بيىل ول ەرەكشە فورماتتا ۇيىمداستىرىلدى. ءبىلىم بەرۋ سالاسى قىزمەتكەرلەرىن ءداستۇرلى ماراپاتتاۋمەن قاتار، العاش رەت جۇمىسشى ماماندىقتارىنىڭ وكىلدەرىنە دە قۇرمەت كورسەتىلدى.
بۇل جاڭاشىلدىق مەملەكەت باسشىسىنىڭ باستاماسىمەن جاريالانعان جۇمىسشى ماماندىقتارى جىلى اياسىندا جۇزەگە اسىرىلىپ، تەك پەداگوگ ەڭبەگىنىڭ عانا ەمەس، سونداي-اق ءبىلىم بەرۋ مەن بالالاردىڭ يگىلىگىنە ۇلەس قوساتىن بارلىق مامانداردىڭ ماڭىزىن ايقىنداۋدى ماقسات ەتتى.
كەڭەستىڭ ەكىنشى بولىمىندە وقۋ-اعارتۋ ءمينيسترى عاني بەيسەمباەۆ ۇزدىك ءبىلىم بەرۋ قىزمەتكەرلەرىنە، سونداي-اق جۇمىسشى ماماندىقتارىنىڭ وكىلدەرىنە جانە ءبىلىم سالاسىمەن ءوزارا بايلانىستاعى ۇيىمداردىڭ قىزمەتكەرلەرىنە ماراپاتتار تابىستادى. ماراپات يەلەرىنىڭ قاتارىندا مەكتەپتەر مەن بالاباقشالاردىڭ تەحنيكالىق قىزمەتكەرلەرى، سونداي-اق پوليتسەيلەر، مەديتسينا قىزمەتكەرلەرى، قۇرىلىسشىلار جانە باسقا دا ماماندار بار.
«ءبىلىم بەرۋ سالاسى – ءبىز بارلىق بالالارىمىزدى تاربيەلەيتىن ورتا. اركىم ەلىمىزدىڭ بولاشاعىن تاربيەلى، كاسىبي قۇزىرەتتى ەتۋگە ءوز ۇلەسىن قوسۋى ءتيىس. بۇل – تەك پەداگوگ قاۋىمنىڭ عانا ەمەس، بۇكىل قوعامنىڭ مىندەتى»، – دەپ اتاپ ءوتتى ءوز سوزىندە مينيستر عاني بەيسەمباەۆ.
سونىمەن بىرگە، ايرىقشا تابىسقا جەتكەن جانە باسقارۋدا جوعارى شەبەرلىك كورسەتكەن ءبىلىم بەرۋ ۇيىمدارىنىڭ باسشىلارى ۆەدومستۆولىق ماراپاتتارعا يە بولدى.
وقۋ-اعارتۋ مينيسترلىگىنىڭ ءباسپاسوز قىزمەتى
