استانا اۋەجايىندا سپورتشىلارىمىزدى ءداستۇرلى ساداق اتۋ فەدەراتسياسىنىڭ وكىلدەرى، جاقىندارى قارسى الدى.
«الەم كۋبوگى دەگەن اتاۋى بولعانىمەن، قاتىسۋشىلاردىڭ سانى جاعىنان الەم چەمپيوناتىنان كەم بولمادى. ەڭ باستى اۋىز تولتىرارلىقتاي ايتاتىن ناتيجەمىز – جالپى ەسەپتە توپ جارۋىمىز.
قارسىلاستار دەڭگەيى دە وتە جوعارى بولدى. وڭتۇستىك كورەيا، مالايزيا، اۋستراليا مەملەكەتتەرى دە ەش قالىسپادى. ءبىز بۇعان دەيىن 30 جانە 70 مەتر قاشىقتىقتاعى باسەكەلەردە سايىسقا تۇسەتىن ەدىك. وسى جولى ءبىرىنشى مارتە 90 مەن 145 مەتر قاشىقتىقتا باق سىنادىق. سونىڭ وزىندە 90 مەتردەگى كوماندالىق سايىستا توپ جاردىق. قىر-سىرلارىن تۇسىنە باستادىق. ەندى كەلەسى جىلى بۇل كورسەتكىشتەرىمىزدى جاقسارتا تۇسۋگە ءتيىسپىز»، - دەدى ءداستۇرلى ساداق اتۋدان ۇلتتىق قۇرامانىڭ باس باپكەرى دياس احمەتوۆ.
ايتا كەتەيىك، 31 قازان – 4 قاراشا ارالىعىندا وتكەن ايتۋلى باسەكەدە 32 مەملەكەتتەن 535 سپورتشى سىنعا ءتۇستى. ولار جامبى (30 مەتر), پۋتا (70 مەتر), تاركسا (90 مەتر), كۋنگدا (145 مەتر) نىسانالارىندا جۇلدەنى ساراپقا سالدى.
«وزدەرىڭىز بىلەتىندەي، پارلامەنت تورىندە 180 سپورت ءتۇرىن 60-قا دەيىن قىسقارتتىق. ۇلتتىق سپورت تۇرىنە كىرەتىن 11 سپورتقا دا قارجى ءبولىپ، قارايلاساتىن ۋاقىت كەلدى.
مىنە، ۇلتتىق قۇرامامىز وقۋ-جاتتىعۋ جيىنىنان ءوتىپ، تولىقتاي كيىم-كەشەكپەن جاساقتالدى. 2025 جىلدىڭ باستى جارىستارىنىڭ ءبىرى – الەم كۋبوگىندا قازاقستان ەڭ ۇزدىك ەكەندىگىن رەسمي تۇردە دالەلدەي ءبىلدى. ەندىگى جوسپارىمىز – جەلتوقسان ايىندا ءداستۇرلى ساداق اتۋدان فورۋم وتكىزىپ، ۇزدىكتەردى ماراپاتتاۋ. ال 2026 جىلى قىرعىزستانداعى VI دۇنيەجۇزىلىك ويىندارعا تىڭعىلىقتى دايىندالىپ، ءوز جەرىمىزدە ازيا كۋبوگىن ۇيىمداستىرساق دەگەن ويىمىز بار»، - دەدى ساداق اتۋ فەدەراتسياسىنىڭ پرەزيدەنتى، قر پارلامەنتى ءماجىلىسىنىڭ دەپۋتاتى نارتاي ارالبايۇلى.
قازاقستان قۇراماسى الەم كۋبوگىندا 35 سپورتشىسىن قوسىپ، ناتيجەسىندە 2 التىن، 4 كۇمىس، 3 قولا مەدالدى جەڭىپ الدى.
ولاردىڭ اراسىنان استانا قالاسىنان ەربول تاپەنوۆ (90 مەتر، كوماندالىق سايىستا التىن), سابىرجان فاريزا (30 مەتر، كۇمىس), باتيحان ايكوركەم (30 مەتر، كۇمىس) جۇلدە تۇعىرىنان كورىندى.
