بۇگىن سول جاعالاۋداعى «قايسار ارەنا» ستاديونىندا قالا كۇنىنە ارنالعان «مەرەيلى مەرەكەڭمەن، قىزىلوردا!» اتتى گالا-كونتسەرت ءوتتى. گالا-كونتسەرت تاقىرىپتىق پرولوگپەن باستالىپ، وندا قالانىڭ ەكى عاسىرلىق تاريحى مەن بۇگىنگى كەلبەتى، ورلەۋ جولى قامتىلدى.
وبلىس اكىمى مۇرات ەرگەشباەۆ تۇرعىنداردى مەرەكەمەن قۇتتىقتاپ، ءوڭىردىڭ الەۋمەتتىك-ەكونوميكالىق جەتىستىكتەرىنە توقتالدى.
«پرەزيدەنتىمىز قاسىم-جومارت كەمەلۇلى: «قىزىلوردا – حالقىمىز ءۇشىن ورنى ەرەكشە ايماق. وسى ولكەدە شىرىك رابات، جانكەنت، سىعاناق قالالارىنىڭ ورنى كونە زاماننىڭ وزىندە قازاق جەرىندە دامىعان قالا وركەنيەتى بولعانىن اڭعارتادى. قىزىلوردا – سول ايگىلى قالالاردىڭ زاڭدى جالعاسى»، – دەدى.
بۇل – ءبىر عاسىر بۇرىن قازاق ەلىنىڭ استاناسى بولعان، ۇلت تاعدىرىنا قاتىستى ماڭىزدى شەشىمدەر قابىلدانعان قاسيەتتى مەكەن. ەكى عاسىرلىق تاريحى بار قىزىلوردا توپىراعىندا ۇلت قايراتكەرلەرى، الاش ارىستارى تاعدىرشەشتى قادامدارعا بارىپ، بولاشاققا باعدار جاساعانى تاريحتان بەلگىلى.
قالامىزدىڭ بۇگىنگى جاڭارۋى مەن كوركەيۋى – سول تاريحي ساباقتاستىقتىڭ جالعاسى. كەيىنگى جىلدارى الەۋمەتتىك جانە ينجەنەرلىك ينفراقۇرىلىم جاڭعىرتىلىپ، زاماناۋي نىساندار ەل يگىلىگىنە بەرىلۋدە. ءوڭىر ەكونوميكاسىنىڭ قۋاتىن ارتتىراتىن ءىرى ينۆەستيتسيالىق جوبالار جۇزەگە اسىرىلۋدا.
قىزىلوردانىڭ كوركەيۋىنە ەرەكشە ۇلەس قوسقان، بۇگىندە ۇكىمەت باسشىسىنىڭ ءبىرىنشى ورىنباسارى نۇرلىبەك ماشبەكۇلى سىزدەردى قالا كۇنىمەن قۇتتىقتاپ، ىستىق ىقىلاسىن بىلدىرۋدە.
بۇگىنگى مەرەيلى مەرەكە وزدەرىڭىزگە ارنالادى. سۇيىكتى قالامىز كوركەيە بەرسىن! قىزىلوردامىزدىڭ بولاشاعى جارقىن، كەلەشەگى كەمەل بولسىن! ارمان-ماقساتتارىمىز ورىندالسىن! حالقىمىز امان، بىرلىگىمىز بەكەم بولسىن! مەرەكە قۇتتى بولسىن، قادىرلى جەرلەستەر!» –دەدى مۇرات نالقوجاۇلى.
كەشتە ەلىمىزگە تانىمال ونەر يەلەرى ينديرا ەلۋباەۆا، قازىبەك قۇرايىش، ۇكىتاي ەرنيازوۆ، بالجان بيداش، «KESH YOU» توبى جانە ALEM ساحنا تورىندە ونەر كورسەتىپ، كورەرمەندەرگە كوتەرىڭكى كوڭىل كۇي سىيلادى. گالا-كونتسەرت مەرەكەلىك وتشاشۋمەن قورىتىندىلاندى.
كەيىنگى جىلدارى قىزىلوردا قالاسىنىڭ ينفراقۇرىلىمى جاڭارىپ، الەۋمەتتىك-ەكونوميكالىق دامۋ قارقىنى ارتىپ كەلەدى. مەملەكەت باسشىسىنىڭ، ۇكىمەتتىڭ قولداۋىنىڭ ارقاسىندا ءىرى ينۆەستيتسيالىق جوبالار جۇزەگە اسىرىلىپ، جاڭا ءوندىرىس ورىندارى اشىلۋدا.
سونىمەن قاتار، تۇرعىن ۇيلەر مەن زاماناۋي الەۋمەتتىك نىساندار سالىنىپ، ەل يگىلىگىنە اينالدى. بيىل ينكليۋزيۆتى سپورت ورتالىعى، «دوستىق ءۇيى» جانە «قۇزىرەتتىلىك ورتالىعى» اشىلدى. سونداي-اق «اي-كەرىم» وقۋ-ساۋىقتىرۋ ورتالىعى مەن بوتانيكالىق باق پايدالانۋعا بەرىلدى.
قازىرگى تاڭدا پرەزيدەنتتىك كىتاپحانا، دراما تەاتر جانە بىرقاتار ءىرى مەديتسينالىق نىسان سالىنۋدا. «تازا قازاقستان» جوباسى اياسىندا اشىلعان پرەزيدەنت ساياباعى تۇرعىندار مەن قالا قوناقتارىنىڭ سۇيىكتى دەمالىس ورنىنا اينالدى.
قالانىڭ سول جاعالاۋىن بايلانىستىراتىن جاڭا اۆتوجول كوپىرى مەن ەرەكشە ۇلگىدەگى جاياۋ جۇرگىنشىلەر كوپىرىنىڭ قۇرىلىسى جالعاسۋدا. پرەزيدەنت ساياباعى ماڭىندا زاماناۋي اكۆاپارك قۇرىلىسى دا باستالدى. جىل سوڭىنا دەيىن «قىزىلوردا ارەنا» سپورت كەشەنىن پايدالانۋعا بەرۋ جوسپارلانىپ وتىر.
قىزىلوردا وبلىسى اكىمىنىڭ ءباسپاسوز قىزمەتى
