الماتى قالاسىنداعى ءابىلحان قاستەەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيىندە قازاق بەينەلەۋ ونەرىنىڭ كورنەكتى وكىلى، جەرلەسىمىز، قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ لاۋرەاتى اعىمسالى دۇزەلحانوۆتىڭ 75 جىلدىعىنا ارنالعان تاعىلىمدى كورمە ءوتتى.
1951 جىلى قازالى قالاسىندا دۇنيەگە كەلگەن اعىمسالى دۇزەلحانوۆ ۇلتتىق بەينەلەۋ ونەرىنىڭ دامۋىنا ولشەۋسىز ۇلەس قوسىپ، قازاق رۋحانياتىندا وزىندىك قولتاڭباسىن قالدىرعان بىرەگەي سۋرەتشى بولدى. كەسكىندەمە، گرافيكا جانە كىتاپ يلليۋستراتسياسى سالالارىندا جەمىستى ەڭبەك ەتىپ، تاريحي-فولكلورلىق تاقىرىپتاعى شىعارمالارى ارقىلى ۇلتتىق ونەردىڭ ءورىسىن كەڭەيتتى. سونداي-اق تالاي جىل ۇستازدىق ەتىپ، جاس بۋىنعا ونەردىڭ قىر-سىرىن ۇيرەتىپ، كاسىبي جول سىلتەدى.
سۋرەتشىنىڭ 75 جىلدىعىنا ارنالعان كورمەگە اۋدان اكىمى الماسبەك ەسماحانوۆ ارنايى قاتىسىپ، ءسوز سويلەدى. كورمە بارىسىندا قىزىلوردا وبلىسىنىڭ اكىمى ەرگەشباەۆ مۇرات نالقوجاۇلىنىڭ اعىمسالى دۇزەلحانوۆتىڭ وتباسى مەن ونەرسۇيەر قاۋىمعا ارنالعان ارنايى قۇتتىقتاۋ حاتىن جەتكىزدى.
سونداي-اق اۋدان اكىمى ءابىلحان قاستەەۆ اتىنداعى ونەر مۋزەيىنە ەستەلىك سىيلىق تابىستادى.
تاعىلىمدى شاراعا قازاقستاننىڭ مەملەكەت جانە قوعام قايراتكەرى قۋانىش سۇلتانوۆ، جازۋشى بەكسۇلتان نۇرجەكەەۆ، اشىربەك كوپىشەۆ، زيالى قاۋىم وكىلدەرى، ونەر سالاسىنىڭ ماماندارى مەن ستۋدەنت جاستار قاتىستى.
كورمەدە جەرلەسىمىزدىڭ شىعارماشىلىق مۇراسى كەڭىنەن تانىستىرىلىپ، سۋرەتشىنىڭ ۇلتتىق ونەردەگى ايرىقشا ورنىنا ءمان بەرىلدى.
شارا بارىسىندا قازالىلىقتار اتىنان بەلگىلى جۋرناليست-جازۋشى، اقپاراتتانۋ اكادەمياسىنىڭ اكادەميگى ەرمەك زاڭگىروۆ باستاعان جەرلەستەر اعىمسالى دۇزەلحانوۆتىڭ جارى، قازاقتىڭ تۇڭعىش كاسىبي سۋرەتشىسى ءابىلحان قاستەەۆتىڭ قىزى گۇلداريا قاستەەۆاعا زاماناۋي ۇلگىدەگى شاپان جاۋىپ، قازاقى داستۇرمەن قۇرمەت كورسەتتى. ال قازالى اۋدانىنىڭ قۇرمەتتى ازاماتى، جازۋشى مولداحمەت قانازوۆ سۋرەتشىنىڭ جۇبايىنا كامزول كيگىزىپ، اق جاۋلىق تارتۋ ەتتى.
كەش سوڭىندا ءونر شەبەرلەرىنىڭ كونتسەرتى ۇيىمداستىرىلىپ، كورەرمەندەر سۋرەتشىنىڭ شىعارمالارىنان سىر شەرتەتىن كورمەنى تاماشالادى.
اعىمسالى دۇزەلحانوۆتىڭ عيبراتتى عۇمىرى مەن مول شىعارماشىلىق مۇراسى – قازاق ونەرىنىڭ التىن قورىندا ماڭگى ساقتالاتىن قۇندى قازىنا. جەرلەسىمىزدىڭ ەسىمىن ۇلىقتاپ، ونەگەلى جولىن كەيىنگى ۇرپاققا ناسيحاتتاۋ – ەلدىك پارىز.
