الماتى جانە جەتىسۋ وبلىستارى بويىنشا قىلمىستىق-اتقارۋ جۇيەسى دەپارتامەنتىنىڭ قىزمەتكەرلەرى ۇلى جەڭىستىڭ 80 جىلدىعىنا وراي سوعىس ارداگەرى الىم كەبيروۆتى قۇتتىقتاپ، ەرەكشە قۇرمەت كورسەتتى. بيىل عاسىردان دا اسىپ، 101 جاسقا تولعان مايدانگەردى ۇلىقتاۋ شاراسى ونىڭ تۋعان جەرى – ۇيعىر اۋدانىندا ۇيىمداستىرىلدى. دەپارتامەنت باسشىلىعى ارداگەردىڭ شاڭىراعىنا ارنايى بارىپ، ەستەلىك سىيلىقتار تابىستاپ، العىسىن ءبىلدىردى. سونداي-اق سوعىس شەجىرەسىندەي قازىنالى قاريا قۇرمەتىنە شاعىن شەرۋ ۇيىمداستىرىلدى. الىم كەبيروۆ 1944 جىلى اسكەر قاتارىنا الىنىپ، 1-بەلارۋس مايدانى قۇرامىندا جاۋعا قارسى شايقاسقان. بەلگورود، كيەۆ پەن لۆوۆ قالالارىن ازات ەتۋگە قاتىسىپ، جاۋىنگەرلىك ەرلىگى ءۇشىن ۇلى وتان سوعىسى وردەنىمەن ماراپاتتالعان. قاج دەپارتامەنتى باستىعىنىڭ ورىنباسارى ماگنيس سابيروۆ ارداگەرلەرگە قۇرمەت كورسەتۋ – ءاربىر قازاقستاندىقتىڭ ازاماتتىق بورىشى ءارى ار الدىنداعى پارىزى ەكەنىن اتاپ ءوتتى. سونىمەن قاتار قاجد قىزمەتكەرلەرى جەڭىس ساربازدارىنا ارنالعان مونۋمەنتكە گۇل شوقتارىن قويىپ، ەرلىك رۋحىنا تاعزىم ەتتى. ءجۇز ءبىر جاستىڭ جۇگىن كوتەرىپ، سوعىستىڭ سۇراپىل كۇندەرىن كوزبەن كورگەن ارداگەردىڭ بۇگىندە تەك ءبىر تىلەگى بار – ەلدە ماڭگىلىك بەيبىتشىلىك ورناسىن.

اقپارات كوزى: Polisia.kz