بۇگىن وبلىس اكىمى مۇرات ەرگەشباەۆ «Tansu Construction» جشس ديرەكتورى نيكولاي كيم، «Vertex Holding» جشس باس ديرەكتورىنىڭ ورىنباسارى يرينا كەنجەتاەۆا، كۇردەلى جوبالار ءبولىمىنىڭ باسشىسى مايرا ۋسيپبەكوۆا جانە «استەل-ك» سەرىكتەستىگىنىڭ باس ينجەنەرى باحادىر سادىكوۆپەن كەزدەستى.

كەزدەسۋدە 600 مىڭ كىتاپ قورىن ساقتاۋعا ارنالعان پرەزيدەنتتىك كىتاپحانا قۇرىلىسىنىڭ بارىسى تالقىلاندى.

ەسكە سالايىق، جىل باسىندا مەملەكەت باسشىسىنىڭ قاتىسۋىمەن وتكەن ۇلتتىق قۇرىلتايدىڭ V وتىرىسىندا قىزىلوردا قالاسىندا تاۋلىك بويى جۇمىس ىستەيتىن زاماناۋي كىتاپحانا سالۋ جونىندە تاپسىرما بەرىلگەن بولاتىن. اتالعان جوبا ينۆەستور ەدۋارد وگايدىڭ دەمەۋشىلىگىمەن جۇزەگە اسىرىلۋدا، جالپى قۇنى 20,0 ملرد تەڭگە. عيماراتتىڭ اۋدانى 13 مىڭ شارشى مەتر، 3 گەكتار جەر تەلىمى بولىنگەن. ءۇش قاباتتى، جەرتولەسى، كونفەرەنتسيا، وقۋ، ەلەكتروندىق كىتاپحانا، وبلىستىق تاريح جانە باسىلىمدار، ارحيۆ جانە سيرەك قور زالدارى، الەم ادەبيەتى ءبولىمى، ونەر گالەرەيالارى، مەديالابوراتوريا، كورمە گالەرەياسى، بالالار ايماقتارى، كوۆوركينگ، فۋدكورت، قالپىنا كەلتىرۋ شەبەرحاناسى، تيپوگرافياسى بولادى.

قازىر قۇرىلىس-مونتاجداۋ جۇمىستارىنىڭ مەردىگەرى «Tansu Construction»، اۆتورلىق قاداعالاۋشى «استەل-ك» جانە تەحنيكالىق قاداعالاۋشى «SJS كازاحستان LTD» سەرىكتەستىكتەرىمەن كەلىسىمشارتتار راسىمدەلگەن.

نىساندى قاجەتتى ينجەنەرلىك-كوممۋنيكاتسيالىق جەلىلەرمەن قامتاماسىز ەتۋ ءۇشىن بارلىق تەحنيكالىق شارت الىنعان. قۇرىلىس الاڭىندا جەر قازۋ باستالىپ، جەراستى سۋىنىڭ دەڭگەيىن تومەندەتۋ جۇمىستارى جۇرگىزىلۋدە.

قىزىلوردا وبلىسى اكىمىنىڭ ءباسپاسوز قىزمەتى