كۇدىكتىلەر 2022 - 2024 جىلدار ارالىعىندا ۇيىمداسقان قىلمىستىق توپ قۇرىپ، «bingo37.pro» پلاتفورماسى ارقىلى زاڭسىز ويىن بيزنەسىن باسقارعان.
قاتىسۋشىلاردان اقشالاي ءباستى وپەراتورلار بانكتىك اۋدارىم ارقىلى قابىلداعان، سودان كەيىن ولاردى پلاتفورماعا تىركەپ، ويىنعا قاتىسۋ ءۇشىن لوگين، پارول جانە سىلتەمە ۇسىنعان.
قىلمىستىق تابىستى زاڭداستىرۋ ماقساتىندا كۇدىكتىلەر دروپتاردى — كولدەنەڭ ادامداردى تارتىپ، ولاردىڭ اتىنا بانك كارتالارىن راسىمدەگەن. اقشانىڭ قىلمىستىق ءىزىن جاسىرۋ ماقساتىندا وسى كارتالار ارقىلى ولار قوماقتى اقشا سومالارىن قولما-قول اقشاعا اينالدىرىپ وتىرعان.
زاڭسىز ونلاين-كازينونىڭ قىزمەتىنەن كۇن سايىن 150 000 تەڭگەدەن 200 000 تەڭگەگە دەيىن اقشا ءتۇسىپ وتىرعان.
توپتىڭ جالپى قىلمىستىق تابىسى 306 ميلليون تەڭگەدەن اسقان.
قارجىلىق تەرگەۋ بارىسىندا كۇدىكتىلەر زاڭسىز الىنعان اقشاعا جالپى قۇنى 66 ميلليون تەڭگەنى قۇرايتىن «Toyota Land Cruiser» جانە «Lexus EC 250» ماركالى ەكى اۆتوكولىك العانى انىقتالدى. وسى كولىكتەردى تاركىلەۋ مۇمكىندىگىنەن جاسىرۋ ماقساتىندا سەنىمدى ادامداردىڭ اتىنا راسىمدەگەن.
سوتتىڭ سانكتسياسىمەن اتالعان اۆتوكولىكتەرگە تىيىم سالىندى.
ۇيىمداستىرۋشىلارعا قاتىستى سوت كۇزەتپەن ۇستاۋ تۇرىندەگى بۇلتارتپاۋ شاراسىن تاڭدادى.
سوتقا دەيىنگى تەرگەۋ جالعاسۋدا.
قر قپك 201-بابى بويىنشا تەرگەۋ مۇددەسى ءۇشىن باسقا اقپاراتتىڭ تاراتىلۋىنا تىيىم سالىنعان.
قۇرمەتتى ازاماتتار، قارجىلىق مونيتورينگ اگەنتتىگى بانكتىك كارتالار مەن شوتتاردى پايدالانۋ ارقىلى زاڭسىز سحەمالارعا قاتىسقانى ءۇشىن جاۋاپكەرشىلىككە تارتىلۋ قاۋپى بار ەكەنىن ەسكەرتەدى.
كۇماندى قارجىلىق وپەراتسيالارعا قاتىسۋدان ساق بولۋعا شاقىرامىز.
ەگەر سىزگە قاراجات اۋدارعانىڭىز ءۇشىن جەڭىل تابىس ۇسىنسا، بۇل قىلمىستىق سحەمانىڭ بولىگى بولۋى مۇمكىن. مۇنداي جاعدايلاردا بارلىق بايلانىستاردى توقتاتىپ، قۇقىق قورعاۋ ورگاندارىنا حابارلاۋىڭىز قاجەت.
قما ءباسپاسوز قىزمەتى
