بۇگىن سول جاعالاۋداعى «قايسار-ارەنا» ستاديونى اۋماعىندا وبلىس اكىمى نۇرلىبەك نالىباەۆ، پارلامەنت سەناتى مەن ءماجىلىسىنىڭ دەپۋتاتتارى رۋسلان رۇستەموۆ، مۇرات ابەنوۆ، مارحابات جايىمبەتوۆ، مۇرات ەرگەشباەۆتىڭ قاتىسۋىمەن «بەرەكە باستاۋى – ءاز ناۋرىز» اتتى مادەني-كوپشىلىك شارا ءوتتى.
كوكتىڭ تىنىسىن تىڭداعان، جەردىڭ تامىرىن باسقان، تۇرمىس-تىرشىلىگىن تابيعات-انامەن تىعىز بايلانىستىرعان اتا-بابالارىمىز ناۋرىزدى جاڭارۋ مەن جاسامپازدىقتىڭ باستاۋى دەپ ەسەپتەگەن. ۋاقىتپەن بىرگە جاڭارعان قىزىلوردا قالاسىنىڭ ءسان-سالتاناتى ۇلىستىڭ ۇلى كۇنى قارساڭىندا بۇرىنعىدان دا ارتا تۇسكەندەي. قالا كوشەلەرى ناۋرىز مەرەكەسىنىڭ ايشىقتى كورىنىستەرىمەن، ۇلتتىق ناقىشتارمەن بەزەندىرىلگەن.
كەيىنگى كۇندەرى ىزعاردىڭ دا بەتى قايتىپ، كۇن شۋاعىن مولىنان توكتى. كوكتەمنىڭ جاڭارۋىمەن ۇندەسكەن قالا كەلبەتى ەرەكشە قۇلپىرىپ، مەرەكەلىك كوڭىل-كۇيدى سەزىندىردى. جاڭا ستاديون الاڭىنا 60-قا جۋىق كيىز ءۇي تىگىلىپ، بەرەكە مەن بىرلىكتىڭ نىشانىنداي اق داستارحان جايىلدى.
ايماق باسشىسى جۇرتشىلىقتى ناۋرىز مەرەكەسىمەن قۇتتىقتاپ، سىر ءوڭىرىنىڭ دامۋ جولىنداعى جاڭاشىلدىقتار مەن الداعى جوسپارلارعا توقتالدى.
«پرەزيدەنتىمىز قاسىم-جومارت كەمەلۇلى سىر بويىندا وتكەن ۇلتتىق قۇرىلتايدا: «سوڭعى جىلدارى قىزىلوردا وبلىسى زامان تالابىنا ساي ءوسىپ-وركەندەپ جاتىر» دەپ، ايماعىمىزدىڭ بارلىق سالاداعى قارقىنىن ەرەكشە اتاپ ءوتتى، اتقارىلعان جۇمىستارعا وڭ باعاسىن بەردى. تاريحي ميسسياسى ماڭىزدى جيىندا مەملەكەت باسشىمىز قىزىلوردا قالاسىندا 300 ورىندىق كوپبەيىندى اۋرۋحانا قۇرىلىسى باستالعانىن، 400, 500 ورىندىق ەمحانالار، 200 ورىندىق پەرزەنتحانا مەن جاڭا دراما تەاتر، زاماناۋي پرەزيدەنتتىك كىتاپحانا قۇرىلىسى باستالاتىنىن جاريالادى. رەسپۋبليكالىق، حالىقارلىق ماڭىزى بار جاڭا اۆتوموبيل جولدارىنىڭ قۇرىلىسى تۋرالى ايتتى.
جاقىندا عانا «باتىس ەۋروپا – باتىس قىتاي» حالىقارالىق ءاۆتودالىزىنىڭ قىزىلوردا – اقتوبە باعىتىن ءتورت جولاقتى ەتىپ كەڭەيتۋ جوباسىنىڭ ءبىرىنشى كەزەڭىن باستادىق. «بەينەۋ – سەكسەۋىل» جولىنىڭ قۇرىلىسى دا بيىل قولعا الىنادى.
ۇلتتىق قۇندىلىقتارىمىزدى ۇلىقتاعان ناۋرىز مەيرامى تاۋەلسىز ەلىمىزگە، تۋعان جەرىمىزگە تولايىم تابىستارمەن، جاڭالىقتارمەن كەلسىن!
جەرىمىزدىڭ تىنىسى كەڭ، ەلىمىزدىڭ مەرەيى ۇستەم، حالقىمىزدىڭ بولاشاعى باياندى بولسىن! ەگىنىمىز بىتىك شىعىپ، قامبامىز استىققا تولسىن! ءار شاڭىراققا قىدىر قونىپ، قۇت دارىسىن»، – دەدى نۇرلىبەك نالىباەۆ.
ناۋرىز مەرەكەسىنە وراي تىگىلگەن كيىز ۇيلەر الدىندا كورمەلەر مەن سالت-ءداستۇر قويىلىمدارى قويىلدى. تاۋەلسىزدىكتىڭ 35 جىلدىعىنا وراي 35 بالانىڭ تۇساۋىن، ايدارىن كەسۋ راسىمدەرى وتكىزىلىپ، ۇلتتىق سپورت تۇرلەرىنەن جارىستار ۇيىمداستىرىلدى.
ءماجىلىس دەپۋتاتى مۇرات ابەنوۆ قۇتتىقتاۋ ءسوز سويلەپ، كوپشىلىككە ىزگى تىلەگىن جەتكىزدى.
مەرەكە وتاندىق ەسترادا جۇلدىزدارىنىڭ جانە جەرگىلىكتى ونەرپازداردىڭ كونتسەرتىنە ۇلاستى.
@قىزىلوردا وبلىسى اكىمىنىڭ ءباسپاسوز قىزمەتى