بۇگىن قىزىلوردادا قالانىڭ جول-كولىك ينفراقۇرىلىمىن وركەندەتۋدەگى ماڭىزدى جوبا باستالدى. ي.توقتىباەۆ كوشەسىنەن سىرداريا وزەنى ارقىلى وتەتىن جاڭا كوپىر قۇرىلىسىنىڭ كاپسۋلاسىن سالۋ راسىمىنە وبلىس اكىمى مۇرات ەرگەشباەۆ، قر قۇرىلتاي دەپۋتاتتارى سەرىك قوجانيازوۆ، نۇركەن باقىتبەكۇلى، ماعجان ەراليەۆ، يرينا تەن، قۇقىق قورعاۋ ورگاندارىنىڭ ءبىرىنشى باسشىلارى، ءماسليحات دەپۋتاتتارى، زيالى قاۋىم وكىلدەرى مەن ەل اعالارى قاتىستى.

ايماق باسشىسى وڭىردە ينفراقۇرىلىمدى جاڭعىرتۋ جانە حالىقتىڭ تۇرمىس ساپاسىن ارتتىرۋ باعىتىندا اۋقىمدى جوبالار جۇزەگە اسىپ جاتقانىن اتاپ ءوتتى.

–پرەزيدەنتىمىزدىڭ تاپسىرماسىنا سايكەس، ەل اۋماعىنداعى تەمىرجول ۆوكزالدارىن كۇردەلى جوندەۋ جانە قايتا جاڭعىرتۋ قارقىندى ءجۇرىپ جاتىر.

بۇگىندە جاڭاقورعان، شيەلى، قازالى جانە سەكسەۋىل تەمىرجول ۆوكزالدارىنداعى جۇمىس تولىق اياقتالىپ، نىساندار ەل يگىلىگىنە قىزمەت ەتۋدە. تالاپ بەكەتىندەگى جولاۋشىلار پلاتفورماسى قايتا جاڭعىرتۋدان ءوتتى. جالاعاش جانە تەرەڭوزەك كەنتتەرىندەگى ەكى قىزمەت كورسەتۋ پۋنكتىندە جۇمىس جالعاسۋدا. كۇنى كەشە ارال تەڭىزى، تورەتام جانە جوسالى تەمىرجول ۆوكزالدارى ەل يگىلىگىنە تابىستالدى.

بۇگىن سىزدەرمەن بىرگە تاريحي وقيعانىڭ كۋاسى بولىپ وتىرمىز. سىرداريا وزەنى ارقىلى وتەتىن جاڭا كوپىر كاپسۋلاسىن سالۋ جاڭا نىسان قۇرىلىسىنا عانا ەمەس، ايماق دامۋىنىڭ جاڭا بەلەسىنە باستاۋ بولماق، – دەدى مۇرات نالقوجاۇلى.

راسىمدە قۇرىلتاي دەپۋتاتى سەرىك سالاۋاتۇلى مەن ەل اعاسى مۇرات باقتيارۇلى ءسوز سويلەپ، قولعا الىنعان جوبانىڭ ءساتتى جۇزەگە اسۋىنا تىلەكتەستىك ءبىلدىردى.

ي.توقتىباەۆ كوشەسىنەن سىرداريا وزەنى ارقىلى وتەتىن جاڭا كوپىر – ۋاقىت تالابى مەن حالىق سۇرانىسىنان تۋىنداعان ماڭىزدى جوبا.

قۇرىلىستى تاجىريبەسى مول «ۆد ستروي ينجينيرينگ» كومپانياسى جۇرگىزەدى. كوپىر ۇزىندىعى 338 مەتر، ەنى 23 مەتر.

ايتا كەتەيىك، بۇگىندە سىرداريا وزەنىنىڭ قورعانىس بوگەتتەرىن نىعايتۋ جۇمىستارى دا قارقىن الدى. داريا جاعالاۋىندا ەكى جولاقتى جاياۋ جۇرگىنشىلەر جانە ۆەلوسيپەد جولدارى سالىنۋدا. بۇل جۇمىستار وزەن جاعالاۋىن سۋ تاسقىنىنان قورعاۋمەن قاتار، تۇرعىندار ءۇشىن جايلى دەمالىس ايماعىن جاساۋعا باعىتتالعان.

بيىل قىزىلوردا قالاسىنىڭ جول-كولىك ينفراقۇرىلىمىن دامىتۋدا 30 ملرد تەڭگەنىڭ 22 جوباسى ىسكە اسىرىلۋدا.

 «بايتەرەك» تۇرعىن اۋدانىنداعى جاڭا كوپىر قۇرىلىسى اياقتالىپ، كولىك قاتىناسى تولىق رەتتەلدى.

تاسبوگەت كەنتىندەگى يمانوۆ، بوزعۇل، ناۋرىز جانە ەسەنوۆ كوشەلەرى كەڭەيتىلدى.

قالا ورتالىعىمەن قاتار، شەت ايماقتاردىڭ ينفراقۇرىلىمىنا دا باسىمدىق بەرىلگەن. قازىر كەنتتەر مەن اۋىلدىق وكرۋگتەردىڭ 32 كوشەسى جوندەلىپ جاتىر.

قىزىلوردا وبلىسى اكىمىنىڭ ءباسپاسوز قىزمەتى