بۇل اۋىلدا پرەزيدەنت قاسىم-جومارت كەمەلۇلىنىڭ باستاماسىمەن قولعا الىنعان، اۋىل حالقىنىڭ تۇرمىس-تىرشىلىگىن، ءال-اۋقاتىن جاقسارتۋعا باعىتتالعان «اۋىل اماناتى» باعدارلاماسى تابىستىجۇزەگە اسۋدا.
«اباي داۋلەت» جشس قۇرعان وندىرىستىك الاڭدا اۋىل تۇرعىندارىنىڭ 13 بيزنەس باستاماسى شوعىرلانعان. جارتىلاي فابريكات، پلاستيكالىق ىدىستار، اعاش بۇيىمدار، توقىما، سابىن، كونديتەرلىك ونىمدەر وندىرەتىن تسەحتار بار. وسىمدىك، قۇس، مال شارۋاشىلىعىمەن، قۇرىلىس ونىمدەرىن شىعارۋمەن اينالىساتىن كوپسالالى كومپانيانىڭ وندىرىستىك قۋاتى ارتۋدا.
پرەمەر-مينيستر كەڭەسشىسى «اباي-داۋلەت» جشس باستاماسى «سىر قۇسى» اگروونەركاسىپتىك كووپەراتيۆ جۇمىسىمەن تانىستى.
وندىرىستىك كووپەراتيۆ «اۋىل اماناتى» باعدارلاماسى اياسىندا قۇرىلىپ، 27,6 ملن. تەڭگە جەڭىلدەتىلگەن نەسيە العان. شاعىن قۇس فەرمالارى (پتيچنيك) سالىنعان. ارقايسىندا تاراز قالاسىنان اكەلىنگەن 1500 باس برويلەر بالاپانى (بارلىعى 4500 شوجە) باعىلادى. برويلەردىڭ ەرەكشەلىگى ەتتىلىگىندە، ولار 30-55 كۇندە سويىلادى جانە قىسقا ۋاقىتتا 2,0 -2,5 كگ ەت بەرەدى. «سىر قۇسى» كووپەراتيۆى بىلتىر 29,7 توننا قۇس ەتىن، بيىل 9,6 توننا ءونىم ءوندىردى.
جالپى وڭىردە قۇس شارۋاشىلىعى باعىتىندا ەكى كووپەراتيۆ («سىر قۇسى» اوك، «شيەلى قۇس» اوك) قۇرىلىپ، 4 500 باس قۇس باعاتىن 6 تيپتىك قۇس فەرماسى (پتيچنيك) جۇمىس جاسايدى. وتكەن جىلى وبلىستا 85,3 توننا تاۋىق ەتى وندىرىلسە، ونىڭ 38,3 تونناسى، ياعني 46 پايىزى وسى كووپەراتيۆتەردىڭ ۇلەسىندە. بيىل اتالعان كووپەراتيۆتەر 46 توننا تاۋىق ەتىن ءوندىرىپ، اۋىل تۇرعىندارىنا ءتيىمدى باعامەن ۇسىندى.
ايتا كەتەيىك، «اباي داۋلەت» جشس 2018 جىلدان بەرى اۋىلدى دامىتۋعا 1,5 ملرد تەڭگەدەن استام قارجى ءبولدى. قاراجات 360 ورىندىق مەكتەپ، 120 ورىندىق بالاباقشا جانە دارىگەرلىك امبۋلاتوريا سياقتى الەۋمەتتىك نىسانداردى اباتتاندىرۋعا، كوگالداندىرۋعا، جوندەۋگە باعىتتالدى.
ەرالى توعجانوۆ اۋىل حالقىنىڭ تابىسىن ارتتىرۋ، ەكونوميكاسىن جوعارى كورسەتكىشتەرگە جەتكىزۋ باستى مىندەتتەردىڭ ءبىرى ەكەنىن ايتىپ، سىر وڭىرىندە اتقارىلعان جۇمىستارعا وڭ باعاسىن بەردى. ال، بەسارىق اۋىلىندا «اۋىل اماناتى» باعدارلاماسى بويىنشا جۇزەگە اسىرىلعان جوبالاردى تەك وبلىس كولەمىندە ەمەس، رەسپۋبليكانىڭ بارلىق وڭىرلەرىنە تاراتۋ قاجەتتىگىن ايتتى.
قىزىلوردا وبلىسى اكىمىنىڭ ءباسپاسوز قىزمەتى
