بۇگىن گەرمانيا استاناسى بەرلين قالاسىندا رەسپۋبليكا كۇنىنە وراي سىر ەلىنىڭ ونەر شەبەرلەرى مەرەكەلىك كونتسەرت قويدى. وعان قازاقستاننىڭ گەرمانياداعى ەلشىسى نۇرلان ونجانوۆ، ەلشىلىكتىڭ، قازاق دياسپوراسىنىڭ وكىلدەرى، ديپلوماتيالىق كورپۋس مۇشەلەرى، سونداي-اق بەرليندە تۇراتىن وتانداستارىمىز بەن جەرگىلىكتى مادەنيەت جاناشىرلارى قاتىستى.
قىزىلوردا وبلىسى اكىمدىگىنىڭ قولداۋىمەن ۇيىمداستىرىلعان مادەني شارانىڭ ماقساتى – قازاق حالقىنىڭ باي رۋحاني مۇراسىن، ۇلتتىق ونەرى مەن مادەني قۇندىلىقتارىن حالىقارالىق دەڭگەيدە تانىستىرىپ، سىر ءوڭىرىنىڭ ونەرىن شەتەلدىك كورەرمەنگە ناسيحاتتاۋ.
شىعارماشىلىق دەلەگاتسيا بەرلين تورىندە ۇلتتىق ونەرىمىزدى ۇلىقتاپ، قازاق مادەنيەتىنىڭ بايلىعى مەن وزىندىك بولمىسىن تانىتتى. كونتسەرتتە «اقمەشىت» فولكلورلىق ءانسامبلى، مادەنيەت سالاسىنىڭ ۇزدىكتەرى سەرىك جاقسىعۇلوۆ، مارات سۇگىرباي، حالىقارالىق جانە رەسپۋبليكالىق كونكۋرستاردىڭ لاۋرەاتتارى ايدوس شاداەۆ، گۇلناز ناعاشىباي، رينات ۇسەنوۆ، ارۋجان تورەعالي جانە رانو سابانكۋلوۆا ونەر كورسەتتى. ال «توميريس» بي ءانسامبلى ۇلتتىق حورەوگرافيانىڭ وزىق ۇلگىلەرىن ۇسىنىپ، كەشتىڭ كوركىن اشا ءتۇستى.
كونتسەرت شىمىلدىعى قازاق حالقىنىڭ رۋحاني مۇراسىنىڭ سيمۆولىنا اينالعان قورقىتتىڭ كۇيىمەن اشىلدى. كەش باعدارلاماسىنا جىراۋلىق ونەردىڭ جاۋھارلارى، حالىق اندەرى، ءان-ايتىس ۇلگىلەرى مەن پاتريوتتىق اندەر ارقاۋ بولدى. ۇلتتىق ونەردىڭ سان قىرىن تانىتقان مازمۇندى باعدارلاما حالقىمىزدىڭ عاسىرلار بويى جالعاسىپ كەلە جاتقان ونەر ساباقتاستىعىن ايشىقتادى.
مادەني شارا اياسىندا قوناقتارعا قازاقتىڭ ۇلتتىق تاعامدارى ۇسىنىلىپ، حالقىمىزدىڭ قوناقجاي ءداستۇرى مەن داستارحان مادەنيەتى دە تانىستىرىلدى. بۇل كەلۋشىلەردىڭ قازاق حالقىنىڭ سالت-ءداستۇرى مەن ۇلتتىق قۇندىلىقتارىنا دەگەن قىزىعۋشىلىعىن ارتتىرا ءتۇستى.
سىر ونەرپازدارىنىڭ ساپارى – ۇلتتىق مادەنيەتىمىزدى حالىقارالىق كەڭىستىكتە دارىپتەۋگە، شىعارماشىلىق بايلانىستاردى نىعايتۋعا جانە قازاقستاننىڭ مادەني الەۋەتىن تانىتۋعا باعىتتالعان ماڭىزدى قادام. قازاقتىڭ ءانى مەن كۇيىن شەتەل تورىندە اۋەلەتكەن ونەر يەلەرى سىر ەلىنىڭ رۋحاني بايلىعىن پاش ەتىپ، ۇلتتىق ونەرىمىزدىڭ ومىرشەڭدىگىن تاعى ءبىر مارتە دالەلدەدى. ونەرپازدار بەرليندىك كورەرمەننىڭ ىستىق ىقىلاسى مەن زور قوشەمەتىنە بولەندى.
@قىزىلوردا وبلىسى اكىمىنىڭ ءباسپاسوز قىزمەتى
