اشىلۋ راسىمىنە قر تۋريزم جانە سپورت ءمينيسترى ەربول مىرزابوسىنوۆ، ۇلىتاۋ وبلىسىنىڭ اكىمى داستان رىسبەكوۆ، «قازاقمىس كورپوراتسياسى» جشس باسقارما توراعاسى نۇراحمەت نۋريەۆ قاتىستى.

اتالعان فيليال ەلىمىزدەگى ەڭ ۇلكەن اكادەميا اتانىپ وتىر. عيماراتتىڭ جالپى اۋدانى 900 شارشى مەتر. مۇندا وبلىستىڭ 5-18 جاس ارالىعىنداعى 1000-عا جۋىق جاس شاحماتشى ءبىلىم الادى.

«ۇلت ۇياسى – ۇلىتاۋدا سىزدەرمەن قاۋىشقانىما قۋانىشتىمىن. بارلىعىڭىزدى اكادەميانىڭ اشىلۋىمەن شىن جۇرەكتەن قۇتتىقتايمىن. مەملەكەت باسشىسى سپورت سالاسىنا ەرەكشە كوڭىل بولۋدە. ناتيجەسىندە سپورتشىلارىمىز الەمدىك دودالاردا ارقاشان بيىكتەن كورىنىپ كەلەدى. شاحماتتا ءبىزدىڭ سپورتشىلار الەمدىك دودالاردا وتە جوعارى ناتيجە كورسەتىپ ءجۇر. ەلىمىزدە 8 مىڭنان استام شاحمات ۇيىرمەلەرى جۇمىس ىستەيدى. 270 مىڭنان استام بالا شاحماتپەن اينالىسادى. جانسايانىڭ ءوزى حالىقارالىق گروسسمەيستەر. الەمدىك ارەنادا توپ جارىپ، ءوزىنىڭ سپورتتاعى جولىنان بولەك، بالالاردى سپورتقا باۋلىپ، ولارعا جول اشىپ جاتىر. كەلەشەكتە وسىنداي اكادەميالاردان الەمدىك دودالاردى باعىندىراتىن سپورتشىلاردىڭ ءوسىپ شىعاتىنىنا سەنىمدىمىن»، - دەدى تۋريزم جانە سپورت ءمينيسترى ەربول مىرزابوسىنوۆ.

اشىلۋ سالتاناتىندا ۇلىتاۋ وبلىسىنىڭ اكىمى داستان رىسپەكوۆ وڭىرىمىزدەن تانىمال شاحماتشىلار مەن ەل چەمپيوندارى شىعىپ، ۇلىتاۋ وبلىسىن تەك رەسپۋبليكالىق دەڭگەيدە عانا ەمەس، الەمدىك ارەنادا دا تانىستىراتىنىنا سەنىم ءبىلدىردى.

جەزقازعانداعى شاحمات اكادەمياسى قازاقمىس كورپوراتسياسى مەن ۇلىتاۋ وبلىسى اكىمدىگى اراسىنداعى مەموراندۋم اياسىندا سالىنعان. بۇل ەلىمىزدە سپورت پەن ءبىلىم بەرۋدى دامىتۋ ءۇشىن بيزنەس پەن مەملەكەتتىك ۇيىمدار اراسىندا ىنتىماقتاستىقتىڭ ماڭىزدى ەكەنىن كورسەتەدى.

سونىمەن قاتار، اكادەميانىڭ اشىلۋى اياسىندا «KAZAKHMYS YOUTH TEAM CHESS CUP» اتتى العاشقى حالىقارالىق بالالار كوماندالىق ءتۋرنيرى ۇيىمداستىرىلدى. بۇل جارىسقا قازاقستان، رەسەي، بەلارۋس، قىرعىزستان جانە موڭعوليادان كەلگەن 100-دەن استام جاس شاحماتشى قاتىستى.