قىزىلوردادا ارال ءوڭىرىنىڭ تابيعاتىن ساقتاۋعا جانە ەكوجۇيەسىن قورعاۋعا باعىتتالعان «GREEN ARAL: VOLUNTEERS FOR LIFE 2026» حالىقارالىق ۆولونتەرلەر اپتالىعىنىڭ اشىلۋ ءراسىمى ءوتتى. 

باستاما مەملەكەت باسشىسى قاسىم-جومارت كەمەلۇلى توقاەۆتىڭ ۇسىنىسىمەن بۇۇ جاريالاعان تۇراقتى دامۋ ماقساتىنداعى حالىقارالىق ۆولونتەرلەر جىلىنا وراي ۇيىمداستىرىلدى.

جيىننىڭ اشىلۋ راسىمىنە وبلىس اكىمىنىڭ ءبىرىنشى ورىنباسارى دانيار جانالينوۆ، قازاقستان رەسپۋبليكاسى مادەنيەت جانە اقپارات مينيسترلىگى ازاماتتىق قوعام ىستەرى كوميتەتى توراعاسىنىڭ ورىنباسارى توعجان زەيدەنوۆا، قازاقستان حالىق كەڭەسىنىڭ مۇشەلەرى ۆەرا كيم مەن جانار بيمۇراتقىزى، وبلىستىق قوعامدىق كەڭەس توراعاسى ناۋرىزباي بايقاداموۆ، سونداي-اق وزبەكستان، قىرعىزستان جانە قازاقستاننىڭ 10 وڭىرىنەن كەلگەن 100 ۆولونتەر جانە وبلىستاعى 500-دەن استام بەلسەندى ستۋدەنتتەر مەن ەرىكتى جاستار قاتىستى.

جيىندا وبلىس اكىمىنىڭ ءبىرىنشى ورىنباسارى دانيار جانالينوۆ قاتىسۋشىلاردى «GREEN ARAL» حالىقارالىق ۆولونتەرلەر اپتالىعىنىڭ اشىلۋىمەن قۇتتىقتاپ، ۆولونتەرلىكتىڭ ەل ومىرىندەگى ماڭىزىنا توقتالدى.

«بۇگىنگى باسقوسۋدىڭ سىر وڭىرىندە ءوتۋى جانە اپتالىقتىڭ «GREEN ARAL» دەپ اتالۋى ايرىقشا مانگە يە. بۇل – قورشاعان ورتانى قورعاۋعا، ەكولوگيالىق مادەنيەتتى قالىپتاستىرۋعا جانە ارال ءوڭىرىنىڭ تاعدىرىنا دەگەن ورتاق جاۋاپكەرشىلىكتى سەزىنۋگە ۇندەيتىن ماڭىزدى باستاما. ارال ماسەلەسى – ەلىمىزدىڭ عانا ەمەس، بۇكىل الەمنىڭ نازارىنداعى وزەكتى تاقىرىپ. تابيعاتقا جاناشىرلىق تانىتىپ، ەكولوگيالىق تۇيتكىلدەردىڭ شەشىمىنە ۇلەس قوسۋ – بارشامىزعا ورتاق مىندەت. سىر ەلىنە كەلگەن ساپارلارىڭىز ءساتتى، جۇزدەسۋلەرىڭىز مازمۇندى، باستامالارىڭىز ناتيجەلى بولسىن!»، – دەدى دانيار ەرەنعاليۇلى.

سونداي-اق، ايماقتاعى ۆولونتەرلىك قوزعالىستىڭ وركەندەۋىنە ۇلەس قوسىپ، قوعامدىق جۇمىستاردا بەلسەندىلىك تانىتىپ جۇرگەن بىرقاتار ازاماتتار وبلىس اكىمىنىڭ «العىس حاتىمەن» ماراپاتتالدى.

شارا اياسىندا قازاقستان رەسپۋبليكاسى مادەنيەت جانە اقپارات مينيسترلىگى ازاماتتىق قوعام ىستەرى كوميتەتى توراعاسىنىڭ ورىنباسارى توعجان زەيدەنوۆا ءسوز سويلەپ، ۆولونتەرلەر باستامالارىن قولداۋدىڭ ماڭىزىن اتاپ ءوتتى. 

ال، «ۇلتتىق ۆولونتەرلىك جەلى» توراعاسى، قازاقستان حالىق كەڭەسىنىڭ مۇشەسى ۆەرا كيم قازاقستان حالىق كەڭەسىنىڭ توراعاسى ەرلان قوشانوۆتىڭ ارنايى قۇتتىقتاۋ حاتىن وقىپ بەردى.

اپتالىق جاستار اراسىندا ۆولونتەرلىك قوزعالىستى دامىتۋعا، ەكولوگيالىق مادەنيەتتى قالىپتاستىرۋعا جانە حالىقارالىق ىنتىماقتاستىقتى نىعايتۋعا باعىتتالعان.

باعدارلاما بارىسىندا قاتىسۋشىلار تاجىريبە الماسىپ، ەكولوگيالىق باستامالارىن تانىستىرادى. بۇدان بولەك، ولار قورشاعان ورتاعا قاتىستى وزەكتى ماسەلەلەردى بىرلەسىپ شەشۋ جولدارىن قاراستىرادى. نەگىزگى ءىس-شارالار قىزىلوردا وبلىسىنىڭ ارال اۋدانىندا وتەدى.

اپتالىق اياسىندا بەلسەندى جاستاردىڭ تاجىريبە الماسۋ جانە ءبىر-بىرىمەن بايلانىسىن نىعايتۋ ماقساتىندا «KZO CAMP: ONE COMMUNITY» رەسپۋبليكالىق ۆولونتەرلەر سلەتى دە ءوتتى.

«GREEN ARAL: VOLUNTEERS FOR LIFE 2026» حالىقارالىق اپتالىعى جاستاردىڭ، قوعامدىق ۇيىمدار مەن حالىقارالىق سەرىكتەستەردىڭ باسىن قوسىپ، ەكولوگيالىق ۆولونتەرلىكتى دامىتۋعا جانە ارال ءوڭىرىنىڭ تابيعاتىن قورعاۋعا باعىتتالعان باستامالاردى قولداۋعا جول اشادى. 

قىزىلوردا وبلىسىنىڭ قوعامدىق دامۋ باسقارماسى