بۇگىن قىزىلوردا وبلىسىندا «قۇزىرەتتىلىك ورتالىعىندا» سپورت كۇنىنە ارنالعان سالتاناتتى شارا ءوتتى. وعان وبلىس اكىمى مۇرات ەرگەشباەۆ، وبلىستىق ءماسليحات توراعاسى مۇرات تلەۋمبەتوۆ، زيالى قاۋىم وكىلدەرى مەن سپورت سالاسىنىڭ ارداگەرلەرى قاتىستى.
ايماق باسشىسى سالانى دامىتۋدا اتقارىلىپ جاتقان جۇمىستارعا توقتالىپ، سپورتشىلاردىڭ جەتىستىكتەرىنە جوعارى باعاسىن بەردى.
«بارشاڭىزدى سپورت كۇنىمەن شىن جۇرەكتەن قۇتتىقتايمىن! سپورت – ەرىك-جىگەردىڭ مەكتەبى، مىنەزدى شىڭدايتىن الاڭ، ۇلت رۋحىن كوتەرەتىن كۇش.
مەملەكەت باسشىسى قاسىم-جومارت كەمەلۇلى: «قازاقستان – سپورت دەرجاۆاسى بولۋعا ءتيىس. سول ءۇشىن ءبىز ماڭىزدى سپورت نىساندارىن سالىپ جاتىرمىز. حالىقتىڭ سپورتقا دەگەن قىزىعۋشىلىعىن ارتتىرۋ – ءبىزدىڭ ورتاق مىندەتىمىز» - دەپ اتاپ وتكەن بولاتىن.
سىر سپورتىنداعى بايىپتى باستامالارىمىز بەن ومىرشەڭ جوبالارىمىز رەسپۋبليكا اۋماعىندا ۇلگى رەتىندە قولدانىلۋدا. ءبىزدىڭ ورتاق جەتىستىگىمىز بارشامىزعا زور جاۋاپكەرشىلىك جۇكتەيدى.
سىر ءوڭىرىنىڭ سپورتشىلارى الەمدىك دودالار مەن
ەل بىرىنشىلىكتەرىندە ءاردايىم جەڭىس تۇعىرىنان كورىنىپ، ەلىمىزدىڭ اتىن الەمگە تانىتۋدا.
حالىقارالىق ارەنادا كوك تۋىمىزدى كوككە كوتەرگەن سىربويىلىق سپورتشىلار جىل باسىنان بەرى الەم، ازيا چەمپيوناتتارىنان 31 التىن، 16 كۇمىس، 22 قولا مەدال جەڭىپ الدى. ال ەل بىرىنشىلىكتەرىندە 120 التىن، 100 كۇمىس، 162 قولا مەدالعا قول جەتكىزدى.
وتكەن ايدا قىتايدىڭ حانچجوۋ قالاسىندا وتكەن ۆولەيبولدى وتىرىپ ويناۋدان الەم چەمپيوناتىندا ۇلتتىق قۇراما وكىلدەرى قولا جۇلدەگە يە بولدى. ۇلتتىق قۇراما ساپىندا جەرلەستەرىمىز ەريك قاسقاباەۆ، شىڭعىس مەدەۋوۆ، ەراسىل ابدىبەك ونەر كورسەتىپ، ەل نامىسىن ابىرويمەن قورعادى. شىڭعىس مەدەۋوۆ الەم چەمپيوناتىنىڭ «ۇزدىك ويىنشىسى» اتاندى.
وتكەن اپتادا گەرمانيانىڭ دورتمۋند قالاسىندا وتكەن گرەك-ريم كۇرەسىنەن حالىقارالىق تۋرنيردە سىر ماقتانىشى ايدوس سۇلتانعالي جەڭىمپاز اتانىپ، ەل مەرەيىن ۇستەم ەتتى.
كۇنى كەشە عانا ءوزىمىزدىڭ «قايسار» فۋتبول كومانداسى قازاقستان كۋبوگىنىڭ جارتىلاي فينالىندا استانالىق «جەڭىس» كومانداسىن جەڭىپ، فينالعا جولداما الدى. بۇل جەتىستىكتەر - مەملەكەت تاراپىنان جاسالىپ جاتقان قولداۋلار مەن سىزدەردىڭ تىنىمسىز ەڭبەكتەرىڭىزدىڭ جەمىسى»، - دەدى مۇرات نالقوجاۇلى.
سالتاناتتى شارادا ۆولەيبولدى وتىرىپ ويناۋدان الەم چەمپيوناتىندا قولا جۇلدە العان ۇلتتىق قۇراما ساپىنداعى سىر سپورتشىلارىنا ايماق باسشىسى 1 ملن تەڭگە قارجىلاي سەرتيفيكات تابىستادى.
سونداي-اق، سپورت سالاسىنىڭ دامۋىنا سۇبەلى ۇلەس قوسقان ازاماتتار وبلىستىڭ قۇرمەت گراموتاسىمەن، «قىزىلوردا وبلىسىنىڭ دامۋىنا قوسقان ۇلەسى ءۇشىن» توسبەلگىسىمەن، وبلىس اكىمىنىڭ العىس حاتىمەن، تۋريزم جانە سپورت مينيسترلىگىنىڭ «دەنە شىنىقتىرۋ مەن سپورتتى دامىتۋعا سىڭىرگەن ەڭبەگى ءۇشىن»، «سپورت سالاسىنىڭ ۇزدىگى» توسبەلگىسىمەن، قۇرمەت گراموتاسىمەن، ءمينيستردىڭ العىس حاتىمەن ماراپاتتالدى.
ايتا كەتەيىك، سوڭعى ءتورت جىلدا سىر وڭىرىندە پرەزيدەنتىمىزدىڭ، ۇكىمەتتىڭ ەرەكشە قولداۋىمەن، سول كەزدەگى ايماق باسشىسى نۇرلىبەك ماشبەكۇلىنىڭ باستاماسىمەن 11 مىڭ ورىندىق «Kaysar Arena» ستاديونى، تەننيس، ينكليۋزيۆتى سپورت ورتالىقتارى جانە 24 جاڭا سپورت نىسانى پايدالانۋعا بەرىلدى.
قالانىڭ ساۋلەتتىك كەلبەتىنە كورىك بەرگەن جاڭا ستاديونعا ۋەفا-نىڭ 4- ساناتتاعى جوعارى مارتەبەسى بەرىلىپ، رەسپۋبليكالىق جانە حالىقارالىق فۋتبول ويىندارىن وتكىزۋگە مۇمكىندىك الدى.
وبلىس ورتالىعىندا اۋماعى 25 مىڭ شارشى مەتر «قىزىلوردا ارەنا» كوپبەيىندى سپورت كەشەنىنىڭ قۇرىلىسى جۇرگىزىلۋدە. نىسان جىل سوڭىنا دەيىن ەل يگىلىگىنە بەرىلەدى دەپ جوسپارلانۋدا.
بۇگىندە ايماعىمىزدا 388 مىڭنان استام تۇرعىن
بۇقارالىق سپورتپەن جۇيەلى شۇعىلدانادى. سپورت رەزەرۆى مەن جوعارى دارەجەلى سپورتشىلاردى دايارلايتىن 33 سپورت مەكتەبىندە 22 مىڭنان استام شاكىرت كاسىبي باعىتتا تاربيەلەنەدى.
قىزىلوردا وبلىسى اكىمىنىڭ ءباسپاسوز قىزمەتى
