مادەنيەت وشاعىنىڭ لەنتاسى ۇلى جەڭىستىڭ 80 جىلدىعى مەن باۋىرجان مومىشۇلىنىڭ 115 جىلدىعىنا وراي سالتاناتتى تۇردە قيىلدى.
اشىلۋ راسىمىنە جامبىل وبلىسىنىڭ اكىمى ەربول قاراشوكەەۆ، ۇلى وتان سوعىسىنىڭ ارداگەرلەرى مەن تىل ەڭبەككەرلەرى، قر پارلامەنتى ءماجىلىسىنىڭ دەپۋتاتتارى جانە ءوڭىر تۇرعىندارى قاتىستى. قوناقتار مۇراجايدى ارالاپ، تاۋ تۇلعانىڭ ءومىر جولى مەن قاھارماندىق بەينەسىن، سونداي-اق سوعىس جىلدارىنداعى ەرلىك شەجىرەسىن تاماشالادى.
كورمەگە باۋىرجان مومىشۇلىنىڭ بالالىق شاعى، اسكەري قىزمەتى، وتباسى جايلى تىڭ دەرەكتەر، سونداي-اق جەكە زاتتارى مەن قۇجاتتارى قويىلعان.
ەكسپوزيتسيادا پولكوۆنيك شەنىندەگى شينەلى، باتىردىڭ ءوزى سىزعان اسكەري كارتا، سونداي-اق «ۇشقان ۇيا» مەن «ارتىمىزدا ماسكەۋ» شىعارمالارىن جازعان قالامى مەن سياساۋىتى دا كورەرمەن نازارىنا ۇسىنىلدى.
جامبىل وبلىستىق تاريحي-ولكەتانۋ مۇراجايىنا باتىردىڭ ءوزى تارتۋ ەتكەن جەكە ماۋزەرى، كەڭەس وداعىنىڭ باتىرى التىن جۇلدىزى مەن لەنين وردەنىنىڭ كوشىرمەلەرى، ايداھار بەينەلەنگەن قىلىشى، سونداي-اق سيرەك كىتاپتارى مەن فوتوسۋرەتتەرى دە قويىلعان.
سونىمەن قاتار بەيبىت كۇندەرى كيگەن كيىمدەرى مەن ىدىس-اياقتارى – كۇمىس قاسىقتار، اعاش توستاعاندار، قىمىز ءشومىشى، شاي ىشەتىن ىدىستار مەن دومبىراسى كورمەگە ەرەكشە مازمۇن بەرىپ تۇر. باتىردىڭ ءوزى ويعان ورنەكتەردەن تۇراتىن البوم، قۇرمەت گراموتاسى، كەڭەس وداعىنىڭ باتىرى اتاعىن بەرۋ تۋرالى جارلىق پەن وزگە دە ماراپاتتاۋ قۇجاتتارى دا ەكسپوزيتسيادان ورىن العان.
كورمەنىڭ بىرەگەي جادىگەرلەرىنىڭ ءبىرى – باۋىرجان مومىشۇلى قىزىل ارميا قاتارىنا العاش شاقىرىلعان 1932 جىلى جانە زاپاسقا شىعىپ، ەلگە ورالعان 1956 جىلى وزىمەن بىرگە بولعان چەمودان مەن سوعىس كەزىندەگى باتالون، پولك، ديۆيزيانىڭ قۇپيا قۇجاتتارى ساقتالعان تەمىر سەيف.
سونداي-اق كورمەدەن باتىر كيگەن شينەل، ەتىك، پاپاحا، ماۋزەر قارۋى جانە شىعارماشىلىققا بەت بۇرعان كەزەڭىندەگى 70-تەن استام قولونەر تۋىندىلارى – ويۋلانعان فيگۋرالار ۇسىنىلعان.
تۇپنۇسقادا تاحاۋي احتانوۆ پەن ءابدىلدا تاجىباەۆ سەكىلدى قازاق ادەبيەتىنىڭ كورنەكتى وكىلدەرى وتىرعان ۇستەلى، باتىردىڭ سوعىس جىلدارىنان بەرى قاسىندا بولعان ۇستەل شامى، كومپاسى، ساعاتى مەن فورتەپيانوسى دا كەلۋشىلەردىڭ ەرەكشە قىزىعۋشىلىعىن تۋدىرۋدا.
