قىزىلوردا وبلىسى پوليتسيا دەپارتامەنتىنىڭ كيبەرپول باسقارماسىنىڭ قىزمەتكەرلەرى پروكۋراتۋرا وكىلدەرىمەن بىرلەسىپ، حالىقارالىق جاستار كۇنىنە ارنالعان اشىق اسپان استىنداعى كونتسەرت بارىسىندا تۇرعىندار اراسىندا اقپاراتتىق-ءتۇسىندىرۋ جۇمىستارىن جۇرگىزدى.
ءىس-شارانىڭ نەگىزگى ماقساتى – ينتەرنەت كەڭىستىگىندە جاسالاتىن الاياقتىق قىلمىستاردىڭ الدىن الۋ، ازاماتتاردىڭ قۇقىقتىق جانە تسيفرلىق ساۋاتتىلىعىن ارتتىرۋ.
ءىس-شارا بارىسىندا تۇرعىندارعا ينتەرنەت-الاياقتىقتىڭ كەڭ تارالعان تاسىلدەرى ءتۇسىندىرىلىپ، الەۋمەتتىك جەلىلەر مەن مەسسەندجەرلەر ارقىلى كەلىپ تۇسەتىن كۇماندى حابارلامالار مەن سىلتەمەلەرگە ساقتىقپەن قاراۋ قاجەتتىگى ەسكەرتىلدى. سونىمەن قاتار ينتەرنەت-الاياقتىقتان ساقتانۋ جولدارى كورسەتىلگەن اقپاراتتىق پاراقشالار تاراتىلدى.
زاڭ مەن ءتارتىپ – قاۋىپسىز قوعامنىڭ نەگىزى. ازاماتتاردىڭ تسيفرلىق ساۋاتتىلىعىن ارتتىرۋ جانە ينتەرنەت-الاياقتىقتىڭ الدىن الۋ باعىتىنداعى پروفيلاكتيكالىق، اقپاراتتىق-ءتۇسىندىرۋ جۇمىستارى قىزىلوردا وبلىسىندا تۇراقتى تۇردە جۇرگىزىلۋدە.
#زاڭمەنتارتىپ #قىزىلوردا #ينتەرنەتالاياقتىق #كيبەرپول #قاۋىپسىزدىك
