«تۇركيا قازاقتارى» دەپ اتالاتىن انادولىداعى الاشتىڭ التىن ايدارلى، ارداقتى بالاسى قازاقتار ىرگەلى جۇرت قۇراپ، بۇگىندە تۇرىك باۋىرلارىمەن قويان-قولتىق عۇمىر كەشۋدە.

جۋرناليست-جازۋشى گۇلجاز كارىبەكتىڭ مالىمەتىنشە، 1930 جىلدارى شىعىس تۇركىستاننىڭ التاي، باركول، ساۋان، گاسكول ايماقتارىنان ۇدەرە كوشىپ، الدىمەن گانسۋ، شىنقايعا ات سۋىتىپ، سوسىن گيمالاي مەن تاقلاماقان ءشولىن كەسىپ ءوتىپ، ءۇندىستان مەن پاكىستان ارقىلى تۇركياعا تۇياعى ىلىككەن اتالارىمىزدىڭ ۇزىن-سانى قازىر 25 مىڭنان اسىپ جىعىلادى.

«تۇركياداعى باس كونسۋل تەمىرلان سايلاۋۇلى: «بۇگىنگى تاڭدا تۇركيانىڭ قۇزىرەت ورگاندارىنىڭ حابارلاۋى بويىنشا، ءبىلىم الۋعا كەلگەن ستۋدەنتتەردىڭ سانى – 2 900. ال جالپى تۇركيادا تۇرىپ جاتقان قازاقتاردىڭ سانى 25 مىڭعا جۋىق» دەدى ارنايى سۇراعانىمىزدا. بەيرەسمي دەرەكتەرگە سۇيەنسەك، كەلىپ-كەتىپ جۇرگەن قازاقتار سانى جيىرما مىڭنىڭ ۇستىندە. دەمەك، تۇركيادا 50 مىڭعا جۋىق قازاق تۇرىپ جاتىر»، - دەگەن ەدى  گۇلجاز كارىبەك.