الەمدىك ەكونوميكا ادام ەڭبەگىنىڭ سيپاتىن تۇبەگەيلى وزگەرتۋگە بەت بۇرعان كەزەڭدە كاسىپتىك جانە تەحنيكالىق ءبىلىم بەرۋ جۇيەسى جوعارى تەحنولوگيالىق ەكونوميكانىڭ نەگىزگى تىرەگىنە اينالدى. قازاقستان تەحنيكالىق جانە كاسىپتىك ءبىلىم بەرۋ (تجكب) سالاسىن دامىتۋ ءۇشىن جۇيەلى جانە اۋقىمدى رەفورمالاردى جۇزەگە اسىرۋدا.
2025 جىلى جۇمىسشى ماماندىقتارى جىلى اياسىندا كوللەدجدەرگە ارنالعان مەملەكەتتىك ءبىلىم بەرۋ تاپسىرىسى 145 مىڭ ورىنعا دەيىن ۇلعايتىلدى. ونىڭ 70%-ى تەحنيكالىق جانە تەحنولوگيالىق باعىتتارعا ءبولىندى. بۇل ەل ەكونوميكاسىنىڭ ناقتى سەكتورىنا قاجەتتى كادرلاردى دايارلاۋعا جاسالعان ناقتى قادام.
جۇمىس بەرۋشىلەرمەن بىرلەسىپ 11 مىڭنان استام ءبىلىم بەرۋ باعدارلاماسى ازىرلەندى. ولار كاسىبي ستاندارتتار مەن WorldSkills تالاپتارىنا نەگىزدەلگەن، بۇل قازاقستاندىق ستۋدەنتتەردىڭ قۇزىرەتتەرىن حالىقارالىق دەڭگەيگە جەتكىزەدى.
وتكەن جىلى قازاقستاننىڭ ۇلتتىق قۇراماسى دانيادا وتكەن EuroSkills Herning 2025 چەمپيوناتىندا 7 «ۇزدىك مەدالون» يەلەندى. بۇل - تەحنيكالىق ءبىلىم ساپاسىنىڭ حالىقارالىق دەڭگەيدە مويىندالعانىنىڭ دالەلى.
اقپاراتتىق تەحنولوگيالار سالاسىنداعى ماماندىقتار بويىنشا ونلاين-وقىتۋ زاڭنامالىق تۇردە ەنگىزىلدى. باعدارلامالاۋ، كيبەرقاۋىپسىزدىك، دەرەكتەردى تالداۋ، جاساندى ينتەللەكت نەگىزدەرى سياقتى باعىتتار كوللەدجدەردە كەڭىنەن وقىتىلادى. ناتيجەسىندە تۇلەكتەر ەڭبەك نارىعىنا تەز بەيىمدەلەتىن، باسەكەگە قابىلەتتى مامان بولىپ شىعادى.
قازىرگى تاڭدا 43 مىڭعا جۋىق ستۋدەنت كاسىپورىنداردىڭ نىسانالى مەملەكەتتىك تاپسىرىسى اياسىندا ءبىلىم الۋدا. ولاردىڭ 8 مىڭعا جۋىعى وقۋىن اياقتاپ، تۇراقتى جۇمىسقا ورنالاستى.
