قما استانا قالاسى بويىنشا دەپارتامەنتى باس كولىك پروكۋراتۋراسىنىڭ ۇيلەستىرۋىمەن ەكولوگيالىق تالاپتارعا سايكەس كەلمەيتىن كولىك قۇرالدارىن زاڭسىز اكەلۋ فاكتىسى بويىنشا تەرگەۋدى اياقتادى.

تەرگەۋ امالدارىنا ساي، ءبىر توپ ادام باقىلاۋىنداعى جشس-تەر ارقىلى «ەۆرو-2» ەكولوگيالىق كلاسىنا جاتاتىن FAW ماركالى جۇك كولىكتەرىن قازاقستان اۋماعىنا زاڭسىز يمپورتتاۋدى ۇيىمداستىرعان.

يمپورت قولدانىستاعى «ەۆرو-4»-تەن تومەن ستاندارتتاعى تەحنيكانى اكەلۋگە تىيىم سالىنعانىنا قاراماستان جۇزەگە اسىرىلعان.

تەحنيكا قىتاي حالىق رەسپۋبليكاسىنان سىرتقى ەكونوميكالىق كەلىسىمشارتتار نەگىزىندە جەتكىزىلىپ، كەيىن كەدەندىك راسىمدەۋ كەزىندە جالعان مالىمەتتەر پايدالانىلعان.

اتاپ ايتقاندا، كولىك قۇرالدارىنىڭ قاۋىپسىزدىك سەرتيفيكاتتارى (سبكتس) قولدان جاسالىپ، وندا ادەيى «ەۆرو-5» ەكولوگيالىق كلاسس كورسەتىلگەن.

ناتيجەسىندە قازاقستان اۋماعىنا 20 بىرلىك ارنايى تەحنيكا زاڭسىز اكەلىنگەن.

ولاردىڭ جالپى كەدەندىك قۇنى 284 ملن تەڭگەدەن اسقان.

كەيىن بۇل تەحنيكا بايلانىسى بار كومپانيالار تىزبەگى ارقىلى ساتىلىپ، مەملەكەتتىك ساتىپ الۋ اياسىندا 600 ملن تەڭگەدەن استام سوماعا جەتكىزىلگەن.

سوت سانكتسياسىمەن كۇدىكتىلەردىڭ مۇلكىنە: 9 اۆتوكولىك پەن ءبىر پاتەرگە تىيىم سالىندى.

كۇدىكتىلەردىڭ ءبىرى قاماۋعا الىندى، ال ونىڭ ەكى سىبايلاسىنا ەلدەن شىقپاۋ تۋرالى بۇلتارتپاۋ شاراسى قولدانىلدى.

وزگە مالىمەتتەر قر قپك-ءنىڭ 201-بابىنا سايكەس جاريا ەتىلمەيدى.

ايتا كەتۋ قاجەت، ەكولوگيالىق ستاندارتتارعا ساي كەلمەيتىن كولىكتەردى زاڭسىز اكەلۋ قورشاعان ورتاعا ەلەۋلى زيان كەلتىرەدى. «ەۆرو-2» كلاسىنا جاتاتىن تەحنيكا «ەۆرو-4» جانە «ەۆرو-5» ستاندارتتارىنا قاراعاندا الدەقايدا كوپ زياندى زاتتار ءبولىپ، اۋا ساپاسىنىڭ ناشارلاۋىنا جانە حالىق دەنساۋلىعىنا قاۋىپ توندىرەدى.

قر قما ءباسپاسوز قىزمەتى