مەملەكەت باسشىسى باستاماشى بولعان «تازا قازاقستان» ەكولوگيالىق اكتسياسى اياسىنداعى جۇمىستار مارتوك اۋدانىندا جۇيەلى جالعاسىپ كەلەدى. سونىڭ جارقىن مىسالى — مارتوك اۋىلىنداعى «دوستىق» ساياباعىندا جۇزەگە اسقان كوگالداندىرۋ جۇمىستارى.
بىلتىر اۋداندىق ورمان شارۋاشىلىعىندا ءوسىپ تۇرعان اعاشتار ارنايى قازىلىپ الىنىپ، ساياباق اۋماعىنا قايتا وتىرعىزىلعان بولاتىن. مامانداردىڭ ايتۋىنشا، مۇنداي ءتاسىل جاسىل جەلەكتى ساقتاپ قانا قويماي، ەلدى مەكەندەردى قىسقا مەرزىمدە كوگالداندىرۋعا مۇمكىندىك بەرەدى.
بۇگىندە ساياباققا ەگىلگەن جاسىل جەلەكتەر جاڭا ورتاعا جەرسىنىپ، جايقالىپ ءوسىپ كەلەدى. كوكتەمگى كۇتىم جۇمىستارىنىڭ ناتيجەسىندە جاسىل جەلەك ساياباقتىڭ اجارىن اشىپ، تۇرعىنداردىڭ سۇيىكتى دەمالىس ورنىنا اينالا ءتۇستى.
اۋىل تۇرعىندارى دا بۇل باستامانىڭ ماڭىزىن ەرەكشە اتاپ وتۋدە. سەبەبى ەكولوگيالىق مادەنيەتتى قالىپتاستىرۋ مەن تابيعاتتى ايالاۋ — بارشاعا ورتاق مىندەت. ال «دوستىق» ساياباعىنداعى جاسىل ايماق — تابيعاتقا جاناشىرلىقتىڭ ناقتى كورىنىسى.
مارتوك اۋىلدىق وكرۋگىنىڭ اكىمى اسلان ايتماعامبەتوۆتىڭ ايتۋىنشا، اكىمدىك اعاش وتىرعىزۋمەن قاتار، ولاردى كۇتىپ-باپتاپ، تۇراقتى سۋارۋعا دا كوڭىل ءبولىپ ءجۇر.
«تازا قازاقستان» اكتسياسى اياسىنداعى مۇنداي يگى ىستەر الداعى ۋاقىتتا دا جالعاسىن تابادى.
