كەزدەسۋ بارىسىندا مۇناي سالاسىنا سالىق سالۋ ماسەلەسى پىسىقتالدى. بۇل ورايدا قارجى ءمينيسترى ءمادي تاكيەۆ، ۇلتتىق ەكونوميكا ۆيتسە-ءمينيسترى ازامات ءامرين جانە قر قم مكك توراعاسىنىڭ ورىنباسارى جانىبەك نۇرجانوۆ پارلامەنت ءماجىلىسىنىڭ قاراۋىندا جاتقان سالىق كودەكسىندەگى جاڭاشىلدىقتار تۋرالى ايتتى.
«مۇناي سالاسى بيۋدجەت تۇسىمدەرىنىڭ ەداۋىر ۇلەسىن قامتاماسىز ەتىپ وتىرعان ۇلتتىق ەكونوميكانىڭ نەگىزگى درايۆەرلەرىنىڭ ءبىرى بولىپ سانالادى، سولاي بولىپ قالا بەرەتىنىنە كۇمان جوق. ءبىزدىڭ ماقساتىمىز – بارلىق تاراپتىڭ: مەملەكەتتىڭ، بيزنەستىڭ جانە تۇتاستاي قوعامنىڭ مۇددەلەرىن ەسكەرەتىن سالىق سالۋ جۇيەسىن قۇرۋ. الدىمىزدا سالانىڭ ورنىقتى دامۋىنا ىقپال ەتەتىن، ينۆەستيتسيالاردى ىنتالاندىرىپ، يننوۆاتسيالىق تەحنولوگيالاردى ەنگىزەتىن ءتيىمدى جانە ءادىل سالىق جۇيەسىن قۇرۋ بويىنشا مىندەتتەر تۇر»، - دەدى ءمادي تاكيەۆ.
ۆەدومستۆو باسشىسى جاڭا سالىق كودەكسىنىڭ جوباسىندا سالىقتار مەن بيۋدجەتكە تولەنەتىن باسقا دا مىندەتتى تولەمدەر سانى ازاياتىنىن اتاپ ءوتتى. ماڭىزدى فيسكالدى قايتارىمسىز تولەمدەردى الىپ تاستاۋ جانە ولاردىڭ كەيبىرىن بىرىكتىرۋ جوسپارلانعان. جۇيەلىك شارالار رەتىندە سالىقتىق جەڭىلدىكتەر ۇعىمىن ناقتى رەتتەۋ ۇسىنىلىپ وتىر.
ۇلتتىق ەكونوميكا ۆيتسە-ءمينيسترى ازامات ءامرين جاڭا وندىرىستەرگە ينۆەستيتسيالاردى ىنتالاندىرۋمەن قاتار سالىق كودەكسىنىڭ جوباسى ەسكى سارقىلىپ جاتقان كەن ورىندارىنداعى ءوندىرىستى قولداۋعا باعىتتالعانىن ايتتى.
«مۇناي-گاز جانە تاۋ-كەن سالالارى بيۋدجەت كىرىستەرىنىڭ كوپ بولىگىن قامتاماسىز ەتەتىنىن ەسكەرە وتىرىپ، جاڭا شارالار بيۋدجەتكە تۇسەتىن تۇسىمدەردى، سونداي-اق جۇمىس ورىندارىن تۇراقتى ۇستاۋعا مۇمكىندىك بەرەدى. بۇل جۇمىس ىستەپ تۇرعان نەمەسە جاڭا كەن ورىندارىن بارلاۋ الەۋەتى بار وڭىرلەردى دامىتۋ ءۇشىن ماڭىزدى»، - دەدى ۆيتسە-مينيستر.
مەملەكەتتىك كىرىستەر كوميتەتى توراعاسىنىڭ ورىنباسارى جانىبەك نۇرجانوۆتىڭ ايتۋىنشا، جاڭا سالىق كودەكسىندە جوسپارلى تەكسەرۋلەردى جۇرگىزۋ ءتارتىبى وزگەرتىلدى. مۇنداي ءىس-شارالاردى تاعايىنداۋ سالىق تولەۋشىنىڭ قىزمەتىن تالداۋ قورىتىندىلارى بويىنشا جۇرگىزىلەتىن بولادى. سونىمەن قاتار تەكسەرۋلەر ەلەكتروندى فورماتقا اۋىستىرىلادى.
«مەملەكەت باسشىسىنىڭ قازاقستان حالقىنا جولداۋىندا سالىقتىق اكىمشىلەندىرۋدى تسيفرلاندىرۋدىڭ ستراتەگيالىق ماڭىزدىلىعى تۋرالى ايتىلعانى بەلگىلى. سوندىقتان سىبايلاس جەمقورلىق تاۋەكەلدەرىن ازايتۋ جانە اشىقتىقتى قامتاماسىز ەتۋ ءۇشىن قارجى مينيسترلىگى سالىق سالاسىنداعى پروتسەستەردى ەلەكتروندى فورماتقا كوشىرۋدى جەدەلدەتۋدى قولعا الدى»، - دەپ قورىتىندىلادى ءمادي تاكيەۆ.
كەزدەسۋدىڭ قورىتىندىسى بويىنشا تاراپتار تەك ناتيجەلى ديالوگ قانا جاڭا سالىق كودەكسىنىڭ جوباسىنا سالىق سالۋ مەن مۇناي-گاز سالاسىن اكىمشىلەندىرۋ بويىنشا ءتيىمدى تاسىلدەردى ەنگىزۋگە مۇمكىندىك بەرەتىنىن ايتتى.
مينيسترلىكتىڭ مالىمەتىنشە، بۇل جولعى كەزدەسۋگە اتىراۋ ءوڭىرى كەزدەيسوق تاڭدالعان جوق. نەگە دەسەڭىز، 2023 جىلى ەلىمىزدەگى ونەركاسىپ ءوندىرىسىنىڭ جالپى كولەمىنىڭ 24% اتىراۋ وبلىسىنا تيەسىلى بولدى. سونىمەن قاتار ءوڭىر ينۆەستيتسيا تارتۋ بويىنشا رەسپۋبليكالىق رەيتينگتە كوش باستاپ تۇر.
بۇعان دەيىن مەملەكەتتىك ساتىپ الۋ جۇيەسىندە قانداي وزگەرىستەر بولۋى مۇمكىن ەكەنىن جازعان بولاتىنبىز.
