ءىس-شارانىڭ تۇجىرىمداماسى ءىرى حالىقارالىق كومپانيالاردا الەۋەتتى جۇمىسقا ورنالاسۋدى قامتاماسىز ەتۋ ءۇشىن وقىتۋ ساپاسىن، الىنعان داعدىلاردى تەكسەرۋ ماقساتىندا كاسىبي-تەحنيكالىق كوللەدج ستۋدەنتتەرى مەن كاسىپورىندار اراسىنداعى كووپەراتسياعا باعىتتالعان. پرەمەر-مينيستر چەمپيوناتقا قاتىسۋشىلارمەن اڭگىمەلەسۋ بارىسىندا ولاردىڭ العان بىلىمدەرىنىڭ سۇرانىسقا يە ەكەنىن ەرەكشە اتاپ ءوتتى. «پرەزيدەنت جاريالاعان جۇمىسشى ماماندىقتارى جىلى تەحنيكالىق جانە كاسىپتىك ءبىلىم بەرۋدىڭ بۇكىل ەلىمىز ءۇشىن ەرەكشە ماڭىزدىلىعىن كورسەتەدى. ۇكىمەت الدىنا ەكونوميكا قۇرىلىمىن جاڭعىرتۋ بويىنشا ءورشىل مىندەتتەر قويىلدى. ول ءۇشىن بىزگە ەنەرگەتيكا، قۇرىلىسشى، اۋىل شارۋاشىلىعى، كولىك جانە سۋ سالاسىندا بىلىكتى وتاندىق ماماندار قاجەت. بۇل رەتتە تسيفرلىق ترانسفورماتسيا مەن تەحنولوگيالىق پروگرەستىڭ سىن-قاتەرلەرىنە دايىن بولۋ ماڭىزدى. سوندىقتان ءبىزدىڭ ورتاق مىندەتىمىز – قوعامنىڭ بارلىق رەسۋرستارىن بىرىكتىرۋ. بۇل باعىتتا ءبىز جاستارىمىزعا جانە وسىنداي ءىس-شارالارعا جان-جاقتى قولداۋ كورسەتەتىن بولامىز»، — دەپ اتاپ وتكەن ولجاس بەكتەنوۆ قىزىعۋشىلىق تانىتىپ، ستۋدەنتتەردىڭ ءوز داعدىلارىن كورسەتۋى ءۇشىن ارنايى مامانداندىرىلعان ايماقتار قۇرعان كومپانيالارعا العىسىن ءبىلدىردى.
سول جەردە كوللەدج باسشىلىعىمەن كەزدەسۋ ءوتىپ، ونىڭ بارىسىندا ءبىلىم بەرۋ ساپاسىن ارتتىرۋ ماقساتىندا كادرلار دايارلاۋ بويىنشا وزەكتى ماسەلەلەر تالقىلاندى. بيىل چەمپيوناتقا الماتى قۇرىلىس-تەحنيكالىق كوللەدجى، «Astana Polytechnic» جوعارى كوللەدجى، «قازاقمىس» كورپوراتسياسىنىڭ پوليتەحنيكالىق كوللەدجى، اباي وبلىسى ءبىلىم باسقارماسىنىڭ راديوتەحنيكا جانە بايلانىس كوللەدجى، حالەل وزبەكعاليەۆ اتىنداعى ماڭعىستاۋ جوعارى پوليتەحنيكالىق كوللەدجى جانە باسقا دا وقۋ ورىندارىنىڭ ستۋدەنتتەرى قاتىسادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2030 جىلعا دەيىن كادرلارعا جالپى قاجەتتىلىك 1,8 ملن ادامدى قۇرايدى، ونىڭ ىشىندە تەحنيكالىق ءبىلىمى بار 1 ملن-عا جۋىق جۇمىسشى قاجەت. قۇرىلىس، اۋىل شارۋاشىلىعى، وڭدەۋ ونەركاسىبى سالالارىندا ۇلكەن سۇرانىس كۇتىلۋدە. بيىل WorldSkills Kazakhstan ۇلتتىق چەمپيوناتى الاڭدارىندا 555 قاتىسۋشى ەلەكترونيكا، ونەركاسىپتىك اۆتوماتيكا، مەحاترونيكا، ينجەنەرلىك گرافيكا، كونديتەرلىك ءىس، ەلەكتر مونتاجداۋ جۇمىستارى، دانەكەرلەۋ تەحنولوگيالارى، ۆەب-تەحنولوگيالار جانە بيزنەسكە ارنالعان IT-شەشىمدەر، ءسان تەحنولوگيالارى سياقتى 30 قۇزىرەتتىلىك بويىنشا ءوز داعدىلارىن كورسەتپەك. مەملەكەت باسشىسىنىڭ تاپسىرماسى بويىنشا جۇمىسشى ماماندىقتارى ءۇشىن كادر دايارلاۋ ساپاسىن ارتتىرۋعا ەرەكشە كوڭىل ءبولىنىپ وتىر. 2024 جىلى بيۋدجەت ەسەبىنەن كوللەدجدەرگە 142,5 مىڭ ستۋدەنت قابىلداندى – بۇل 2023 جىلمەن سالىستىرعاندا 1,5 ەسەگە كوپ. دۋالدى ءبىلىم بەرۋ جۇيەسى ەنگىزىلىپ، ونىڭ شەڭبەرىندە 496 كوللەدج جانە 7 مىڭنان استام كاسىپورىنمەن 75 مىڭ ستۋدەنتتى دايارلاۋ بويىنشا كەلىسىمشارتتار جاسالدى. 1 قىركۇيەكتەن باستاپ كوللەدج ستۋدەنتتەرىنىڭ شاكىراقىسى وتكەن جىلمەن سالىستىرعاندا 50%-عا ارتتى. سونىمەن قاتار بيىلدىڭ وزىندە تجكب ءۇشىن 2 103 ورىنعا ارنالعان 8 جاتاقحانا سالۋ جوباسى ىسكە اسىرىلۋدا.
مەملەكەت باسشىسىنىڭ جۇمىسشى ماماندىقتارى جىلى بويىنشا قويعان مىندەتتەرىن ىسكە اسىرۋ شەڭبەرىندە وتكەن جارىستا قاتىسۋشىلارمەن اڭگىمەلەسۋ قورىتىندىسى بويىنشا پرەمەر-مينيستر وقۋ-اعارتۋ مينيسترىنە استانا قالاسىنىڭ اكىمدىگىمەن بىرلەسىپ تجكب ستۋدەنتتەرىن قولداۋ جانە دامىتۋ ءۇشىن ۇلتتىق قۇزىرەتتەر ورتالىعىن قۇرۋدى تاپسىردى. ورتالىق بيزنەس ءۇشىن ديالوگ الاڭى جانە كادرلاردى دايارلاۋ جۇيەسى ءرولىن اتقارادى، سونداي-اق حالىقارالىق كاسىبي شەبەرلىك كونكۋرستارىنا قاتىسۋ ءۇشىن جاتتىعۋ بازاسىنا اينالادى.
