2022 جىلدان بەرى 20 مادەنيەت نىسانى جاڭادان بوي كوتەرىپ، ەل يگىلىگىنە بەرىلگەن. بۇل تۋرالى وبلىس اكىمى نۇرلىبەك نالىباەۆ ورتالىق كوممۋنيكاتسيالار قىزمەتىنىڭ بريفينگىندە باياندادى.
«وڭىردە مادەنيەت سالاسىندا سوڭعى 3 جىلدا 21 مادەنيەت نىسانى جاڭادان بوي كوتەردى. ونىڭ 9-ى اۋىلدىق كلۋب، 7-ءۋى «رۋحانيات ورتالىقتارى» جانە اناعا تاعزىم، وتباسى، ونەر ورتالىقتارى مەن وبلىستىق تاريحي-ولكەتانۋ مۋزەيى.
«اۋىل – ەل بەسىگى» باعدارلاماسىمەن بيىل 2 اۋىلدىق كلۋب سالىنۋدا. اۋدانداعى «رۋحانيات ورتالىقتارىندا» مۋزەي، كىتاپحانا، ارحيۆ، نەكە قيۋ زالىنا، ارداگەرلەر مەن انالار كەڭەسىنە، جاستارعا، ەتنومادەني بىرلەستىكتەرگە، ۇكىمەتتىك ەمەس ۇيىمدارعا تولىق جابدىقتالعان جۇمىس كابينەتتەرى اشىلدى.
قىزىلوردا قالاسىندا «وتباسى ورتالىعى»، «اناعا تاعزىم» ورتالىعى اشىلدى. كوپفۋنكتسيونالدى مىڭ ورىندىق «ونەر ورتالىعى» شىعارماشىلىق كەشتەر، كونتسەرتتەر مەن قوعامدىق ءىس-شارالار وتەتىن ورىنعا اينالدى.
بيىل قىزىلوردانىڭ قازاق اكسر استاناسى بولعانىنا 100 جىل تولدى. اتاۋلى داتاعا وراي 2 ملرد. 300 ملن. تەڭگەگە وبلىستىق تاريحي-ولكەتانۋ مۋزەيىنىڭ زاماناۋي جاڭا عيماراتى بوي كوتەردى.
اسسامبلەيانىڭ 30 جىلدىعى اياسىندا قىزىلوردا قالاسىندا «قازاتومونەركاسىپ» ۇاك قولداۋىمەن 3 ملرد. 800 ملن. تەڭگەگە سالىنعان «دوستىق ءۇيىنىڭ» جاڭا عيماراتى جاقىن كۇندەرى قولدانىسقا بەرىلەدى.
مادەنيەت سالاسىنىڭ قىزمەتكەرلەرىنە كوپقاباتتى تۇرعىن ءۇي سالىنىپ، 40 پاتەر تابىستالدى.
جاڭادان سيمفونيالىق وركەستر، ينكليۋزيۆتى تەاتر، جاستار تەاترى، زاماناۋي بي، حور ۇجىمدارى جاساقتالدى. سىر مادەنيەتىنىڭ نەگىزگى برەندى، جىراۋلىق ءداستۇر وكىلدەرىنىڭ وتاۋى جىراۋلار ءۇيى اشىلدى»، – دەدى ن.نالىباەۆ.
سىر وڭىرىندە مادەنيەت، ونەر جانە ادەبيەت وكىلدەرىن قولداۋ ماقساتىندا «تۇران» سىيلىعىن جىل سايىن تابىستاۋ داستۇرگە اينالعان.
بۇعان دەيىن استانا، الماتى قالالارىندا قىزىلوردا وبلىسىنىڭ مادەنيەت جانە ونەر كۇندەرى ءوتتى. بيىل اباي قۇنانبايۇلىنىڭ 180 جىلدىعىنا وراي اباي، شىعىس قازاقستان وبلىستارىنا دا ونەر ساپارى ۇيىمداستىرىلدى.
قىزىلوردا وبلىسىنىڭ ونەر مايتالماندارى ناۋرىز مەرەكەسىن، ەلىمىزدىڭ سالت-داستۇرلەرىن حالىقارالىق دەڭگەيدە، اتاپ ايتقاندا، يسپانيا، فينليانديا، ەستونيا ەلدەرىندە ناسيحاتتادى. ۇلتتىق مەرەكە رەسپۋبليكا كۇنىنە وراي شۆەيتساريانىڭ بىرنەشە قالاسىندا قىزىلوردانىڭ مادەنيەت جانە ونەر كۇندەرى ءوتتى.
