال. سونىمەن قاتار، ءبىز تەحنولوگياعا، ينفراقۇرىلىمعا جانە سەرىكتەستىككە ينۆەستيتسيا سالا وتىرىپ، بولاشاققا سەنىممەن قارايمىز»، — دەدى «قازاقفيلم» كينوستۋدياسىنىڭ پرەزيدەنتى مىندەتىن اتقارۋشى ايدار وماروۆ.

مادەنيەت جانە اقپارات مينيسترلىگىنىڭ ءباسپاسوز قىزمەتى