بيىل كورمەگە 17 ەلدىڭ رەسمي وكىلدەرى مەن بيزنەس قوعامداستىعى قاتىستى.

ىسكەرلىك باعدارلاما شەڭبەرىندە 11 000-نان استام ۇيىمدار مەن كومپانيالاردىڭ قاتىسۋىمەن 100-دەن استام ءىس-شارالار وتكىزۋ جوسپارلانعان.

پانەلدىك سەسسيا باستالار الدىندا دەلەگاتسيا باسشىلارى قازاقستان رەسپۋبليكاسىنىڭ، بەلارۋس رەسپۋبليكاسىنىڭ ۇلتتىق ەكسپوزيتسيالارىمەن، سەرىكتەس ەل ساۋد ارابياسىنىڭ ستەندىمەن تانىستى.

قازاقستان رەسپۋبليكاسىنىڭ ۇلتتىق ەكسپوزيتسياسىندا مەتاللۋرگيا مەن ماشينا جاساۋدى قوسا العاندا، اۋىر ونەركاسىپتەن باستاپ حالىق تۇتىناتىن تاۋارلار وندىرىسىنە دەيىنگى سالالاردى قامتيتىن 12 جەتەكشى كاسىپورىن ۇسىنىلعان.

ستراتەگيالىق سەسسيانىڭ باستى تاقىرىبى – «تەحنولوگيالىق كوشباسشىلىق: يندۋستريالىق سەرپىلىس».

رومان سكليار ءوز سوزىندە قازاقستاننىڭ وڭدەۋ ونەركاسىبىنىڭ نەگىزگى جەتىستىكتەرى مەن بولاشاقتاعى دامۋ پەرسپەكتيۆالارى تۋرالى ايتتى. سونىمەن قاتار باسقا دا ەلدەرمەن ارىپتەستىك قارىم-قاتىناس ورناتۋدىڭ، كووپەراتسيالىق جوبالاردى جۇزەگە اسىرۋدىڭ جانە ينۆەستيتسيا تارتۋدىڭ ماڭىزدىلىعىن اتاپ ءوتتى.

ۇكىمەتتىڭ ءباسپاسوز قىزمەتى