وبلىستىق پروكۋراتۋرانىڭ ۇيىمداستىرۋىمەن ءوڭىر تۇرعىندارىمەن كەزدەسۋدىڭ يگى داستۇرىنە اينالعان «زاڭ كەرۋەنى» اكتسياسى سىرداريا اۋدانىنان باستاۋ الدى. 

مۇنداي فورماتتاعى شارالار تۇرعىنداردىڭ وزەكتى ماسەلەلەرىن تىڭداپ، جەرگىلىكتى جەردە جەدەل شەشۋگە، حالىق پەن مەملەكەتتىك ورگاندار اراسىنداعى كەرى بايلانىستى نىعايتۋعا مۇمكىندىك بەرەدى.  

ءىس-شاراعا وبلىس پروكۋرورى ريزابەك وجاروۆ، اۋدان اكىمى بەرىك سارمەنباەۆ سونداي-اق قۇقىق قورعاۋ، جەرگىلىكتى اتقارۋشى ورگانداردىڭ وكىلدەرى قاتىستى.

كەزدەسۋ بارىسىندا تۇرعىنداردىڭ الەۋمەتتىك قامسىزداندىرۋ، جەر قاتىناستارى، تۇرعىن ءۇي، ەڭبەك، اتقارۋشىلىق ءىس جۇرگىزۋ جانە وزگە دە سالالار بويىنشا كوتەرگەن ماسەلەلەرى قارالدى. ازاماتتاردىڭ ساۋالدارىنا قولدانىستاعى زاڭناما تالاپتارىنا سايكەس تۇسىندىرمەلەر بەرىلدى. جەكەلەگەن ماسەلەلەر باقىلاۋعا الىندى.

شارا اياسىندا ازاماتتاردىڭ قۇقىقتارىن قورعاۋ، قۇقىق بۇزۋشىلىقتاردىڭ الدىن الۋ جانە قوعامداعى زاڭدىلىق پەن ءتارتىپتى نىعايتۋ باعىتىنداعى جۇمىستاردىڭ ماڭىزدىلىعى اتاپ ءوتىلدى.

قابىلدانعان شارالاردىڭ ناتيجەسىندە اعىمداعى جىلدىڭ وتكەن كەزەڭىندە وبلىس بويىنشا قىلمىستىلىق 10 پايىزعا، ال سىرداريا اۋدانىندا 22 پايىزعا تومەندەگەن.

«زاڭ كەرۋەنى» اكتسياسىمەن وبلىس كولەمىندەگى 135 ەلدى مەكەندەر مەن اۋدان ورتالىقتارىن قامتۋ جوسپارلانۋدا. 

بۇل رەتتە شاراعا وبلىس پروكۋراتۋراسى قىزمەتكەرلەرىنەن قۇرالعان توپتار جاساقتالىپ، ءار توپقا باسقارما باستىقتارى، وبلىس پروكۋرورىنىڭ اعا كومەكشىلەرى جانە تاجىريبەلى قىزمەتكەرلەردەن جەتەكشىلەر بەلگىلەندى.

 اكتسيا شەڭبەرىندە اتالعان توپتار حالىقتىڭ قۇقىقتىق مادەنيەتىن ارتتىرۋعا، تۇرعىنداردىڭ ماسەلەلەرىن جەدەل قاراۋعا جانە قولجەتىمدى قۇقىقتىق كومەك كورسەتۋگە باعىتتالعان جۇمىستاردى جۇيەلى تۇردە جالعاستىراتىن بولادى. 

#زاڭمەنتارتىپ

#زاڭۇستەمدىگى

#زاڭبارىنەورتاق

#ادالازامات

#جاۋاپكەرشىلىك

قىزىلوردا وبلىسىنىڭ پروكۋراتۋراسى