كونگرەسسمەن، بيۋدجەت جانە سالىق كوميتەتىنىڭ مۇشەسى، «قازاقستان – اقش» كوكۋسىنىڭ تەڭ توراعاسى دجيممي پانەتتامەن كەلىسسوزدەر بارىسىندا تاراپتار ەكىجاقتى ساۋدا مەن ەكونوميكالىق ىنتىماقتاستىقتى دامىتۋ ماسەلەسىن تالقىلادى.
سەرىك جۇمانعارين كونگرەسسمەنگە دجەكسون-ۆەنيك تۇزەتۋىنىڭ كۇشىن جويۋ تۋرالى ماسەلەنى ىلگەرىلەتۋدە قازاقستاندى قولداعانى ءۇشىن العىس ءبىلدىرىپ، بۇل ماسەلەنى اقش كونگرەسىندە تەزىرەك رەتتەۋگە ءۇمىت ءبىلدىردى.
ۆيتسە-پرەمەر قازاقستان ينۆەستيتسياعا جانە بيزنەس جۇرگىزۋگە تۇراقتى جانە ادەتتەگىدەي الاڭ بولىپ قالا بەرەتىنىن اتاپ ءوتتى. ول قىركۇيەكتە نيۋ-يوركتە قازاقستان پرەزيدەنتى امەريكالىق بيزنەسپەن باستاعان ديالوگتى جالعاستىرۋ شەڭبەرىندە اقش ساۋدا پالاتاسىنىڭ وكىلدەرىمەن كەزدەسۋلەر تۋرالى حاباردار ەتتى. قازاقستاندا امەريكالىق ۋنيۆەرسيتەتتەردىڭ قاتىسۋىن كەڭەيتۋ ماسەلەسىنە ەرەكشە نازار اۋدارىلدى. بۇگىندە قازاقستاندا 30-عا جۋىق شەتەلدىك جوعارى وقۋ ورنى بار. ونىڭ ەكەۋى – امەريكالىق. ەلىمىز الەمنىڭ جەتەكشى ءبىلىم بەرۋ ورتالىقتارىمەن ارىپتەستىككە ءاردايىم دايىن.
پرەزيدەنت اكىمشىلىگى باسشىسىنىڭ ورىنباسارى ەربولات دوساەۆپەن بىرگە سەرىك جۇمانعارين كونگرەسسمەن كەرول دەۆاين ميللەرمەن دە كەزدەستى. تاراپتار قازاقستان مەن اقش اراسىنداعى، ونىڭ ىشىندە ەنەرگەتيكا، جاساندى ينتەللەكت، تسيفرلاندىرۋ جانە باسقا دا سالاداعى ەكونوميكالىق قاتىناستاردى دامىتۋدىڭ ماڭىزىنا باسا نازار اۋداردى. ەربولات دوساەۆ قازاقستاننىڭ جاڭا تەحنولوگيالىق ەكونوميكانى قالىپتاستىرۋ جانە اقش-تىڭ ورتالىق ازياداعى باستى ارىپتەسى رەتىندەگى ءرولىن نىعايتۋ جونىندەگى كوزقاراسىن ءبىلدىردى.
كەرول ميللەر ىنتىماقتاستىقتى دامىتۋدىڭ بولاشاق ۇرپاق ءۇشىن ماڭىزدىلىعىن اتاپ ءوتىپ، ونى ودان ءارى نىعايتۋعا كومەكتەسۋگە دايىن ەكەنىن جەتكىزدى.
سونداي-اق قازاقستاننىڭ ۆيتسە-پرەمەرى بيۋدجەت جانە سالىق كوميتەتىنىڭ مۇشەسى، كونگرەسسمەن توماس سۋوززيمەن كەزدەسۋدە دجەكسون-ۆەنيك تۇزەتۋىن جويۋ تۋرالى ماسەلەنى تالقىلادى. ايتا كەتۋ كەرەك، كەزدەسۋلەردە بارلىق كونگرەسسمەندەر قازاقستانعا وسى باعىتتا قولداۋ كورسەتۋگە دايىن ەكەندىكتەرىن راستادى.
«ءبىز ساپارىمىزدى مەملەكەت باسشىسىنىڭ نيۋ-يوركتە باستاعان ديالوگىنىڭ جالعاسى رەتىندە قاراستىرامىز جانە بۇل كەزدەسۋلەر قازاقستان مەن امەريكا قۇراما شتاتتارى اراسىنداعى ىنتىماقتاستىققا جاڭا سەرپىن بەرەتىنىنە سەنىمدىمىز»، — دەپ اتاپ ءوتتى سەرىك جۇمانعارين.
