اسىرەسە، جازعى دەمالىستا تاڭعى ءشاي ۇستىندە اعايىن – تۋىس پەن دوس-جارانداردىڭ يگى امالدارى مەن جاقسى قاسيەتتەرىن ءجيى ەسكە الىپ وتىراتىن. كەيدە ويلايمىن، مارقۇمدار جاقسى ادامدار تۋرالى ءبىلىپ ءجۇرسىن، كەيىن ومىرلىك قۇندىلىق رەتىندە دۇرىس امالدارىن بويعا ءسىڭىرسىن دەگەن ىزگى نيەتكە امال ەتكەن ەكەن. ءبىز بالالىقپەن قاتتى ءمان بەرمەپپىز. بىراق، داستارحان باسىندا ۇلكەن ادامدارشا قۇلاق اسىپ، تىڭدايتىنبىز. مىنە، ءبىزدىڭ اۋلەتىمىز ءۇشىن – جاقسى ادامداردىڭ ءبىرى جانە بىرەگەيى – يمانعاليەۆتەر وتباسى بولاتىن. ءسابيت كوكەم مەن ءزۇبايرا اپامىزدى كورگەندە، سول كەزدەگى بالالىق ساتتەر ويعا ورالا بەرەتىن.
كەيىن، 2008 جىل بولۋ كەرەك. قىزىلوردا قالاسىنداعى شاڭىراعىمىزدا بولدى. اكەيدىڭ ابزال رۋحىنا قۇران باعىشتايىن دەپ كەلگەن ەكەن. انام مارقۇم دا ريزا بولىپ، كوڭىلى ءبىر مارقايىپ قالدى. ءبىر جاعىنان، ورتاق جوبا باستادىق. «قىزىلوردا كوشەلەرى» – دەگەن اتاۋمەن ەنتسيكلوپەديالىق جيناقتى جارىققا شىعارۋعا ۇلەسىمىزدى قوستىق. ايتايىن دەگەنىم، كەيدە ادامنىڭ جان دۇنيەسى مەن كوڭىلى قالاپ تۇراتىن ءىس نە ادام بولادى. ونداي ورتامەن باۋىرلارشا ارالاساسىڭ. ەشقانداي مۇددە مەن پەندەلىك ەسەپ جۇرمەيدى. يمانعاليەۆتەر اۋلەتىنەن دە وسى ءبىر ادامي تازالىقتى بايقادىم. كوكەم مەن اپامنىڭ جىلى قارىم-قاتىناسى مەن بويداعى زيالىلىقتارىنا سۇيسىنەتىنبىز. بۇل قانمەن، تەكپەن كەلەتىن تاربيە عوي، ءاسىلى. كەيىن، باۋىرجان اعامىز، ءساتجان باۋىر، گۇلناز اپامىزبەن تانىسىپ، ارالاس-قۇرالاستىعىمىز ءارى قاراي بەكىپ، كەڭەيە ءتۇستى.
اۋلەتتىڭ ىرىسى ارتىپ، بەرەكەسى باياندى بولۋ ءۇشىن كوزگە كورىنبەيتىن شارتتار ورىندالۋ كەرەك دەگەن ءتامسىل بار. ءسابيت كوكەم مەن ءزۇبايرا اپامىز سول شارتتارعا ادال، اماناتقا بەرىك بولدى دەپ نىق سەنىممەن ايتا الامىن. مىنە، سونىڭ ناتيجەسىندە جاراتقان قولداپ، وتباسىنىڭ بەرەكە-بىرلىگىن باياندى ەتتى. ەل الدىنداعى ابىرويىن اسقاقتاتتى. وتباسى مەن اۋلەت ينستيتۋتىن بۇگىنگى ءومىر قۇندىلىعىمەن قاتار جاڭعىرتىپ وتىر دەۋگە تولىق نەگىز بار.
«مەرەيلى وتباسى» اتتى ۇلتتىق ءداستۇر مەن وتباسى قۇندىلىقتارىن ناسيحاتتايتىن جوبانىڭ جەڭىمپازى اتانىپ، ەلدىڭ الدى بولا ءبىلدى. ەڭ تاڭداۋلىلار سايىسقا تۇسكەن جوبانىڭ باس جۇلدەسىن الۋ دەگەن ەڭ ءبىر قيىن دا، كۇردەلى شارۋا ەدى. الايدا، قازىلار القاسى مەن ەرىكتىلەر تاڭداۋى - يمانعاليەۆتەر اۋلەتىنە ءتۇستى.
حاديستە «امالدار – نيەتكە بايلانىستى» دەگەن بار. ءبىز قازىرگىدەي ماتەريالدىق دۇنيە العا شىققان ۋاقىتتا، ومىرگە باسقاشا قۇندىلىقپەن قاراپ ءجۇرمىز. الايدا، رۋحاني جاعىنا ءمان بەرگەندە، راسىندا، كوپ نارسەنىڭ نيەتكە بايلانىستى ەكەنىنە كوز جەتكىزەسىڭ. اللا تاعالا دا جۇرەككە، نيەتكە قارايدى. ءسابيت كوكە مەن ءزۇبايرا اپامىزدىڭ ادال نيەتى مەن كەڭ جۇرەكتىلىگىنە سىرتتاي سۇيسىنەمىز. ارقاشان ەلگە بولسىن. قولدان كەلگەنشە، ەلگە ءبىر جاقسىلىق جاسايىق دەپ وتىرادى.
