بۇگىن قىزىلوردا وبلىسىنىڭ قازالى اۋدانىندا جاس ۇرپاققا ساپالى بىلىممەن قاتار تاعىلىمدى تاربيە بەرۋ ماسەلەلەرىن تالقىلاۋ ماقساتىندا «سانالى ۇرپاق – جارقىن بولاشاق» اتتى كەڭەيتىلگەن ءماجىلىس ءوتتى.

روزا باعلانوۆا اتىنداعى اۋداندىق مادەنيەت ۇيىندە وتكەن ماجىلىسكە اۋدان پروكۋرورى ماديار بەكپانوۆ، اۋدان جاستارىمەن كەزدەسۋگە ارنايى كەلگەن قوناقتار - استانا قالاسىنداعى «ىرىسكەلدى قاجى» مەشىتىنىڭ باس يمامى، ءدىنتانۋشى، تەولوگ اسانوۆ نۇرلان بايجىگىتۇلى، اقىن، «التىن دومبىرا» رەسپۋبليكالىق ايتىسىنىڭ ءۇش دۇركىن يەگەرى، وبلىستىق ءماسليحات دەپۋتاتى، ن. بەكەجانوۆ اتىنداعى قازاق اكادەميكالىق مۋزىكالىق-دراما تەاترىنىڭ ديرەكتورى مۇحتار نيازوۆ، تانىمال اقىن، قازاقستان جازۋشىلار وداعىنىڭ مۇشەسى، «كۇمىس قالام-2025» بايقاۋىنىڭ جۇلدەگەرى اقجول تۇمەنباي جانە قۇقىق قورعاۋ ورگاندارىنىڭ باسشىلارى، زيالى قاۋىم وكىلدەرى، مەكەمە باسشىلارى، اتا-انالار كوميتەتىنىڭ وكىلدەرى، مەكتەپ ديرەكتورلارى مەن اۋدان جاستارى قاتىستى.

جيىندا اۋدان باسشىسى الدىمەن وسكەلەڭ ۇرپاققا ساپالى بىلىممەن قاتار سانالى تاربيە بەرۋ – مەملەكەت پەن قوعام الدىنداعى ورتاق مىندەت ەكەنىن اتاپ ءوتتى. مەملەكەت باسشىسى قاسىم-جومارت كەمەلۇلى توقاەۆتىڭ جاس ۇرپاقتى ەڭبەكقورلىققا، تارتىپكە، وتانسۇيگىشتىككە جانە زاڭعا قۇرمەتپەن قاراۋعا تاربيەلەۋ جونىندەگى ۇستانىمدارىنا توقتالىپ، بۇگىنگى قوعامدا وتباسى، مەكتەپ جانە مەملەكەتتىك ورگانداردىڭ ءوزارا ۇيلەسىمدى جۇمىسى ەرەكشە ماڭىزعا يە ەكەنىن جەتكىزدى. سونداي-اق جاڭا كونستيتۋتسيا اياسىندا قوعامدا زاڭ ۇستەمدىگىن نىعايتۋ، قۇقىقتىق مادەنيەتتى قالىپتاستىرۋ جانە جاۋاپتى ازامات تاربيەلەۋ باعىتىندا اتقارىلىپ جاتقان جۇمىستارعا توقتالدى.

ءماجىلىس بارىسىندا ارنايى شاقىرىلعان قوناقتار جاستار تاربيەسى، رۋحاني قۇندىلىقتاردى دارىپتەۋ، ءدىني ساۋاتتىلىقتى ارتتىرۋ، ۇلتتىق بولمىستى ساقتاۋ، قۇقىقتىق مادەنيەت پەن جاۋاپكەرشىلىكتى قالىپتاستىرۋ ماسەلەلەرى توڭىرەگىندە مازمۇندى وي-پىكىرلەرىمەن ءبولىستى.

بەلگىلى تەولوگ نۇرلان اسانوۆ جاستاردىڭ تەرىس ءدىني اعىمداردىڭ ىقپالىنان ساقتانۋى، وتباسى، اتا-انانىڭ تاربيەسىنىڭ ماڭىزى مەن رۋحاني يممۋنيتەتتى قالىپتاستىرۋ جايىندا كەڭىنەن اڭگىمەلەسە، ايتىسكەر اقىن مۇحتار نيازوۆ ۇلتتىق تاربيە، وتباسى قۇندىلىعى جانە اتا-انانىڭ جاۋاپكەرشىلىگى تۋرالى تاعىلىمدى ويلارىن ورتاعا سالدى. ال اقىن اقجول تۇمەنباي جاستاردىڭ رۋحاني دۇنيەسىن بايىتۋداعى ادەبيەت پەن ۇلتتىق تاربيەنىڭ ورنىنا توقتالدى.

كەڭەيتىلگەن ماجىلىستە اۋدان پروكۋرورى ماديار بەكپانوۆ جاسوسپىرىمدەر اراسىنداعى قۇقىق بۇزۋشىلىقتىڭ الدىن الۋ، قۇقىقتىق ساۋاتتىلىقتى ارتتىرۋ جانە قوعامدا «زاڭ مەن ءتارتىپ» قاعيداتىن ورنىقتىرۋ باعىتىندا قابىلدانىپ جاتقان شارالار تۋرالى ءسوز قوزعادى.

جيىن سوڭىندا كوتەرىلگەن ماسەلەلەر بويىنشا پىكىر الماسۋ ءوتىپ، اۋدان جاستارى قوناقتارعا ساۋالدارىن قويىپ، جاس ۇرپاقتىڭ قاۋىپسىزدىگىن قامتاماسىز ەتۋ، ولاردىڭ بوس ۋاقىتىن ءتيىمدى ۇيىمداستىرۋ، قۇقىقتىق جانە رۋحاني تاربيەسىن كۇشەيتۋ باعىتىنداعى جۇمىستاردى بىرلەسىپ جالعاستىرۋ قاجەتتىگى اتاپ ءوتىلدى.

اكىمدىكتىڭ ءباسپاسوز قىزمەتى