قىزىلوردا وبلىسىنىڭ اكىمى نۇرلىبەك نالىباەۆپەن بىرگە سىرداريا، قازالى، قارماقشى جانە جالاعاش اۋداندارىنداعى شارۋا قوجالىقتارىنا بارىپ، اۋىل شارۋاشىلىعى سالاسىنىڭ قازىرگى احۋالىمەن تانىستى.

قانات بوزىمباەۆ سىرداريا اۋدانىنداعى كۇرىش، بيداي جانە جوڭىشقا وسىرۋمەن اينالىساتىنىن «ماعجان ي ك» شارۋاشىلىعىنا باردى. مۇندا سۋارمالى سۋدى ءتيىمدى پايدالانۋ جانە سۋ شىعىنىن ازايتۋ ءۇشىن لازەرلىك جەر تەگىستەۋ تەحنولوگياسى ەنگىزىلگەن. قازىرگى تاڭدا اۋدانعا جوسپارلانعان 674,2 ملن تەكشە مەتر سۋدىڭ 458,5 ملن تەكشە مەترى نەمەسە 68%-ى جەتكىزىلگەن.

قازالى اۋدانىندا ۆيتسە-پرەمەر «رزا» كومپانياسىندا بولدى. مۇندا 200-دەن استام ادام جۇمىس ىستەيدى. شارۋاشىلىق كۇرىش، جۇگەرى جانە جوڭىشقا ەگەدى. ەگىس «باسىقارا» جانە «قىزىلوي» كانالدارى ارقىلى سۋارىلادى. اۋداندا ەگىن شارۋاشىلىعىمەن اينالىساتىن 9 كاسىپورىن بار. ۆەگەتاتسيالىق كەزەڭ باستالعالى بەرى كەلىسىمشارتتاردا كوزدەلگەن 295,03 ملن تەكشە مەتر سۋدىڭ 259,6 ملن تەكشە مەترى نەمەسە 88%-ى جەتكىزىلگەن. شارۋاشىلىقتارعا توتەنشە جاعدايلار مينيسترلىگى سورعى قوندىرعىلارىن الىپ بەرىپ، قوسىمشا قولداۋ كورسەتۋدە.

ودان كەيىن قانات بوزىمباەۆ «باسىقارا» سۋ تورابىنىڭ جۇمىسىمەن تانىسىپ، شارۋاشىلىق باسشىلارىمەن كەزدەسۋدە حالىقارالىق كەلىسىمدەر جونىندە اقپارات بەردى.

«كورشى ەلدەرمەن جۇرگىزىلگەن كەلىسسوزدەردىڭ ناتيجەسىندە، ۆەگەتاتسيالىق كەزەڭدى ءساتتى اياقتاۋ ءۇشىن سۋ كولەمى جەتكىلىكتى بولادى دەپ كۇتىلۋدە. 15 تامىزعا دەيىن وزبەكستاننان سەكۋندىنا 200 تەكشە مەتر، قىرعىزستاننان 150 تەكشە مەتر سۋ جەتكىزىلەدى»، — دەدى ق.بوزىمباەۆ.

سونداي-اق ۆيتسە-پرەمەر قارماقشى جانە جالاعاش اۋداندارىنداعى سۋارمالى جەرلەردىڭ جاي-كۇيىمەن تانىسىپ، «جاڭاجول» جانە «تاڭ LTD» كاسىپورىندارىن ارالادى.

ءار اۋداندا فەرمەرلەر اراسىندا مونيتورينگ جانە ءتۇسىندىرۋ جۇمىستارىن جۇرگىزۋ ءۇشىن جۇمىس توپتارى قۇرىلعان. ايماقتا سۋدى ءتيىمدى پايدالانۋ ماقساتىندا 320-دان استام سورعى قوندىرعىسى ىسكە قوسىلعان. ەگىستىكتىڭ 98%-ى 5 ماگيسترالدىق جانە 3 شارۋاشىلىقارالىق كانال ارقىلى كەستەگە سايكەس سۋارىلۋدا. جاعداي ۇكىمەتتىڭ تۇراقتى باقىلاۋىندا.

ۇكىمەتتىڭ رەسمي سايتى