قىزىلوردا وبلىسىنىڭ اكىمى مۇرات ەرگەشباەۆ قازالى اۋدانى قوجاباقى اۋىلىنداعى جاڭا دەنە شىنىقتىرۋ-ساۋىقتىرۋ كەشەنىنىڭ اشىلۋ راسىمىنە قاتىستى.

سالتاناتتى شارادا ايماق باسشىسى تۇرعىنداردى قۇتتىقتاپ، ەلدى مەكەندەردە كاسىبي جانە بۇقارالىق سپورتتى دامىتۋدىڭ ماڭىزدىلىعىن اتاپ ءوتتى. 

«بارشاڭىزدى سپورت كەشەنىنىڭ اشىلۋىمەن شىن جۇرەكتەن قۇتتىقتايمىن! 

مەملەكەت باسشىسى قاسىم-جومارت كەمەلۇلى: «اۋىل – ءبىزدىڭ التىن بەسىگىمىز. اۋىلداعى تىرشىلىك ساپاسىن جاقسارتپاي، جالپىۇلتتىق دامۋدى ەلەستەتۋ مۇمكىن ەمەس» دەگەن بولاتىن. 

بۇگىن وزدەرىڭىزبەن بىرگە «اۋىل – ەل بەسىگى» باعدارلاماسى اياسىندا قوجاباقى اۋىلىندا سالىنعان جاڭا دەنە شىنىقتىرۋ-ساۋىقتىرۋ كەشەنىن اشۋعا جينالدىق. ءبىر كۇندە 100 ادامدى قابىلداۋعا قاۋقارلى زاماناۋي كەشەندە بوكس، گرەك-ريم كۇرەسى، ۆولەيبول، فۋتبول جانە باسكەتبول سىندى سپورت تۇرلەرىمەن اينالىسۋعا بولادى. بۇل اۋىل جاستارىنىڭ بۇقارالىق سپورتپەن تۇراقتى شۇعىلدانۋىنا، سالاۋاتتى ءومىر سالتىن قالىپتاستىرۋعا، بولاشاق چەمپيونداردى تاربيەلەۋگە جول اشادى دەپ سەنەمىن. 

الداعى ۋاقىتتا دا حالقىمىزدىڭ يگىلىگىنە، تۇرعىندارىمىزدىڭ جايلى تۇرمىس-تىرشىلىگىنە، جاستارىمىزدىڭ جارقىن بولاشاعىنا باعىتتالعان جاڭا جوبالارىمىز جالعاسا بەرەدى»، - دەدى وبلىس اكىمى. 

ايتا كەتەيىك، مەملەكەت باسشىسىنىڭ، ۇكىمەتتىڭ قولداۋىمەن 2022 جىلدان بەرى وڭىردە 200-دەن استام الەۋمەتتىك نىسان بوي كوتەردى. ونىڭ 27-ءسى - سپورت كەشەنى، بۇگىندە ەل يگىلىگىنە اينالدى. بۇدان بولەك، قىزىلوردا قالاسىندا 11 مىڭ ورىندىق «قايسار ارەنا» ستاديونى، «تەننيس ورتالىعى» ، ينكليۋزيۆتى سپورت كەشەنى پايدالانۋعا بەرىلدى.

«قازاقستان حالقىنا» قوعامدىق قورىنىڭ قولداۋىمەن شيەلى، جالاعاش اۋداندارىندا جاڭا سپورت كەشەندەرى اشىلدى. 

جەرگىلىكتى كاسىپكەرلەردىڭ دەمەۋشىلىگىمەن 80 سپورت-ويىن الاڭى سالىندى. 

بۇگىندە وبلىس ورتالىعىندا «قىزىلوردا ارەنا» كوپبەيىندى سپورت كەشەنىنىڭ، «قايسار» فۋتبول كلۋبى اكادەمياسىنىڭ قۇرىلىسى قارقىن الدى. 

قىزىلوردا وبلىسى اكىمىنىڭ ءباسپاسوز قىزمەتى