بىلە بىلگەنگە، رۋحاني ەڭبەك پەن قوعامدىق جۇمىستاردىڭ ءوزى ۇلكەن ەڭبەك. ءسابيت كوكەمىز «قازاق ءتىلى» قوعامىنىڭ باسشىلىعىندا بولعاندا، الماتىنىڭ زيالى قاۋىمدارى جينالاتىن باس قوسۋلاردىڭ بەل ورتاسىندا ءجۇردى. جۇرگەنوۆتىڭ رۋحاني جانە شىعارماشىلىق تۋىندىلارىن ەلگە جەتكىزۋ جولىندا دا تاپجىلماي ەڭبەك ەتىپ كەلەدى. باۋىرجان اعامىز الاش ارىسى – تەمىربەك جۇرگەنوۆتىڭ بولمىسى مەن شىعارماشىلىق تۇعىرىن عىلىمي اينالىمعا ەنگىزۋ جولىندا تاپجىلماي ەڭبەك ەتسە، ءسابيت كوكەمىز – قوعامدىق – ساياسي كوزقاراسى تۋرالى جۇيەلى جۇمىستار اتقارۋدا.
بۇگىنگى قارىم-قاتىناستىڭ نەگىزى – مىنەز ەكەنى بارىمىزگە بەلگىلى. وتباسى ءۇشىن دە مىنەز ەڭ باستى فاكتورلاردىڭ ءبىرى. قازاقتىڭ كورنەكتى جازۋشىسى، دراماتۋرگ، پۋبليتسيست، قازاق ادەبيەتىن قالىپتاستىرۋشىلاردىڭ ءبىرى - جۇسىپبەك ايماۋىتوۆ ادام تاربيەسى مەن پسيحولوگياسى، ۇلتتىق مىنەز تۋرالى جاقسى ايتادى. مىنەزدى - اقىل-قايراتتىڭ جيىنتىعى، تاربيە ناتيجەسى جانە ۇلتتىق بولمىستىڭ كورىنىسى دەپ باعا بەرگەن. ءسابيت كوكەمىز بەن ءزۇبايرا اپامىزدا تاربيە مەن تەكتى ساباقتاستىرىپ، ۇلتتىق بولمىس دەڭگەيىنە كوتەرە ءبىلدى. ەڭ باستىسى، وتباسىلىق ومىردە - تاجىريبەدە كەڭ قولداندى. مىنە، وسىنداي تاعىلىمدى شەشىمدەردىڭ ناتيجەسىندە، اۋلەتتىڭ ابىرويى ارتىپ، باقىتى باياندى بولىپ وتىر دەۋگە تولىق نەگىز بار.
ادامنىڭ ىستىق-ىقىلاسى مەن نيەتى – ونىڭ تاعدىرى دەگەنگە بەك سەنەمىز. كىسىنىڭ بولمىسى مەن ادامي قۇندىلىعىنا ەرەكشە قۇرمەتپەن قاراعان ادام، تۇبىندە ورتاعا سىيلى، قوعامدا بەدەلدى بولادى. قاي جەردە دە، ءتور سونىكى بولماق. يمانعاليەۆتەر اۋلەتىنەن دە سونداي ءبىر ساۋلەلى تاڭبا بايقالادى. بۇل كەيىنگى جاڭا بۋىنعا بەرىلەتىن ەستافەتا ىسپەتتى دۇنيە. ولاي دەيتىنىم، بۇگىنگى جاستار ومىردەن كورىپ، كوڭىلگە تۇيگەنىن كەيىنگى ۇرپاققا جەتكىزۋشى «تاسىمالداۋشى» ءرولىن اتقارادى. ءسابيت كوكەمىز بەن ءزۇبايرا اپامىز قۇرعان شاڭىراق – ەلگە ۇلگى بولىپ، ۇلتتىڭ ۇستىنى مەن رۋحاني بولمىسىنا ساي جاڭعىرىپ وتىرعان قۇتتى اۋلەت ەكەنى بارشامىزعا بەلگىلى.
ارداقتى، ءسابيت كوكە جانە ءزۇبايرا اپا! يمانعاليەۆتەر اۋلەتى! بار جاقسىلىق باياندى بولسىن! شاڭىراقتىڭ قۇت-بەرەكەسى ارتا بەرسىن. ىزگى نيەتتى، ەڭبەكقور، بىرلىگى جاراسقان – قادىرلى اۋلەتتىڭ الداعى الار اسۋى بۇدان دا بيىك بولسىن!
قۇرمانالى قالماحان. جۋرناليستەر وداعىنىڭ مۇشەسى. اقپارات سالاسىنىڭ ۇزدىگى. مادەنيەت قايراتكەرى