قازاقستان رەسپۋبليكاسىنىڭ ۆيتسە-پرەزيدەنتى ەرلان قارين قۇرىلتايداعى ساياسي پارتيالاردىڭ فراكتسيا جەتەكشىلەرىمەن كەزدەسۋ وتكىزدى.

جيىنعا «ادىلەت» پارتياسى فراكتسياسىنىڭ جەتەكشىسى ەربول اداەۆ، «اۋىل» پارتياسى فراكتسياسىنىڭ جەتەكشىسى قايرات ايتۋعانوۆ، «Respublica» پارتياسى فراكتسياسىنىڭ جەتەكشىسى ايداربەك قوجانازاروۆ، «اق جول» پارتياسى فراكتسياسىنىڭ جەتەكشىسى دانيا ەسپاەۆا، جالپىۇلتتىق سوتسيال-دەموكراتيالىق پارتياسى فراكتسياسىنىڭ جەتەكشىسى اسحات راحىمجانوۆ، سونداي-اق پرەزيدەنتتىڭ قۇرىلتايداعى وكىلدىگىنىڭ باسشىسى مۇرات قايىربەك قاتىستى.

ەرلان قارين، ەڭ الدىمەن، قۇرىلتايدىڭ قۇرامى جاڭا تۇلعالارمەن تولىعىپ، ءوز ءىسىن جەتىك بىلەتىن كاسىبي مامانداردان، سونداي-اق ەكونوميكا سەكتورلارى مەن قوعامداعى ءتۇرلى سالا وكىلدەرىنەن قۇرالعانىن ايتتى.

– مەملەكەت باسشىسى قاسىم-جومارت توقاەۆ قۇرىلتايدىڭ العاشقى سەسسياسىنىڭ اشىلۋ سالتاناتىندا سويلەگەن سوزىندە زاڭنامالىق جۇمىستاردىڭ نەگىزگى باعىتتارىن ايقىنداپ، باسىمدىققا يە بىرقاتار زاڭ جوباسىن اتاپ ءوتتى. سونداي-اق پرەزيدەنت جاقىندا قازاقستان حالقىنا كەزەكتى جولداۋىن جاريالايتىنىن مالىمدەدى. كورىپ وتىرعانداي، كۇن ءتارتىبى وتە تىعىز ءارى ۇلكەن ساياسي وقيعالارعا تولى. سونداي-اق وتكەن ۇگىت-ناسيحات ناۋقانى بارىسىندا سايلاۋشىلار تاراپىنان كوتەرىلگەن ماسەلەلەردى بىرلەسە زەردەلەپ، تالداۋعا مۇددەلىمىز. سوندىقتان مازمۇندى ءارى تۇراقتى ديالوگتى ودان ءارى جالعاستىرۋ كەرەك. ءبىز ورتاق ماقساتتار مەن مىندەتتەردى ىسكە اسىرۋ بويىنشا اشىق ءارى سىندارلى ىنتىماقتاستىققا، بىرلەسكەن جۇمىسقا دايىنبىز، – دەدى ەرلان قارين.

فراكتسيا جەتەكشىلەرى پرەزيدەنتتىڭ جەكەلەگەن باستامالارى مەن ساياسي پارتيالاردىڭ سايلاۋالدى باعدارلامالارىن زاڭنامالىق تۇرعىدا ىسكە اسىرۋ جونىندەگى جوسپارلارىمەن ءبولىسىپ، الداعى ۋاقىتتا ءوزارا ءتيىمدى ىقپالداستىق ورناتۋعا سەنىم ءبىلدىردى.

Akorda.kz رەسمي سايتى