پرەمەر-مينيستر ولجاس بەكتەنوۆ ءتيىستى قاۋلىعا قول قويدى.

قاۋلى مەملەكەت باسشىسىنىڭ 2024-2028 جىلدارى اۋىل شارۋاشىلىعى ءونىمىنىڭ جالپى كولەمىن 2 ەسەگە ۇلعايتۋ جانە توپىراققا مينەرالدى تىڭايتقىشتار ەنگىزۋ دەڭگەيىن عىلىمي نەگىزدەلگەن قاجەتتىلىكتىڭ 50%-نا دەيىن ارتتىرۋ جونىندەگى تاپسىرمالارىن جۇزەگە اسىرۋ اياسىندا قابىلداندى.

قۇجات اباي، اقمولا، شىعىس قازاقستان، جامبىل، قاراعاندى، قوستاناي، پاۆلودار، سولتۇستىك قازاقستان جانە تۇركىستان وبلىستارىنىڭ اكىمدىكتەرىنە تىڭايتقىشتاردىڭ قۇنىن سۋبسيديالاۋعا اعىمداعى نىسانالى ترانسفەرتتەر تۇرىندە قاراجات اۋدارۋدى كوزدەيدى.

ءبىرىنشى كەزەكتە، قاراجاتتىڭ نەگىزگى كولەمى مينەرالدى تىڭايتقىشتاردى اۆانستىق سۋبسيديالاۋ تەتىگىن ىسكە اسىرۋعا باعىتتالعان.

وتكەن جىلدىڭ ناۋرىز ايىندا اوك-ءتى قولداۋ شەڭبەرىندە تىڭايتقىشتاردى اۆانستىق سۋبسيديالاۋ تەتىگى ەنگىزىلگەنى بەلگىلى. بۇل رەتتە بيۋدجەتتىك سۋبسيديالار اۋىل شارۋاشىلىعى تاۋارىن وندىرۋشىلەرگە ارزانداتىلعان تىڭايتقىشتاردى جەتكىزۋ ءۇشىن وتاندىق زاۋىتتاردىڭ ارنايى شوتتارىنا الدىن الا اۋدارىلادى.

قابىلدانعان شارالار ەسەبىنەن العاش رەت تىڭايتقىشتاردى قولدانۋ دەڭگەيى عىلىمي نەگىزدەلگەن قاجەتتىلىكتىڭ 40%-نا جەتتى (2024 جىلعا دەيىن 21%-دان اسپاعان).

كوكتەمگى ەگىس جۇمىستارىنا دايىندىق كەزىندە ۇكىمەتتىڭ دەر كەزىندە قارجىلىق قولداۋ كورسەتۋى اۋىل شارۋاشىلىعى تاۋارىن وندىرۋشىلەردى تىڭايتقىشتارمەن ۋاقتىلى قامتاماسىز ەتۋگە، جوعارى ءارى ساپالى ءونىم الۋعا مۇمكىندىك بەرەدى.