مەملەكەت باسشىسىنىڭ تاپسىرماسىنا وراي، وتاندىق اۋىل شارۋاشىلىعى تاۋار وندىرۋشىلەرىن قولداۋ جانە حالىقتى ساپالى، تابيعي ونىمدەرمەن قامتاماسىز ەتۋ ماقساتىندا «دالا ءدامى» اتتى اپتالىق اۋىل شارۋاشىلىعى جارمەڭكەسىنىڭ تۇجىرىمداماسى ازىرلەندى.

جوبا شارۋالارعا ونىمدەرىن دەلدالسىز وتكىزۋگە، جاڭا نارىقتارعا شىعۋعا، ال تۇتىنۋشىلارعا وتاندىق ونىمدەردى قولجەتىمدى باعامەن ساتىپ الۋعا مۇمكىندىك بەرەدى.

وسى باعىتتا 19-20 قىركۇيەك كۇندەرى استانا قالاسىندا قىزىلوردا وبلىسىنىڭ تاۋار وندىرۋشىلەرى قاتىساتىن اۋىل شارۋاشىلىعى ونىمدەرىنىڭ جارمەڭكەسى ۇيىمداستىرىلۋدا.

سىر ەلىنەن ەلورداعا 100 جۇك كولىگىنە تيەلگەن 600 توننادان استام اۋىل شارۋاشىلىعى ءونىمى جەتكىزىلىپ، جارمەڭكەگە 100-گە جۋىق ديحان مەن ءتاۋاروندىرۋشى قاتىسۋدا.

اتاپ ايتقاندا، 230 توننادان استام كۇرىش، 30 توننا ەت ونىمدەرى، 30 توننا بالىق ونىمدەرى، 280 توننا باقشا ونىمدەرى، 30 توننادان استام كوكونىس پەن جەمىس-جيدەكتەر، 15 تونناعا جۋىق ءسۇت جانە كونديتەر ونىمدەرى، 5 توننا اس تۇزى جەتكىزىلدى.

سونداي-اق، جارمەڭكە اياسىندا سىر ەلىنىڭ ونەرپازدارى قاتىساتىن كونتسەرتتىك باعدارلاما ۇيىمداستىرىلۋدا.

جالپى مەملەكەتتىك قولداۋدىڭ ارقاسىندا ايماقتىڭ اۋىل شارۋاشىلىعى سالاسى قارقىندى دامىپ كەلەدى. ايماقتىڭ اگرارلىق سالاسىندا باسەكەگە قابىلەتتى ءونىم ءوندىرۋ ارقىلى ازىق-تۇلىك قاۋىپسىزدىگىن قامتاماسىز ەتۋ ماسەلەسى جولعا قويىلعان.

مەملەكەت تاراپىنان اگرارلىق سالانى قولداۋعا بيىل 37,3 ملرد تەڭگە قارجى ءبولىندى. وسى مەملەكەتتىك قولداۋدىڭ ناتيجەسىندە جىل باسىنان بەرى اۋىل شارۋاشىلىعى سالاسىندا 90 ملرد تەڭگەنىڭ ءونىمى ءوندىرىلىپ، ءوسىم 2,4%-عا ارتسا، اۋىل شارۋاشىلىعىنىڭ نەگىزگى قورىنا سالىنعان ينۆەستيتسيا كولەمى 2 ەسەگە ۇلعايدى.

بيىلعى جىلى وبلىس بويىنشا 193,7 مىڭ گەكتارعا اۋىل شارۋاشىلىعى داقىلدارى ورنالاستىرىلدى. ونىڭ ىشىندە ءداندى داقىلدار 91,2 مىڭ گەكتاردى، مايلى داقىلدار 9,6 مىڭ گەكتاردى، مال ازىقتىق داقىلدار 75,9 مىڭ گەكتاردى، ال كارتوپ، كوكونىس جانە باقشا داقىلدارى 17 مىڭ گەكتاردى قۇرايدى. ءوڭىردىڭ نەگىزگى كۇرىش داقىلى 70 مىڭ گەكتارعا ەگىلدى.

جالپى شارۋاشىلىقتار قاجەتتى اۋىل شارۋاشىلىعى تەحنيكالارىمەن، جانار-جاعارمايمەن جانە مينەرالدى تىڭايتقىشتارمەن تولىق قامتاماسىز ەتىلگەن.

ەرتە ەگىلگەن ءداندى داقىلداردى جيناۋ جۇمىستارى تولىق اياقتالدى. قازىرگى تاڭدا ءوڭىر ديقاندارى مال ازىقتىق جانە مايلى داقىلدارمەن قاتار، كوكونىس، باقشا جانە كۇرىش ونىمدەرىن جيناۋدا.

سىردىڭ اق مارجانى بۇگىندە الەم نارىعىنا جول تارتقان برەندكە اينالىپ كەلەدى. وڭىردە اۋىل شارۋاشىلىعى ونىمدەرىنىڭ ەكسپورتى قارقىندى دامۋدا.

بۇگىندە وبلىستان جالپى قۇنى 23 ميلليون اقش دوللارىن قۇرايتىن 45,7 مىڭ توننا اۋىل شارۋاشىلىعى ءونىمى الەمنىڭ 22 مەملەكەتىنە ەكسپورتتالدى.

سىر ءوڭىرىنىڭ اگرارلىق الەۋەتى تەك ەگىن شارۋاشىلىعىمەن شەكتەلمەيدى.

مەملەكەت تاراپىنان كورسەتىلىپ وتىرعان قولداۋدىڭ ناتيجەسىندە مال شارۋاشىلىعى دا تۇراقتى دامىپ كەلەدى.

2026 جىلدىڭ 1 قىركۇيەگىندەگى جاعداي بويىنشا وبلىستا 426,4 مىڭ باس ءىرى قارا، 764,4 مىڭ باس قوي مەن ەشكى، 277,3 مىڭ باس جىلقى، 68,5 مىڭ باس تۇيە جانە 128 مىڭ باس قۇس تىركەلدى.

وتكەن جىلدىڭ سايكەس كەزەڭىمەن سالىستىرعاندا ەت ءوندىرىسى 4 پايىزعا، ءسۇت ءوندىرىسى 4,8 پايىزعا، ال جۇمىرتقا ءوندىرىسى 6,4 پايىزعا ارتتى.

اۋىل شارۋاشىلىعىنىڭ دامۋى-ءوڭىردىڭ ازىق-تۇلىك قاۋىپسىزدىگىن قامتاماسىز ەتۋدىڭ جانە ەكونوميكانى ءارتاراپتاندىرۋدىڭ ماڭىزدى باعىتى.

وسى ماقساتتا ينۆەستيتسيالىق جوبالاردىڭ جول كارتاسىنا سايكەس، الداعى جىلدارى وبلىستا جالپى قۇنى 172,5 ملرد تەڭگەنى قۇرايتىن 17 ءىرى جوبا جۇزەگە اسىرىلادى.

ال بيىل جالپى قۇنى 29,6 ملرد تەڭگەنى قۇرايتىن 8 ينۆەستيتسيالىق جوبانى ىسكە اسىرۋ جوسپارلانعان. بۇگىندە ونىڭ 3 جوباسى ىسكە قوسىلدى.

استانا قالاسىنىڭ تۇرعىندارى مەن قوناقتارىن قىزىلوردا وبلىسىنىڭ اۋىل شارۋاشىلىعى جارمەڭكەسىنە شاقىرامىز!