قىزىلوردا قالاسىننىڭ سول جاعالاۋىندا وبلىس اكىمى نۇرلىبەك نالىباەۆ، دەنساۋلىق ساقتاۋ ءمينيسترى اقمارال ءالنازاروۆا، پارلامەنت ءماجىلىسىنىڭ دەپۋتاتتارى مۇرات ابەنوۆ، مارحابات جايىمبەتوۆ، مۇرات ەرگەشباەۆ، قۇقىق قورعاۋ ورگاندارىنىڭ ءبىرىنشى باسشىلارى، ءماسليحات دەپۋتاتتارى جانە زيالى قاۋىم وكىلدەرى، ەل اعالارىنىڭ قاتىسۋىمەن 500 كەلۋشىگە ارنالعان ەمحانانىڭ ىرگەتاسى قالاندى.

ايماق باسشىسى سول جاعالاۋعا قونىستانۋشىلاردىڭ سۇرانىسىنا سايكەس قۇرىلىسى باستالعان جاڭا نىسان تۇرعىنداردىڭ مەديتسينالىق قىزمەتكە قولجەتىمدىلىگىن ارتتىراتىنىن اتاپ ءوتتى.

«سىر وڭىرىندە پرەزيدەنتىمىزدىڭ، ۇكىمەتتىڭ ەرەكشە قولداۋىمەن، جەرلەستەرىمىزدىڭ بەكەم بىرلىگىنىڭ ارقاسىندا بايىپتى باستامالار قولعا الىنىپ، جاسامپاز جوبالار ىسكە اسىرىلۋدا. دەنساۋلىق ساقتاۋ ينفراقۇرىلىمىن ودان ءارى جەتىلدىرۋ شارالارى كەشەندى جۇرگىزىلىپ كەلەدى. 2022-2025 جىلدارى سالاعا 50 ملرد. 100 ملن. تەڭگە قارجى ءبولىندى، 26 ملرد. 400 ملن. تەڭگەگە 40 مەديتسينا نىسانى سالىنىپ، پايدالانۋعا بەرىلدى.

«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى بەلگىلەنگەن جوسپارعا سايكەس تولىعىمەن ورىندالىپ، 10 ملرد. 700 ملن. تەڭگەگە سالىنعان 28 نىسان حالىق يگىلىگىنە قىزمەت ەتۋدە.

جاڭادان بوي كوتەرەتىن ەمحانا دا شيپا ىزدەگەن جاندارعا جىلۋلىق سىيلايتىن ورىنعا اينالسىن! رامازان ايى بارشامىزعا قۇتتى بولسىن! ورازالارىڭىز قابىل بولسىن!»، – دەدى نۇرلىبەك نالىباەۆ.

راسىمدە اقمارال شارىپبايقىزى، مۇرات نالقوجاۇلى قۇتتىقتاۋ ءسوز سويلەپ، قازاقستاننىڭ ەڭبەك سىڭىرگەن دارىگەرى اسىلبەك توقمىرزاۇلى باتا بەردى.

ايتا كەتەيىك، سول جاعالاۋدا بوي كوتەرەتىن 500 ورىندىق ەمحانا تۇرعىندارعا امبۋلاتوريالىق-ەمحانالىق، دياگنوستيكالىق جانە كۇندىزگى ستاتسيونارلىق مەديتسينالىق قىزمەت كورسەتەتىن كوپسالالى مەكەمە بولادى. مۇندا جالپى جانە اكۋشەرلىك-گينەكولوگيالىق تىركەۋ، پەدياتريا، مامانداندىرىلعان جانە شۇعىل مەديتسينالىق كومەك، پروفيلاكتيكا جانە مەكتەپ مەديتسيناسى بولىمدەرى قاراستىرىلعان.

سونىمەن قاتار، نىسان 50 توسەكتىك كۇندىزگى ستاتسيونار، دارىلىك قامتاماسىز ەتۋ ءبولىمى، ورتالىق ستەريليزاتسيا، كىر جۋ ورنى، مەديتسينالىق قالدىقتاردى ساقتاۋ، وقۋ كابينەتتەرى، 50 ورىندىق اۋديتوريا، 200 ورىندىق كونفەرەنتس-زال جانە ينجەنەرلىك-تەحنيكالىق ينفراقۇرىلىممەن تولىق قامتاماسىز ەتىلەدى.

@قىزىلوردا وبلىسى اكىمىنىڭ ءباسپاسوز قىزمەتى